1กจุ้แฆว้ 5 - Northern Pwo Karen Thai Bibleทแด้เว้ ทฆ้าทโฆ่, ลู่ง ม ไต้ทาง เว่งฮ๊าง ( 2ทกน.2:1-18 ) 1 ฮีราง กจุ้แฆว้ เว่ง ไทระ, โซ๊ง อ กดูกแซย่ เกม๊า เฌ๊ โอ ซาโลโม, พี่ อ เว๊ แน่ฌ๊า เว๊, โพล้ง เท้าไน ต๊างทาง ซาโลโม เก กจุ้แฆว้ เท่งก้ะ อ แพ่ อ ล่าง, เมะเว๊ ฮีราง นอ, เก ซกุ้ ฌุ้พาง โละซ้ะ ดี๊ ดาเว ไยะ เย้า 2 ซาโลโม โซ๊ง อ ทไคล้ โล้ เอะ ฮีราง ไจ้ะเว๊ 3 “น ซีงแฌ๊ เย้า จ แพ่ ดาเว ไต้ทาง อ กแช่แยว้อล่างโอ, ลู่ง กแช่ยาเว อเม้งอแซ อ ฌ่าง นอ ล ซี แบ, เป๊งนี่ ทดึ้ซีงดึ้ซึ้ โอ วะ อ ฆ้อง ได้ะ, แบ โอ ท้อง ลู่ง กแช่ยาเว แม้น้า ดีงแด้, เกม๊า โอ ลู่ง อ เว๊ อ คาง พ๊างละ แบๆ 4 แบเด้าะ ค๊องเนงอี้ง, กแช่ยาเว จ กแช่แยว้, เกม๊า จ โอไปว้ะโอแซ แบ วะชวะ, โพล้ง แช๊เมะไฌ๊ซ้ะ ดี๊ แย้ ฌี้, ทกึทาง ลู่ง อ อ้า อ ซ๊าง ฌี้ ล โอ แบ 5 อ กย้อง บี่นอ, แย้ จ แบซ้ะ ไต้ทาง จ กแช่แยว้อล่างโอ, ลู่ง กแช่ยาเว อ เม้ง อ แซ นอ อ ฌ่าง, บี่ซุ้ดี๊ กแช่ยาเว โล้ เว้ เอะ จ แพ่ ดาเว ไจ้ะเว๊, ‘น พูแคว๊ พี่ จ ต๊างทาง-อ้ะ, ม๊า ชี๊น้างก้ะ ลู่ง น ล่าง ชี๊น้าง คู เท่งก้ะ แน้ นอ, อ เว๊ ม ไต้ทาง เอะ แย้ ทล่างโอ นอ, ลู่ง จ เม้ง จ แซ อ ฌ่าง’ 6 ทบี่นอ, ค๊องเนงอี้ง, เกม๊า น อางแบเลา โพล้ง กล้างนี่ ซย๊องซีดา, ลู่ง เลบาโนง พ้า นอ เอะ แย้ ไช้ะ, ดี๊ แย้ จ กดูกแซย่ ม แม้ช้า โละซ้ะ ดี๊ แน้ น กดูกแซย่, จ ม เกล๊าง เอะ แน้ น กดูกแซย่ นอ อ คางเล้ง, บี่ซุ้ดี๊ น ไคะทาง-อ้ะ นอ, เมะเว๊ น ซีงแฌ๊ เย้า, ลู่ง จ แกล้ พ้า อี้ง นอ, โพล้ง กล้าง เซง ซี บี่ซุ้ดี๊ โพล้ง ไซดอง ล โอ น่าง แฌ้ แบ” 7 ท่อง ฮีราง แน่ฌ๊า แบ ซาโลโม อ ทโล้ นอ, อ เว๊ อ เซิงฆวี๊งซ้ะมึ ฌี้ มะ ดี๊ ไจ้ะเว๊, “อางปฆ้าทาง กแช่ยาเว ล นี้ง แย๊ อี้ง, ลู่ง อ เกล๊าง เอะ ดาเว อ พูแคว๊, พี่ โอ ดี๊ ทโกงซีมองแบ ล แฌ้, เกม๊า เว๊ อ โอ ลู่ง โพล้ง พ้ะดู ล ชื้อ อี้ง อ เช๊คู” 8 ฮีราง โซ๊ง อ ทไคล้ โล้ เอะ ซาโลโม ไจ้ะเว๊, “เท่อ พี่ น โล้ แบ เอะ แย้ นอ, จ ซีงแฌ๊ เย้า, จ ม แม้โพะ อ ไค๊ บี่ซุ้ดี๊ น ท แบซ้ะ แบฆ้ะ ดี๊ ซย๊องซีดา, ดี๊ ซย๊องซ๊า อ กย้อง นอ 9 จ กดูกแซย่ ม แม้ล้างนี่ เซง, ลู่ง เลบาโนง ลี้ ท้อง ลู่ง ปางเล, ดี๊ จ ม ต้างทาง-อ้ะ ท๊อง คู, ม๊า เฌ๊ แยว้ล้าง ท้อง ลู่ง ทล่าง พี่ น อางกีล้างนี่-อ้ะ นอ, ดี๊ จ ม เกม๊า อ ซื๊งเว๊ซีง แกวล้าง ท๊อง พี่ นอ, เกม๊า น เฌ๊ แม้นี่-อ้ะ, ดี๊ เกม๊า น โซ๊ง ทอางทโอ้ เอะ แย้, ลู่ง จ บลาง พ้า นอ อ ฌ่าง, อ อี้ง นอ, เก เท่อ ลู่ง อ แบ จ ซ้ะ เย้า 10 ฮีราง โซ๊ง ซย๊องซีดา, ดี๊ ซย๊องซ๊า เอะ ซาโลโม, บี่ซุ้ดี๊ อ ทแบซ้ะ นอ กุ้เม้ง ล้อ 11 ฌ้อง ซาโลโม เกล๊าง เอะ เว๊ บืง ซาลี คี๊ง ล้าง คี๊ง ไซ ท่าง, ดี๊ ทซู ลู่ง อ ฌี้ นอ เมาะเว๊ ลี่ง ม๊า ลี่ง แย้ เล๊ง, (220, ไปะ) ซาโลโม เกม๊า เอะ ฮีราง อ เท่อ บี่อี้ง กุ้ อ เนง นอ ล้อ 12 กแช่ยาเว เกล๊าง ทโกงซีมองแบ เอะ ซาโลโม, บี่ซุ้ดี๊ อ เอิ้งล้าง เว้ เอะ เว๊ นอ, ฮีราง ดี๊ ซาโลโม โอ ดี๊ ทฆู๊งทพุ้ โละซ้ะ, ดี๊ อ ซื๊งเว๊ คี๊ง แฌ้ อี้ง แม้ ทเอิ้งล้าง โละซ้ะ 13 กจุ้แฆว้ ซาโลโม กุ้นี่ โพล้ง แม้ เท่อ แบฆ้ะ ดี๊ ไต้ทางโก๊ทางเท่อ, เฆ้ง ค่าง อีซลาเอง พ้า นอ, อ แฌ้ ซ๊า ไซ 14 ดี๊ อ เว๊ เจ่ทาง โพล้ง ลแพ นอ, ลี้ ลู่ง เลบาโนง พ้า, ม๊า เว๊ เปลง โละอซ้ะ อ ล่าง ล พ๊าๆ, ลู่ง ล แล้ๆ, อ ฌ่าง นอ อ แฌ้ ล ไซ, อ ซื๊งเว๊ซีง ม โอ ลู่ง เลบาโนง พ้า ล แล้, โอ ลู่ง เฌง คี๊ง แล้, ดี๊ อาโดนีราง นอ, เก โพล้ง ยู่แคว่ โพล้ง แม้ เท่อ แบฆ้ะ ดี๊ ทฆ๊า ทไชะ 15 ซาโลโม อ โพล้ง พี่ อ โชะ เท่อ ฆ๊า เลาพะ นอ, โอ เนว๊ ไซ แฌ้, ดี๊ โพล้ง อ จูง ซี แพล้ กีง โล่ง ลู่ง ทแพ้ล้อง นอ, โอ โฆะ ไซ แฌ้ 16 แอเละ อ อี้ง ได้ะ นอ, ซาโลโม อ กดูกแซย่ ลู่ง อ ดู ทึ นอ, โอ ซ๊า ม๊า ซ๊า แย้ แฌ้, เก โพล้ง ยู่แคว่ ทไพ้ะทแม้, ดี๊ เก ทอคูอแน่ ยู่แคว่ โพล้งเฌงพูฆ๊างพู พี่ อ แม้ เท่อ นอ 17 กจุ้แฆว้ อางแบเลา เว๊, ดี๊ อ ซื๊งเว๊ซีง แพล้ทางนี่ โล่ง พ้ะดู ลู่ง อ ฆวี้ แค้, บี่ซุ้ ม ช๊างล้าง ทล่างโอ นอ อ เทิง ดี๊ โล่ง, พี่ อ แบ ทไต้-อ้ะ เย้า นอ 18 ทบี่นอ, ซาโลโม อ โพล้ง ไต้ทาง เท่อ, ฮีราง อ โพล้ง ไต้ทาง เท่อ, ดี๊ โพล้ง เกบาง นอ แด้เว้ เตะ เว้ เซง ดี๊ โล่ง, บี่ซุ้ ม ไต้ทางนี่ ทล่างโอ นอ ล้อ |
Pwo Karen Bible (Thailand) © Thailand Bible Society, 2016.
Thailand Bible Society