1​ทกวิ้ไน 20 - Northern Pwo Karen Thai Bible

ดาเว แม้นี่ ก้ะ เว่ง ร้ะบา

¹ ลู่ง เซง แล ดุ้ทาง แค๊, พี่ กเย่ กจุ้แฆว้ ไจทาง ดี๊ ซึ้พูมู๊ง ลี้ ดึ้ซึ้ เท่อ นอ, โยอะ ลี้ฌ้า ซึ้พูมู๊ง ลี้ แม้เฌ๊ฌ้อง โพล้ง อางโมง อ ที๊งล่างค่างพ้า, ดี๊ เฌ๊ พ้องวะทะ เว่ง ร้ะบา, แบเด้าะ ดาเว นอ โอ ลู่ง เยรูซเลง พ้า ดี๊ โยอะ นอ ดึ้ซึ้ เว่ง ร้ะบา, ดี๊ แม้ ล้างเคลิ่งไฆวะ เว่ง นอ เฆาะ

² ดี๊ ดาเว เบ้าะล้างไฆวะ อ ซื๊งเว๊ซีง อ กจุ้แฆว้ นอ อ คูคล้าง ลู่ง อ คู ล้อง ดี๊ แด เว๊ คูคล้าง นอ โอ ดี๊ ท๊อง, ฆ๊า เมาะ ซ๊า ชี๊ง ลี่ง กีโล, โอ ดี๊ ทแมล่ ลู่ง อ ฆวี้ แค้, ดี๊ แบ ทคลึทาง-อ้ะ ลู่ง ดาเว อ คู ล้อง, ดี๊ อ เว๊ เฌ๊ไท้ โชะ เท่อ พี่ อ ลู่นี่ก้ะ เว๊ เว่ง พ้า นอ แอฌ้อง

³ อ เว๊ ไจทางฌ้า โพล้งเฌงพูฆ๊างพู, พี่ อ โอ เว่ง พ้า นอ, ดี๊ ต๊างทาง อ ซื๊งเว๊ เกม๊า แม้ เท่อ ฆ๊า โอ ดี๊ ท้ะลว้ะ, ไละจเลง, ดี๊ แกว้, ดี๊ ดาเว แม้ เว๊ บี่อี้ง ดี๊ โพล้ง อางโมง อ เว่ง นอ เลาพะ, ฌ้อง ดาเว ดี๊ โพล้งเฌงพูฆ๊างพู นอ เฌ๊ไท้ ลู่ง เยรูซเลง พ้า

ดึ้ซึ้ โละซ้ะ ดี๊ โพล้ง ฟีลีเตีย

⁴ โอ ลู่ง ไค๊ ทดึ้ซึ้ โอทาง ไท้ ดี๊ โพล้ง ฟีลีเตีย ลู่ง เว่ง เกเซอ พ้า, ฌ้อง ซิ้เบไค โพล้ง ฮูชา อ ชื้อ ล ดอง นอ, แม้ซี๊ง ซิ้ไป พี่ อ เก พี๊งโดงแค้ อ ชื้อ นอ, ดี๊ โพล้ง ฟีลีเตีย นอ แบ ทแม้น้า-อ้ะ

⁵ ฌ้อง ทดึ้ซึ้ โละซ้ะ ดี๊ ฟีลีเตีย เด้าะ, ยาอี อ พู เมะเว๊ เองฮานาง นอ, แม้ซี๊ง ลามี พี่ เก โกลีอ้ะ โพล้ง กะทา ล แฌ้ นอ อ พื่ง, โกลีอ้ะ ล แฌ้ อี้ง นอ, อ พ้าง บ้อง นอ ดู ที๊ซุ้ดี๊ ฆ้องไท้ะ

⁶ ทดึ้ซึ้ โอทาง ลู่ง เว่ง กะทา พ้า เด้าะ, โพล้ง แคว๊ โอ ล แฌ้ อเค่งอฌ้าง พ้ะดู พ้ะโท๊, อ จูงโน้ง โอ ลแพ้ ฆู๊ง บ้อง, คางโน้ง โอ ลแพ้ ฆู๊ง บ้อง, เลาพะ โอ คี๊ง ชี๊ง ลี่ง บ้อง, อ เว๊ เก โพล้ง เรฟาอีง อชื้ออชะ ปะ

⁷ พี่ อ เว๊ อางแท้นี่ โพล้ง อีซลาเอง นอ, ชีเมอี ดาเว อ พื่งแคว๊ อ พู, เมะเว๊ โยนาทาง นอ แม้ซี๊ง เว๊ เฆาะ

⁸ โพล้ง ลแพ อี้ง นอ, เฌ๊นี่ ดี๊ โพล้ง เรฟาอีง ลู่ง กะทา พ้า, ดี๊ อ ซื๊งเว๊ ล้างเทะเค้า ซี๊ง ดี๊ ดาเว อ จูง, ดี๊ อ กดูกแซย่ อ จูง