Noo Mian 25 - Noo Mian 1748

CAB. XXV.

¹ Eisht bee reeriaght niau er ny holaghey gys jeih moidynyn, ghow ny lampyn oc, as hie magh quail y dooinney‐poost.

² As va queg jeu creeney as queg ommijagh.

³ Hug adsyn va ommijagh lieu ny lampyn oc, agh cha dug ad lieu ooil mâroo.

⁴ Agh hug y vooinjer chreeney lieu ooil ayns ny siyn oc marish nyn lampyn.

⁵ Choud as va’d feeau er y dooinney‐poost, huit ad ooilley er saveenagh as cadley.

⁶ As ec main‐uy va eam er ny choyrt, Cur‐my‐ner ta’n dooinney‐poost cheet, gow‐jee magh ny whail.

⁷ Eisht dirree ooilley ny moidynyn shen, as hooar ad aarloo nyn lampyn.

⁸ As doort y vooinjer ommijagh roosyn va creeney, Cur‐jee dooinyn jeh’n ooil eauish, son ta ny lampyn ain goll ass.

⁹ Agh dreggyr y vooinjer chreeney, gra, Cha jean, er aggle nagh bee dy liooar ain dooin hene as diuish neesht, te ny share diu roie dys y vooinjer ta creck, as kionnaghey er nyn son hene.

¹⁰ As choud as va’d goll dy chionnaghey, haink y dooinney‐poost, as hie yn vooinjer va aarloo stiagh marish gys y vannish, as va’n dorrys jeiht.

¹¹ Ny lurg shen haink ny moidynyn elley, gra, Hiarn, Hiarn, fosle dooin.

¹² Agh dreggyr eshyn as doort e, Dy firrinagh ta mee gra riu, nagh voddym goall riu.

¹³ Bee‐jee er nyn dwoai er‐y‐fa shen, son cha vel fys eu er y laa ny’n oor nee yn Mac dooinney cheet.

¹⁴ ¶ Son te marragh dooinney va goll er troailt gys cheer foddey, deie er e harvaantyn as livrey daue e chooid:

¹⁵ As da fer jeu, hug e queg talentyn, da fer elley jees, as da fer elley annane, da dy chooilley ghooinney lurg roshtin e hushtey, as chelleeragh ghow e e yurnah.

¹⁶ Eishtagh hie yn fer v’er gheddyn ny queg talentyn, as ren e dellal lieu, as chosne e queg talentyn elley.

¹⁷ As myr shen eshyn v’er gheddyn jees, chosne eshyn myrgeddyn jees elley.

¹⁸ Agh y fer v’er gheddyn annane, hie e as chley e ayns y talloo, as dollee e argid e hiarn.

¹⁹ Agh lurg foddey dy earish haink chiarn ny shiarvaantyn shen, as ren e coontey roo.

²⁰ As haink eshyn v’er gheddyn ny queg talentyn as hug e lesh queg talentyn elley, gra, Hiarn, livrey uss doos queg talentyn; cur‐my‐ner, ta mee er chosney queg talentyn elley mâroo.

²¹ Doort e Hiarn rish, Smie t’ow er nianoo, harvaant vie as firrinagh, t’ow er ny ve firrinagh ayns y veggan, livreyms moarane gys dty churrym; gow stiagh gys boggey dty hiarn.

²² Haink eshyn myrgeddyn v’er gheddyn yn daa halent, as doort e, Hiarn, livrey uss doos daa halent: cur‐my‐ner, ta mee er chosney daa halent elley mâroo.

²³ Doort e Hiarn rish, Smie t’ow er nianoo, harvaant vie as firrinagh, t’ow er ny ve firrinagh ayns y veggan, livreyms moarane gys dty churrym: gow stiagh gys boggey dty hiarn.

²⁴ Agh y fer v’er gheddyn yn yn talent, haink e as doort e, Hiarn, va fys ayms dy nee dooinney creoi oo; buinn raad nagh ren oo cuirr, as chaglym raad nagh ren oo skeylley:

²⁵ As ghow mee aggle, as hie mee as dollee mee dty halent ayns y talloo; cur‐my‐ner, shen y raad ta dty chooid.

²⁶ Dreggyr e hiarn, as doort e rish, Harvaant vee‐chairagh as niau‐harroogh, va fys ayds, dy row mish buinn raad nagh ren mee cuirr, as chaglym raad nagh ren mee skeylley.

²⁷ Lishagh oo er‐y‐fa shen ve’r chur my argid dauesyn ta janoo vondeish liorish argid y yeasaght, as eishtagh ec y cheet aym, oddin ve’r gheddyn my chooid hene lesh bishaghey.

²⁸ Gow‐jee er‐y‐fa shen yn talent veih, as cur‐jee eh dasyn ta jeih talentyn echey.

²⁹ Son da dy chooilley annane ta echey, vees er ny choyrt; as bee towse smoo echey: agh veihsyn nagh vel echey, vees er ny ghoall ersooyl shen ny ta echey.

³⁰ As tilg‐jee yn chiarvaant niau‐harroogh ayns y dorraghys sodjey mooie, ayns shen vees keaney as snaggeraght feeacklyn.

³¹ ¶ Tra hig yn Mac dooinney ayns e ghloyr, as ooilley e ainlyn casherick marish, shen y tra hoiys e er stoyl‐reeoil e ghloyr.

³² As kiongoyrt rish vees dy chooilley ashoon er nyn jaglym, as scarree e ad veih my chielley, myr ta bochilley cur scarrey eddyr e chirree as ny goair.

³³ As soiee e ny kirree er e laue yesh, agh ny goair er e laue chiare.

³⁴ Eisht jir y Ree roosyn er e laue yesh, Tar‐jee, my chloan bannit jeh my Ayr, gow‐jee myr eiraght yn reeriaght ta kiarit er nyn son eu, er dy hoshiaght y teihll.

³⁵ Son va mee accryssagh, as hug shiu beaghey dou: va mee paagh as hug shiu jough dou: Va mee my yoarree, as ghow shiu stiagh mee:

³⁶ Rooisht as ren shiu my choamrey: va mee ching, as haink shiu dy my yeaghyn: va mee ayns pryssoon, as haink shiu hym.

³⁷ Eishtagh nee yn chloan chairagh e y reggyrt, gra, Hiarn, cooin honnick shin oo accryssagh, as dy dug shinyn beaghey dhyt? ny paagh as dy dug shin jough dhyt?

³⁸ Cooin honnick shin oo dty yoarree, as dy ghow shin stiagh oo? ny rooisht, as dy ren shin dty choamrey?

³⁹ Ny cooin honnick shin oo ching, ny ayns pryssoon, as dy daink shin dy dty yeaghyn?

⁴⁰ As freggyree yn Ree, as jir e roo, Dy firrinagh ta mee gra riu, ayns wheesh as dy vel shiu er nianoo eh son y fer sloo jeu shoh my vraaraghyn, ta shiu er nianoo eh er my hons.

⁴¹ Eishtagh jir e roosyn myrgeddyn er y laue chiare, Immee‐jee voym chloan chursit gys yn aile dy bragh farraghtyn, ta kiarit son y drogh spyrryd as e ainlyn.

⁴² Son va mee accryssagh, as cha dug shiu beaghey dou: Va mee paagh, as cha dug shiu jough dou.

⁴³ Va mee my yoarree, as cha ghow shiu stiagh mee: rooisht, as cha ren shiu my choamrey: ching as ayns pryssoon, as cha daink shiu dy my yeaghyn.

⁴⁴ Eisht nee adsyn myrgeddyn e y reggyrt, gra, Hiarn, cooin honnick shin oo accryssagh, ny paagh, ny dty yoarree, ny rooisht, ny ching, ny ayns pryssoon, as nagh chooin shin liat?

⁴⁵ Eisht nee e nyn vreggyrt ad, gra, Dy firrinagh ta mee gra riu, ayns wheesh as nagh ren shiu eh son annane jeh’n vooinjer sloo jeu shoh, cha ren shiu eh er my hons.

⁴⁶ As hed ad shoh ersooyl gys y kerraghey dy bragh farraghtyn; agh y chloan chairagh gys y vea veayn.