Noo Mian 22 - Noo Mian 1748

CAB. XXII.

¹ As dreggyr Yeesey as loar e roo reesht liorish coraaghyn dorraghey, gra;

² Ta reeriaght niau er ny holaghey gys ree dy row ren bannish son e vac,

³ As hug e magh e harvaantyn dy emagh orroosyn va cuirt gys y vannish, as cha row ad aignagh dy heet.

⁴ Reeshtagh hug e magh shiarvaantyn elley, gra, Abbyr‐jee roosyn ta cuirt, Cur‐my‐ner ta mee er naarlaghey my yinnair: ta my ghew as my veiyn beiht marroo, as dy chooilley nee aarloo; tar‐jee gys y vannish.

⁵ Agh hoie adsyn beg jeh, as hie ad rumboo, fer gys e valley as fer elley gys y dellal echey:

⁶ As ghow yn chooid elley ny shiarvaantyn echey, as ghell ad dy roonagh roo, as var ad ad.

⁷ Agh tra cheayl y Ree jeh, ve jymmoosagh: as hug e magh e heshaghtyn‐caggee, as stroie e ny dunveryn shen, as losht e yn ard‐valley oc.

⁸ Eishtagh doort e rish e harvaantyn, Ta’n vannish aarloo, agh y vooinjer va cuirt, cha row ad feeu.

⁹ Gow‐jee magh er‐y‐fa shen gys ny raadjin moarey, as chooilleen as yiow shiu, cuir‐jee gys y vannish.

¹⁰ As hie ny shiarvaantyn shen magh gys ny raadjin moarey, as ren ad chooilleen as haink nyn raad y haglym cooidjagh, chammah sie as mie, as va thie ny banshey er ny lieeney lesh goaldee.

¹¹ ¶ As tra haink y Ree stiagh dy akin ny goaldee, honnick e dooinney ayns shen nagh row garmad‐poost er.

¹² As doort e rish, Charrey, kys haink uss stiagh ayns shoh, fegooish garmad‐poost? as cha row fockle echey dy ghra.

¹³ Eisht doort y Ree rish ny shiarvaantyn, Kiangle‐jee e laue as cass, as gow‐jee e ersooyl, as tilg‐jee e ayns y dorraghys sodjey mooie: ayns shen vees keaney as snaggeraght feeacklyn.

¹⁴ Son ta ymmodee er nyn eam, agh beggan er nyn reih.

¹⁵ ¶ Eishtagh hie ny Phariseyn, as hug ad nyn goyrle dy cheilley, kys oddagh [ad] e y hayrn ayns rybbey, liorish e ocklyn.

¹⁶ As hug ad magh huggey shiartance jeusyn va’d hene er nynsaghey, marish ny Herodianee, gra, Vainshter, ta fys ain dy vel oo firrinagh, as dy vel oo gynsaghey raad Yee ayns firrinys, cha‐moo t’ow ayns imnea roish dooinney erbee: son cha vel oo soiaghey jeh persoon deney.

¹⁷ Insh dooin er‐y‐fa shen, cre t’ow dy smooinaght, Vel eh lowal keesh y choyrt da Cesar, mannagh vel?

¹⁸ Agh dennee Yeesey yn olkys oc, as doort e, Cre’n fa ta shiu dy my violaghey, chrauee foalsey?

¹⁹ Jeagh‐jee dou argid y cheesh, as hug ad lieu huggey ping.

²⁰ As doort e roo, Quoi gys ta’n jalloo as y scrieu shoh bennalt?

²¹ Doort adsyn rish, gys Cesar. Eishtagh doort e roo, Eeck‐jee er‐y‐fa shen da Cesar, ny reddyn ta lesh Cesar: as da Jee ny reddyn ta lesh Jee.

²² Tra cheayl ad shoh, ghow ad yyndyss, as daag ad e, as hie ad rumboo.

²³ ¶ Yn laa keddyn haink huggey ny Sadduceyn, ta gra nagh vel irree-seose-reesht dy ve ayn, as dênee ad jeh,

²⁴ Gra, Vainshter, ta Moses er ghra, my ta dooinney geddyn baase, fegooish cloan, dy vel e vraar dy phoosey’n ven echey, as dy hroggal seose sluight gys e vraar.

²⁵ Nish boyn dooinyn shiaght braaraghyn, as hooar y chied vraar, tra ve er phoosey ben, baase, fegooish cloan, as daag e e ven gys yn nah vraar.

²⁶ As hooar yn nah vraar myrgeddyn baase as y tress gys y chiaghtoo.

²⁷ As er jerrey ooilley hooar y ven baase myrgeddyn.

²⁸ Shen‐y‐fa ec yn irree-reesht, quoi jeh’n chiaght vees ee echey son ben, son vie son ben daue ooilley.

²⁹ Dreggyr Yeesey as doort e roo, Ta shiu fo marranys, as cha vel toiggal eu jeh goo, ny jeh pooar Yee.

³⁰ Son ec yn irree-reesht, cha vel ad poosey ny er nyn goyrt ayns poosey; agh ta’d myr ainlyn Yee t’ayns niau.

³¹ Agh my‐chione irree-seose-reesht ny merriu, nagh vel shiu er lhaih shen va loarit riu liorish Jee, gra,

³² Mish Jee Abraham, as Jee Isaac, as Jee Yacob? cha vel Jee ny Yee jeh ny merriu, agh jeh ny bio.

³³ As tra cheayl yn pobble shoh, ghow ad yyndyss jeh’n ynsaghey echey.

³⁴ ¶ Agh tra va ny Phariseyn er chlashtyn, dy row e er chur er ny Sadduceyn ve nyn dost, va’d er nyn jaglym cooidjagh.

³⁵ As denee fer jeu va ny er‐ynsee jeh’n leigh, question jeh, er chee y violaghey e, gra,

³⁶ Vainshter, cre yn ard anney ayns y leigh?

³⁷ Doort Yeesey rish, Ver oo graih da’n Chiarn dty Yee, lesh ooilley dty chree, as lesh ooilley dt’annym, as lesh ooilley dt’aigney.

³⁸ Shoh yn chied as yn ard anney.

³⁹ As ta’n nah anney casley rish, Ver oo graih da dty naboo, myr dhyt hene.

⁴⁰ Yn daa anney shoh bun y leigh as ny phaderyn.

⁴¹ ¶ Choud as va ny Phariseyn er nyn jaglym cooidjagh, dênee Yeesey jeu,

⁴² Gra, Cre ta shiu dy smooinaght jeh Creest? quoi da mac e? Doort adsyn rish, Mac Ghavid.

⁴³ Doort eshyn roo, Kys eishtagh dy vel David liorish y spyrryd genmys e ny Hiarn, gra,

⁴⁴ Doort y Chiarn rish my Hiarn’s, Soie uss er my laue yesh, derrey verrym dty noidjyn son stoyl fo dty chassyn.

⁴⁵ My ta David eisht genmys e ny Hiarn, kys te yn mac echey?

⁴⁶ As cha row dooinney erbee able fockle dy ansoor y chur da, cha‐moo by loys da dooinney erbee (veih’n laa shen magh) question erbee sodjey y enaght jeh.