Noo Mian 20 - Noo Mian 1748

CAB. XX.

¹ Son ta reeriaght niau casley rish dooinney va ny ar‐thie, hie magh dy moghey, dy ailley labreeyn son e gharey‐feeney.

² As tra ve er chordail rish ny labreeyn son ping ’sy laa, hug e ad stiagh ayns e gharey‐feeney.

³ As hie e magh my‐geart y tress oor, as honnick e feallagh elley ny shassoo nyn daaue ayns ynnyd y vargee,

⁴ As doort e roo, Gow‐jee shiuish myrgeddyn stiagh ayns y gharey‐feeney, as verryms diu cre‐erbee ta cairagh. As hie ad rumboo.

⁵ Reeshtagh hie e magh my‐geart y cheyoo as yn nuyoo oor, as ren e er yn aght keddyn.

⁶ As my‐geart yn yn oor jeig, hie e magh, as hooar e feallagh elley ny shassoo nyn daaue, as doort e roo, Cre’n fa ta shiu nyn shassoo ayns shoh fey laa nyn daaue?

⁷ Doort adsyn rish, Er‐yn‐oyr nagh vel dooinney erbee er vailley shin. Doort eshyn roo, Gow‐jee shiuish myrgeddyn stiagh ayns y gharey‐feeney, as yiow shiu cre‐erbee ta cairagh.

⁸ Myr shen tra va’n fastyr er jeet, doort chiarn y gharey‐feeney rish y stioort echey, Eie er ny labreeyn, as cur daue nyn vail, goall toshiaght veih yn vooinjer stierree gys y chied eallagh.

⁹ As tra haink feallagh yn yn oor jeig, hooar ad dy chooilley ghooinney ping.

¹⁰ Agh tra haink y chied eallagh, heill ad dy voghe ad ny smoo, as hooar adsyn myrgeddyn dy chooilley ghooinney ping.

¹¹ As tra va’d er ghoal eh, loar ad dy jymmoosagh rish yn far‐thie,

¹² Gra, Cha vel yn vooinjer stierree shoh er nobbragh agh yn oor, as t’ow er nianoo ad corrym rooinyn, t’er nymmyrkey errey as chiass y laa.

¹³ Agh dreggyr eshyn fer jeu, gra, Heshey vie, cha vel mish janoo aggair dhyt: Nagh choard uss rhyms son ping?

¹⁴ Trog shen ny ta liat, as immee royd: m’aigney’s eh dy choyrt da’n fer stierree shoh; myr ta mee er chur dhyts.

¹⁵ Nagh vel eh lowal dou, dy yanoo cre saillym rish my chooid hene? Vel dty hooyls olk, er‐y‐fa dy vel mish mie?

¹⁶ Myr shen bee adsyn ta er jerrey hoshiaght, as adsyn ta hoshiaght er jerrey: son ta ymmodee er nyn eam, agh beggan er nyn reih.

¹⁷ ¶ As myr va Yeesey goll seose gys Jerusalem, ghow e yn daa ostyl yeig dy liattee er y raad, as doort e roo,

¹⁸ Cur‐my‐ner ta shin goll seose gys Jerusalem, as bee mac y dooinney er ny vrah gys ny ard‐saggyrtyn, as gys ny scruderyn, as deyree ad e gy baase,

¹⁹ As livrey‐ee ad e hucsyn jeh ny ashoonyn quaagh, dy chraidey mish, as dy chustey, as dy chrossey e: as er y tress laa nee e girree reesht.

²⁰ ¶ Eishtagh haink huggey moir cloan Zebedee, as e meck mâree, cur ooashley da, as shirrey aghin er.

²¹ As doort e ree, Cre bailt? Doort ish rish, Lhow da my ghaa vac dy hoie, yn derrey yeh er dty laue yesh, as y jeh elley er dty laue chiare ayns dty reeriaght.

²² Agh dreggyr Yeesey as doort e, Cha s’eu cre ta shiu dy yearree. Vel shiu able giu jeh’n cappan ta mish giu jeh, as v’er nyn mashtey lesh y bashtey ta mish bashtit lesh? Doort adsyn rish, Ta shin able.

²³ As doort e roo, Ivee shiu dy jarroo jeh my chappan, as bee shiu er nyn mashtey lesh y bashtey ta mish bashtit lesh: agh dy hoie er my laue yesh as er my laue chiare, cha vel shen liams dy choyrt, agh ny lomarcan dauesyn, er nyn son te kiaddit liorish my Ayr.

²⁴ As tra cheayl yn jeih shoh, va’d feer jymmoosagh rish y daa vraar.

²⁵ Agh deie Yeesey orroo huggey, as doort e, Ta fys eu dy vel prinsyn ny ashoonyn quaagh gymmyrkey reill harrystoo, as ta ny deney moarey gymmyrkey torrity nyn mastey.

²⁶ Agh cha bee eh myr shen nyn mastey eauish: agh quoi‐erbee eavish ballish ve moar, lig e ve ry hoi shirveish erriu.

²⁷ As quoi‐erbee syrjey ballish y ve nyn mast eu, lig e ve yn chiarvaant eu.

²⁸ Myr nagh daink yn mac dooinney dy ve shirveishit, agh dy hirveish, as dy chur e vioys ny liassaghey son ymmodee.

²⁹ As tra va’d er nimmeeaght veih Jericho, deyr earrooyn moarey dy leih er.

³⁰ ¶ As cur‐my‐ner, va daa ghooinney doal nyn soie rish liattee yn raad, as tra cheayl ad dy row Yeesey goll shiaghey, deie ad, gra, Jean myghin orrin, O Hiarn, vac Ghavid.

³¹ As va’n pobble cur oghsan daue, dy voddagh ad nyn jengey chummal: agh deie adsyn wheesh shen smoo, gra, Jean myghin orrin, O Hiarn, vac Ghavid.

³² As hass Yeesey, as deie e orroo, as doort e, Cre balliu mee dy yanoo er nyn son eu?

³³ Doort adsyn rish, Hiarn, dy vod ny sooyllyn ain v’er nyn vosley.

³⁴ Myr shen va chymmey ec Yeesey orroo, as venn e rish ny sooyllyn oc: as chelleeragh hooar ny sooyllyn oc nyn soilshey, as deyr ad er.