Noo Mian 15 - Noo Mian 1748

CAB. XV.

¹ Eishtagh haink gys Yeesey scruderyn as Phariseyn, veih Jerusalem, gra,

² Cre’n fa tar adsyn ta sheer geyrt orts brishey oardaghyn y chanstyr? Son cha vel ad niee nyn lauyn, tra ta’d gee arran.

³ Agh dreggyr eshyn, as doort e roo, Cre’n oyr ta shiuish brishey sarey Yee liorish ny oardaghyn eu?

⁴ Son hug Jee sarey, gra, Cur arrym da dt’ayr as da dty voir: as eshyn ta gueeaghyn da ayr as moir, lig e ve kerrit lesh baase.

⁵ Agh ta shiuish gra, Quoi-erbee jir rish ayr ny moir, Cre‐erbee ta mish dy hebbal da Jee, bee vondeish ayds liorish,

⁶ As nagh lias da cooney choyrt da e ayr ny e voir, Ta shiu myr shoh janoo sarey Yee gyn vree, liorish ny oardaghyn eu.

⁷ Chrauee‐foalsey, smie ren Esaias faishnagh jiu, gra,

⁸ Ta’n pobble shoh tayrn er‐gerrey dou lesh nyn meeal, as cur ooashley dou lesh nyn meyllyn: agh ta’n cree oc foddey voym.

⁹ Agh ayns fardail ta’d cur ooashley dou, gynsaghey son y goo ayms oardaghyn deney.

¹⁰ ¶ As deie e er y pobble, as doort e roo, Easht‐jee as toig‐jee.

¹¹ Cha nee shen ta goll stiagh ayns y veeal, ta janoo dooinney niau-ghlen; agh ny ta cheet magh ass y veeal, shen ta janoo dooinney niau-ghlen.

¹² Eishtagh haink huggey yn vooinjer va sheer marish, as doort ad rish, Nagh vel fys ayd dy row ny Phariseyn jymmoosagh, tra cheayl ad y raa shoh?

¹³ Agh dreggyr eshyn, as doort e, Bee dy chooilley villey, nagh vel my Ayr flaunyssagh er ny hoiaghey, er ny ghoal ass ny frauyn.

¹⁴ Lig‐jee daue: she leedeilee doal ta kione y vooinjer ghoal ad. As my ta’n doal shooyl kione y doal, tuittee ad ny neesht ayns y jeeg.

¹⁵ Eishtagh dreggyr Peddyr, as doort e rish, Soilshee dooinyn yn coraa dorraghey shoh.

¹⁶ Doort Yeesey rish, Vel shiuish neesht foast fegooish tushtey?

¹⁷ Nagh vel shiu foast toiggal, cre‐erbee ta goit stiagh ayns y veeal, dy vel eh goll sheese ayns y volg, as goll magh trooid y chorp.

¹⁸ Agh ta ny reddyn ta cheet magh ass y veeal, cheet veih’n chree, as ta’d shen janoo dooinney niau‐ghlen.

¹⁹ Son magh veih’n chree ta cheet drogh smooinaghtyn, dunverys, brishey‐poosey, maarderys, maarlys, fenish foalsey, goan mollaghtagh.

²⁰ Ad shoh ny reddyn ta sollaghey dooinney; agh dy ee lesh lauyn nagh vel neeit, cha vel shen janoo dooinney niau‐ghlen.

²¹ ¶ Eishtagh hie Yeesey veih shen, as jimmee e gys ardjyn Tyre as Sidon.

²² As cur‐my‐ner va ben va ny Canaanite haink magh ass ny ardjyn shen, gemagh as gra, Jean myghin orrym, O Hiarn, vac Ghavid; smoar ta m’inneen er ny torchaghey lesh drogh spyrryd.

²³ Agh cha dug e fockle dy ansoor jee. As haink y vooinjer va sheer geyrt er, as ghuee ad er, gra, Lig y raad jee, son tiee gemagh nyn nei ain.

²⁴ Agh dreggyr eshyn, as doort e, Cha vel mish er my choyrt agh gys kirree cailjey thie Israel.

²⁵ Eishtagh haink ee as hug ee ooashley da, gra, Hiarn, cooin liam.

²⁶ Agh dreggyr e, as doort e, Cha vel eh cooie arran y chloan y ghoal, as y hilgey gys moddee.

²⁷ Spheer shen, doort ish, Hiarn: foast ta ny moddee gee jeh’n brooilliagh, ta tuittym jeh board nyn mainshter.

²⁸ Er shen dansoor Yeesey as doort e ree, O ven, moar ta dty chredjue: yn aghin t’ow dy yearree dy row ayd. As va’n inneen eck er ny leihys veih’n oor keddyn.

²⁹ As jimmee Yeesey veih shen, as haink e er‐gerrey da faarkey Galilee, as hie e seose er slieau as hoie e ayns shen.

³⁰ As haink earrooyn moarey dy leih huggey, as nyn mast oc va croobee, doal, balloo, baccee, as ymmodee elley, as hug ad ad nyn lhie ec cassyn Yeesey, as ren e ad y leihys:

³¹ Ayns wheesh as dy ghow ooilley’n pobble yyndyss, tra honnick ad ny balloo loart, ny baccee slane, ny croobee shooyl, as ny doal fakin, as hug ad gloyr da Jee Israel:

³² ¶ Eishtagh deie Yeesey er y vooinjer hene va kinjagh marish, as doort e, Ta chymmey aym er y pobble, er‐yn‐oyr dy vel ad er ny ve mârym nish tree laa, as cha vel veg y vee oc, as cha derrym ad ersooyl nyn drostey, er aggle dy der ad naardey er y raad.

³³ Doort adsyn va sheer geyrt er, rish, Cre woish oddys mad wheesh dy arran y gheddyn ayns yn aasagh, as nee leid y chaglym moar shoh dy leih y yanoo magh?

³⁴ Doort Yeesey roo, Cre woad bwilleen t’eu? Doort adsyn, shiaght as beggan dy eeastyn beggey.

³⁵ As doardee e da’n pobble soie sheese er y talloo.

³⁶ As ghow e ny shiaght bwilleenyn as ny eeastyn, as hug e booise, as vrish e, as hug e ad dauesyn va sheer geyrt er, as hug adsyn ad da’n pobble.

³⁷ As ren ad ooilley gee, as va’d er nyn nianoo magh, as hrog ad jeh’n fooillagh va er‐mayrn laane shiaght baskettyn.

³⁸ As var adsyn ren gee kiare thousane dooinney, cheu‐mooie jeh mraane as cloan.

³⁹ As hug e ersooyl yn pobble as ghow e luingys, as haink e gys ardjyn Magdala.