Noo Mian 14 - Noo Mian 1748

CAB. XIV.

¹ Ec y tra shen, cheayl Herod yn Tetrarch jeh Goo Yeesey,

² As doort e rish e harvaantyn, Shoh Ean Bashtey; te er nirree veih ny merriu, as er‐yn‐oyr shen ta mirillyn er nyn obbraghey liorish.

³ ¶ Son va Herod er ghoal Ean, as er chiangley, as er hilgey e ayns pryssoon, kyndagh rish Herodias, ben e vraar Philip.

⁴ Son va Ean er ghra rish, Cha vel eh lowit dhyt, ee y ve ayd son ben.

⁵ As tra ballish ve’r choyrt e gy baase, ve ayns aggle roish y pobble, er‐y‐fa dy row ad dy ghoal e son phadeyr.

⁶ Agh er y laa v’er ny realley corrym rish y laa ruggyr Herod, ghonse inneen Herodias ayns yn eanish oc as ghow Herod laane boggey jee.

⁷ As yioal e lesh loo, dy jinnagh e jee red erbee dy shirragh ee.

⁸ As doort ish, myr va e moir er chur roie, Cur dou ayns shoh kione Ean Bashtey er claare.

⁹ As huit y Ree ayns trimshey: ny yei er coontey yn loo, as y vooinjer v’ec gien marish, hug e sarey, eh dy ve er ny choyrt jee.

¹⁰ As hug e fys, yn kione dy ve’r ny ghoal jeh Ean ayns y phryssoon.

¹¹ As va’n kione er ny choyrt er claare as livreit dys y ven aeg, as hug ish lieie eh gys e moir.

¹² As haink y vooinjer va sheer geyrt er, as hrog ad y corp, as doanluck ad eh, as hie ad as dinsh ad da Yeesey.

¹³ ¶ Tra cheayl Yeesey jeh, jimmee e veih shen ayns long gys ynnyd‐faasagh er lieh, as tra cheayl y pobble jeh, deiyr ad er rish nyn gosh ass ny ard-valjyn.

¹⁴ As hie Yeesey magh, as honnick e chaglym moar dy leih, as ve er ny veyghey lesh chymmey orroo, as laanee e adsyn va ching.

¹⁵ As tra va’n fastyr ayn, haink huggey adsyn va sheer geyrt er, gra, She boal faasagh shoh, as ta’n tra nish er gholl shiaghey; lig y raad da’n cheshaght, dy vod ad goll rowe gys ny baljyn beggey, as beaghey y chionnaghey daue hene.

¹⁶ Agh doort Yeesey roo, Cha lias daue goll rowe, cur‐jee shiuish bee daue.

¹⁷ As doort ad rish, Cha vel ain ayns shoh agh queg bwilleenyn as daa eeast.

¹⁸ Doort eshyn, Cur‐jee lieu ad ayns shoh hyms.

¹⁹ As hug e sarey da’n pobble dy hoie sheese er y faiyr, as ghow e ny queg bwilleenyn as y daa eeast, as yeagh e seose gys niau, as vannee e, as vrish e as hug e ny bwilleenyn dauesyn va sheer marish, as hug adsyn ad da’n pobble.

²⁰ As ren ad ooilley gee, as va’d er nyn nianoo magh: as hrog ad jeh’n fooillagh daag ad, laane daa vasket jeig.

²¹ As var adsyn v’er nee queg thousane dooinney, cheu‐mooie jeh mraane as cloan.

²² ¶ As chelleeragh hug Yeesey er y vooinjer va sheer geyrt er, luingys y ghoal, as ad dy gholl roish gys y cheu elley, choud as ve cur y pobble ersooyl.

²³ As tra ve er chur yn pobble ersooyl, hie [e] hene er lieh seose er slieau, dy ghoal padjer: as tra va’n fastyr er jeet, ve ayns shen ny lomarcan.

²⁴ Agh va’n long nish ayns main ny marrey eiyrit noon as noal lesh ny tonnyn: son va’n gheay nyn oi oc.

²⁵ As ayns y chiarroo ghoostey jeh’n uy, haink Yeesey huc, shooyl er y cheayn.

²⁶ As tra honnick adsyn va sheer marish e shooyl er y cheayn, va’d seaghnit, gra, She scaan t’ayn, as va’d ayns aggle, as deie ad.

²⁷ Agh chelleeragh loar Yeesey roo, gra, Bee-jee dy yien mie, she mish t’ayn, ny gow‐jee aggle.

²⁸ As dreggyr Peddyr e, gra, Hiarn, My she oo t’ayn, oardee doos cheet hood er yn ushtey.

²⁹ As doort e, Tar. As tra va Peddyr er jeet neose ass y long, hooyl e er yn ushtey, dy heet gys Yeesey.

³⁰ Agh tra dennee e dy row yn gheay lajer, ghow e aggle, as myr ve er‐gerrey dy ve baiht, dyllee e, gra, Hiarn, saue mee.

³¹ As ayns y tullogh heen Yeesey magh e laue, as haar e e, as doort e rish, O ghooinney faase-chredjuagh, cre’n fa v’ow ayns imnea?

³² As tra va’d er gholl seose ayns y long, ghow yn gheay fea.

³³ Eishtagh haink adsyn v’ayns y long, as hug ad ooashley da, gra, Ayns firrinys she mac Yee oo.

³⁴ As tra va’d er gholl harrish, haink ad gys cheer Gennesaret.

³⁵ As tra hoig yn vooinjer va vaghey ayns shen, quoi ve, hug ad fys magh gys ooilley’n cheer my‐geart, as hug ad lieu huggey ooilley adsyn va doghanit.

³⁶ As ghuee ad er, ad ny lomarcan dy vennalt rish oirr e gharmad: as chooilleen as venn rish, va’d er nyn leihys.