Noo Mian 13 - Noo Mian 1748

CAB. XIII.

¹ Yn laa keddyn hie Yeesey magh ass y thie, as hoie e sheese rish oirr ny marrey.

² As va earrooyn moarey dy leih er nyn jaglym cooidjagh huggey, myr shen dy jagh e seose ayns long, as hoie e, as va ooilley’n pobble nyn shassoo er y traie.

³ As loar e ymmodee dy reddyn roo ayns coraaghyn dorraghey, gra, Cur‐my‐ner hie corryder magh dy chuirr.

⁴ As myr ve cuirr, huit part jeh’n rass rish oirr y raad, as haink ny eeanlee as die ad seose eh.

⁵ Huit part ayns ynnydyn claghagh, raad nagh row cooid woar dy ooir echey, as chelleeragh daase eh, er‐y‐fa nagh row divnit tallooin echey.

⁶ As ghow niart ny greiney yn soo ass, as er‐yn‐oyr nagh row eh er ghoal fraue, hie eh naardey.

⁷ As huit part mastey drinyn; as daase ny drinyn seose as hoght ad eh.

⁸ Agh huit cooid elley jeh ayns talloo mie, as dymmyrk eh mess, part keead filley, part three feed filley, as part jeih fillaghyn as feed.

⁹ Eshyn ta cleashyn echey dy chlashtyn, lig e clashtyn.

¹⁰ As haink y vooinjer va sheer geyrt er, as doort ad rish, Cre’n fa t’ow loart roo ayns coraaghyn dorraghey?

¹¹ Dreggyr eshyn as doort e roo, Er‐yn‐oyr dy vel eh er ny choyrt divish folliaghtyn reeriaght niau y hoiggal, agh dauesyn cha vel eh er ny choyrt.

¹² Son quoi‐erbee ta echey, dashyn vees er ny choyrt, as bee towse smoo echey: agh quoi‐erbee nagh vel echey, veihsyn vees shen ny ta echey er ny ghoal ersooyl.

¹³ Shen‐y‐fa ta mee loart roo ayns coraaghyn dorraghey; er‐yn‐oyr fakin, nagh vel ad fakin, as clashtyn nagh vel ad clashtyn, cha‐moo ta’d toiggal.

¹⁴ As ayndoosyn ta cooilleenit phaderys Esaias, ta gra, Liorish clashtyn nee shiu clashtyn, as cha jean shiu toiggal, as fakin, nee shiu fakin, as cha gronnee shiu.

¹⁵ Son ta cree yn pobble shoh er naase roauyr, as ta ny cleashyn oc moal dy chlashtyn, as ny sooyllyn oc, ta’d er neigh, er aggle dy vaikagh ad lesh nyn sooyllyn, as dy glinnagh ad lesh nyn gleashyn, as dy doiggagh ad lesh nyn gree, as dy beagh ad er nyn jyndaa, as dy jinnin ad y leihys.

¹⁶ Agh bannit ta ny sooyllyn eavish, son ta’d fakin, as ny cleashyn eu, son ta’d clashtyn.

¹⁷ Son dy firrinagh ta mee gra riu, dy vel ymmodee phaderyn as deney cairagh er ve aignagh dy akin ny reddyn ta shiuish dy akin, as cha vel ad er nyn vakin ad; as dy chlashtyn ny reddyn ta shiu dy chlashtyn, as cha vel ad er chlashtyn ad.

¹⁸ ¶ Clasht‐jee er‐y‐fa shen coraa dorraghey’n corryder.

¹⁹ Fer erbee dy vel clashtyn goo yn reeriaght, as nagh vel dy hoiggal eh, ta’n drogh er cheet as tayrtyn lesh shen ny va cuirt ayns e chree: shoh e ghow yn rass rish oirr y raad.

²⁰ Agh eshyn ghow yn rass ayns ynnydyn claghagh, yn fer ta clashtyn yn goo, as ayns y tullogh lesh boggey dy ghoall eh:

²¹ Foast cha vel fraue echey ayn hene, agh te cummal rish son tammylt: agh tra ta seaghyn ny tranlaase cheet er, er coontey’n ghoo, chelleeragh ta e chredjue falail.

²² Eshyn myrgeddyn ghow yn rass mastey ny drinyn, yn fer ta clashtyn y goo: as ta kiarrail y teihll shoh as moalteraght berchys plooghey’n goo, as te cheet dy ve niau‐vessoil.

²³ Agh eshyn ghow yn rass ayns talloo mie, yn fer ta clashtyn y goo as dy hoiggal eh, as te tilgey mess as gymmyrkey, part keead filley, part tree feed, as part jeih fillaghyn as feed.

²⁴ ¶ Coraa dorraghey elley loar e roo, gra, Ta reeriaght niau er ny holaghey gys dooinney, chuirr rass mie ayns e vagher:

²⁵ Agh choud as va sleih nyn gadley, haink e noid, as chuirr e coggyl mastey’n churnaght, as jimmee e roish.

²⁶ Agh tra va’n chass er naase, as er gholl my yeish, eisht haink y coggyl rish myrgeddyn.

²⁷ Er shen haink fir‐vooinjerey yn far‐thie, as doort ad rish, Vainshter, nagh chuirr uss rass mie ayns dty vagher? cre woish eisht ta’n coggyl t’ayn?

²⁸ Doort eshyn roo, Noid t’er nianoo shoh. Doort ny fir‐vooinjerey rish, nailt eisht shin dy gholl as dy heigh ass eh?

²⁹ Agh doort eshyn, Ny jean‐jee, er aggle, ayns teigh yn coggyl, dy dayrn shiu yn churnaght ass ny frauyn marish.

³⁰ Lig‐jee daue ny neesht gaase cooidjagh derrey’n fouyr: as ayns earish yn ouyr jirryms rish ny beayneeyn, Chymsee‐jee cooidjagh hoshiaght yn coggyl ayns bunneenyn ry hoi y lostey; agh chaglee‐jee yn churnaght stiagh ayns my hoalt.

³¹ ¶ Coraa dorraghey elley loar e roo, gra, Ta reeriaght niau goll rish greine dy rass mustard, ren dooinney y ghoal as y chuirr ayns e vagher.

³² As ga dy nee eh sloo jeh dy chooilley rass: foast tra te er naase, eh smoo ta mastey lossyreeyn, as te cheet dy ve ny villey; myr shen dy vel eeanlee’n aer cheet, as goall fastee ayns ny banglanyn echey.

³³ ¶ Coraa dorraghey elley loar e roo, Ta reeriaght niau goll rish soorit, ren ben y ghoal as y ollaghey ayns three towsyn dy veinn, derrey ve ooilley soor.

³⁴ Ooilley ny reddyn shoh loar Yeesey rish y pobble ayns coraaghyn dorraghey, as fegooish coraa dorraghey, cha loar e roo:

³⁵ Dy voddagh shen ve cooilleenit va loarit liorish y phadeyr, gra, Foslym my veeal dy loart coraaghyn dorraghey, soilshee‐ym magh reddyn t’er ve follit er dy hoshiaght y teihll.

³⁶ Eishtagh hug Yeesey yn cheshaght ersooyl, as hie e stiagh ayns y thie; as haink huggey adsyn va sheer marish, gra, Soilshee dooin coraa dorraghey coggyl yn vagher.

³⁷ Dreggyr eshyn as doort e roo, Eshyn chuir yn rass mie, yn mac dooinney:

³⁸ Yn magher y seihl: yn rass mie cloan y reeriaght: agh yn coggyl cloan y drogh er:

³⁹ Yn noid chuir ad yn Jouyl: yn fouyr jerrey’n teihl: as ny beayneeyn ny ainlyn.

⁴⁰ Myr er‐y‐fa shen ta’n coggyl er ny haglym as er ny lostey ayns yn aile; myr shen vees eh ec jerrey’n teihl.

⁴¹ Ver yn mac dooinney magh e ainlyn, as teighee ad ass e reeriaght dy chooilley nee ta tayrn sleih gys peccah as adsyn ta cur rish yn olk;

⁴² As tilgee ad ad ayns coirrey ailagh: ayns shen vees keaney as snaggeraght feeacklyn.

⁴³ Eishtagh nee yn chloan chairagh soilshain magh myr y ghrian ayns reeriaght nyn Ayrey. Eshyn ta cleashyn echey dy chlashtyn, lig e clashtyn.

⁴⁴ ¶ Reeshtagh ta reeriaght niau goll rish berchys va follit ayns magher: yn verchys keddyn tra ta dooinney dy gheddyn magh, te dy choodaghey eh, as ayns boggey jeh, te goll as creck ooilley ny t’echey as kionnaghey’n magher shen.

⁴⁵ Reeshtagh ta reeriaght niau goll rish merchand va shirrey pearlyn mie:

⁴⁶ As tra ve er gheddyn yn phearl dy phrice woar, hie e as chreck e ooilley ny v’echey, as chionnee e eh.

⁴⁷ ¶ Reeshtagh ta reeriaght niau goll rish lieen, va tilgit magh ’sy cheayn, as ghow jeh dy chooilley horch dy eeast.

⁴⁸ As tra ve laane, hayrn ad eh gys talloo, as hoie ad sheese, as haue ad yn eeast mie ayns siyn, agh chaeu ad yn drogh eeast ersooyl.

⁴⁹ Myr shen vees eh, ec jerrey’n teihl: hig ny ainlyn magh, as scarree ad y vee-chrauee veih mastey’n chloan chairagh;

⁵⁰ As tilgee ad ad ayns coirrey dy aile: ayns shen vees keaney as snaggeraght feeacklyn.

⁵¹ Doort Yeesey roo, Vel shiu er hoiggal ooilley ny reddyn shoh? Doort adsyn rish, Ta shin, Hiarn.

⁵² Eishtagh doort e roo, shen‐y‐fa ta dy chooilley scrudere ta ynsit gys reeriaght niau, goll rish dooinney ta ny ar‐thie, ta cur magh ass y stoyr echey reddyn noa as shen.

⁵³ ¶ As haink eh gy kione, tra va Yeesey erreish ny coraaghyn dorraghey shoh y loart, dy jimmee e veih shen.

⁵⁴ As tra ve er jeet gys e heer hene, dynsee e ad ayns ny kialteenyn oc, ayns wheesh as dy row ad atchimagh, as dy doort ad, Cre woish ta creenaght as mirillyn y dooinney shoh?

⁵⁵ Nagh nee shoh mac y seyr? Nagh vel e voir enmyssit Moirrey, as e vraaraghyn Jamys as Joses, as Simon, as Judas?

⁵⁶ As nagh vel ny shairaghyn echey ooilley marin? cre woish eisht ta ooilley ny reddyn t’ec y dooinney shoh.

⁵⁷ As var ad jymmoosagh rish. Agh doort Yeesey roo, Cha vel phadeyr fegooish ooashley, cheu-mooie jeh ayns e heer hene as ayns e hie hene.

⁵⁸ As cha nimmey miril dobbree e ayns shen, kyndagh rish y vee-chredjue oc.