तीतुस 1 - नाहाली

अभिवादन

¹ पौलुस फायरीन, जो बोगवानान दास एने यीशु मसीह प्रेरित हि, बोगवानान निवाडील माणहाह विश्वास एने ता सत्यान ओलाखतीन नुसार जो भोक्ती नुसार हि,

² ता अनंत जीवनान आशा उपेर ज्यान शपथ बोगवानान, जो उठीन बोलहू शकत नाहं सनाता ने केरील हि,

³ पुण हाजो वेलाम आपणो वचनामाय ता पोरचार द्वारे प्रगट किरेल, जो आमारो उद्धार केरथू बोगवानान आज्ञा आरीचाल मन्हा ताह होपील.

⁴ तीतुस नावाह, ज्या विश्वासान सहभागीतान कि विचार मारो खेरो पुत्र हि: बोगवान आबोक एने आमारो बोगवान उद्धारकर्ता मसीह यीशु फायरीन माहु कृपा एने शान्ति जुडती रेय.

क्रेनतामाय तीतुसान कामे

⁵ मी ज्यानकेरता ताह क्रेतामध्ये सोडीन आवां एतो कि तू रीईल वातील हुदारणे केरावी, एने मारो आज्ञेनुसार नगरात डाय डायान निवाड केरीन.

⁶ जो निर्दोष एने एकुच बायकू एदमी रोनुजुविह, ज्यान लेकर विश्वासी एय, एने तान माय ठेगणे पणा एने बेताल पणान दोष ऐन जाण्यांरेवू.

⁷ कारण अध्यक्षाहा बोगवानान कारभारी एणेन कारणाने निर्दोष रेणेन जुविकाय; हंट्टी नाहं, खतत्यागतली नाह, होरूपिनारु नाहं, देनारा नाहं, एने अधर्मने पोशा मेलविणारा ऐन जाण्यांरेवू,

⁸ देखनाराह प्रेम केरणार, हाजे केरणार, स्वयंमी, न्याय, पवित्र एने धर्मी रेणे जुवी;

⁹ एने विश्वास योग्य वचनापोर जो धार्मिक शिक्षणामाय अनुसार, स्थिर रेंय कि खेरा लिखील शिक्षण आपुह शकेल एने विरोधवाला मूय बंद केरूह शकेल.

¹⁰ कारण जुलुम माणहे फसिवणारे, एने वाया बोलणारा एने धोका आपणारा; विशेष केरीन खतना किरील मायरीन.

¹¹ तान मूय बंद केरणे जुवी. काय हे माणहे अधर्मन कमाई केरता वाया वातू हिकाडीन घेरान घेर बिगाड्लु ताक्णु.

¹² तान मायरीन एक जाणाह, जो तामाय भविष्यवक्ता हि, कियो, “क्रेतीय माणहे सदा ठेगणे, दुष्ट पशु, आळशी एने एड्ख्यो होय.”

¹³ हि गवाह खेरो हि, ज्ञान केरता ताह कडकपणाने चेतावणी आपतेन जा कि ते विश्वासाआ माय पाक्को एती.

¹⁴ एने यहूदियांची वार्ता वातू माय एने ता माणहान आज्ञा माय मोन लागाडू मा, जे सत्य तारीन भटकून जातेह.

¹⁵ शुद्ध माणहा केरता आखा वस्तु शुद्ध हि, पुण अशुद्ध एने अविश्वासियान केरता काहीच शुद्ध नाह, नाहं तर तान बुद्धी एने विवेक दुयू अशुद्ध हि.

¹⁶ ते कियील कि आमु बोगवानान ओलकतेह, पुण कामांन तान से तान नकार केरणारा हेते; काहाकाय ता घृणीत हेते, एने काल्लूच हाजो कामान केरता योग्य नाहं.