रोमीयो 14 - नाहाली

आपणा बाहाका पोर दोष मा लागाडही

¹ जो विश्वासान कमजोर हि, ताह आपणे आहनी केरू, तान विकल्पांना निर्णय केरीन नाह.

² एकास विश्वास हि कि आखा काही खाणु उचित हि, पुण जो विश्वासामाय दुर्बल हि तो शोक केरनेनुज खाहोव.

³ जो खाहोव तान खाणाराआ तुच्छ माणुह नाहा, एने जो खाणे नाहं तान तान खाणाराआ तुच्छ माणहु नाहा; कारण बोगवान आखा काही बोणाविल हि.

⁴ तू कूण हि जो दिहरान दासाचा दोष देखाडणार? तान स्थिर रेणे केव्ही पोडीन जाणे तान स्वामीई संबध मेली; पुण ते स्थिर कइदेद जाहू काहाकाय प्रभु ताह स्थिर रेहू शकणे.

⁵ कूण एक दिहा दिहीरा दिहारीन होवटो मोहोत्व आपथु, एने कूण आखा दिहान एक हारका माणने प्रत्येक जनाने आपणो मोनाम खात्री केरीन ली.

⁶ जो कूण दिहा पालने, तो प्रभुह होमोलनु, जो खाहोव, तो प्रभु केरता खाहोव, कारण तो बोगवानान धन्यवाद करने.

⁷ कारण आपानेमाय कूण स्वताह केरता जीविह नाहं एने कूण स्वताह केरता मोरतालू नाहं.

⁸ जर आमु जीवतालू हि, तर प्रभु केरता जीवतालो हि; एने जर मोरतालू हि, तर प्रभु केरता मोरतालू हि; सेवट आमु जीवहु कि मोरहु, आमु प्रभुन हि.

⁹ काहाकाय मसीह तान केरता मरण जूळनो एने जीवतालू एनो कि तो मुरीलताहा एने जीवतालो दुयूह प्रभु हि.

¹⁰ तू आपणो बाहाकपुर का दोष लागाडणे? केव्ही पोशा तू आपणो बायाक का तुच्छ माणने? आमु आखा बोगवानान न्यायासनासमोर उबरीयेल रेहू हि.

¹¹ काहाकाय लेखील हि, “प्रभु किथे मी जीवतालू हि तेवी मोर ओगाण प्रत्येक जन मांडा डेकाडीनजाय, एने प्रत्येक जीभ बोगवानानाह अंगीकार केरूह.”

¹² “तान केरता आमरा मायरीन प्रत्येक जन बोगवानाह आप आपणा हिशोब आपण्यू.”

आपणा बाहाकान ठोकरान कारण मा बोणु

¹³ ताने केरीन आपु यानओंगान एक दिहरापुर दोष लागाडू मा, पुण तुमूह ठेरिनीन ली कि कूण आपणो बाहाक काजे जेठ केव्ही ठोकर खाणेन काहाकाय बोणावूहु नाहा.

¹⁴ माहु मालूम हि एने प्रभु यीशु माय माहु खात्री हि कि काल्ली वस्तु स्वताह हाजो नाहं, पुण जो ताह अशुद्ध होमजनेस ताकेरिन अशुद्ध हि.

¹⁵ जर तारो बाहाक तारो भोजन करीन कारणाने नाराज एतो, तर तू प्रेमाकेरिन चालतो नाहं; जानकेरता मसीह मोरणु, ताह तू आपणो खाइलूच कारणाने नष्ट केरूह मां.

¹⁶ सेवट, तुमरीकेरता जे हाजो हि तान निंदा केरूह मा.

¹⁷ काहाकाय बोगवानान राज्य खाणु केव्ही पिणे याम नाहं, तर धार्मिकता, शान्ति एने आत्मा द्वारे जुळणार आनंद हि, जो पवित्र आत्मा माय जुडणे.

¹⁸ जो कूण आवो रीतीमाय मसीहान सेवा करने, तो बोगवानानाह दिखेह एने माणहाह हाजो पोटील हि.

¹⁹ तान केरता आमु ता वातीमाय रमून रिजी ताहेरी भेटी घोडो एने एक दिहरान हुदार एय.

²⁰ रोटाकेरता बोगवानान केरीन बिगाडावने मां, आखा काही शुद्ध तर हि, पुण ता माणहान केरीन वाईट हि जो माणुह ताह अडखळण आवी इह्केरीन खाहोव.

²¹ हाजो तर हे हि कि नाहं माहा खाण्यू एणेन अंगूररस पिनार, एने काही इही केरूह मां ज्यासे तारो बायाक ठोकर लागी.

²² तारो जो विश्वास हि, ताह बोगवानान ओगांण आपणाच मोनाम मेलील. धन्य हि जो ता वातीमाय ज्याह, तो हाजो होमजनेस, आपणो स्वताह दोषी ठेरावीन नाहं,

²³ पुण जो शक देरीन खाहोव तो दोषी ठेरहू, कारण विश्वासान खाणे नाहं; एने जे काही विश्वासान नाहं, ते पाप हि.