प्रकाशितवाक्य 12 - नाहाली

बायकू एने अजगर

¹ ओवतो स्वर्गाम एक मोठू चिन्ह देखानो, अर्थात एक बायकू जी दिहाह पागर लेयीली एती, एने चांद तीन पाया बुंदे एतो, एने तीन मुंडीपोर बारा तारान मुकूट एतो.

² ती पेटावाली एनी, एने आयेडतेन एती, कारण ती प्रसवच्या पीडामाय एती.

³ एक उन्जू चिन्ह स्वर्गाम देखा; एने देखू, एक मोठू रातलो अजगर एतो, सात मुंडे एने दहा हिगे एता, एने तान मुंडीपोर सात राज मुकूट एता.

⁴ तान शेपटी केरीन आकाशामाय वालो चादन्यान एक तृतीवंश ला उडीते पृथ्वीपोर टाकीन आपील. तो अजगर ता बायकू च्या ओगाण जो तीन ओगाण उबरील रेणू कि जेवी ती सोरो हुदरीयोहो तर ता आतल्यो सोरो गील लेह.

⁵ ती सोरो खाली जेन्मी जो लोखंडाचा दड लेईन आखा जाती त्यापूर राज्य केरणेपूर एतो, एने ते सोरो एकाएक बोगवान आहने एने तान सिहासना आहने विसीन पोचाडीने गीयो;

⁶ एने ती बायकू जेंगलामाय पोडीन गीयी जांबी बोगवानराच्या उगेरीन तीन केरता एक जागो तियार केरील गीयी एती कि तिथ एक हजार दोनशे साठ दिह ताहवोर देखणे जाह.

⁷ ओवतो स्वर्गाम लेढाई एनी, मिखाएल एने तान स्वर्गदूत अजगर हेरी लेढाई ला निकेलना; एने अजगर एने तान दूत ताहे-या लेडाणे लो,

⁸ पुण प्रबळ नाहं एय गीयो, एने स्वर्गाम तान केरता उन्जू जागो नाहं रेणी.

⁹ तेवी तो मोठू अजगर, अर्थात तोच जुनो गेयळेक जो दिव्याबल एने शैतान कियील जाथू एने आखा जगान ठोगणारू हि, पृथ्वीपोर पाडीन टाकिला आवा, एने तान दूत तान हेरी पाडीन टाकिला आवा.

¹⁰ ओवतो मी स्वर्गामाय रीन हा मोठू शब्द आव तालून होमलील, “ऐवी आमरा बोगवानान उद्धार एने सामर्थ्य एने राज्य एने तान मसीहान अधिकार प्रगट एनो हि, कारण कि आमरा बायहो दोष लागाडणार जो रात दिह आमरा बोगवान सुमोर तां पोर दोष लागाळ एतो, पाडीन टाकिला आवा.”

¹¹ ते कोकऱ्या च्या रक्त एने आपणी गवाहीच्या वचनमाय केरीन तान उपेर जयवंत एय गीयो, एने तास आपणो जीवाह प्रिय नाहं मानना, इत ताहवोर कि मृत्यू पुण सहन किरील.

¹² “आवो कामान केरीन हे स्वर्गी एने तामाय रेणारे, मगन रीवू; हे पृथ्वी, एने समुन्द्र, तुमरे पोर हाय! काहाकाय कि शैतान रागारू हेरी तुमरो आहने उतरित आवा हि, कारण कि तो ओळखणे कि तान थोडाच टाइम उन्जू बाकी हि.”

¹³ तेव्ही अजगर देखील कि मी पृथ्वीपोर पाड्डीएल गीयो हि, तर ता बायकूह ज्या सोरा बुय पोडली एती, त्रास आपील.

¹⁴ पुण ता बायकूह मोठली गुवळा दुय पंख आपील गीया कि गेयळेकान ओगाणरीन उडीति जेंगलामाय ता जागीपोर पोचाडीन जाहो, जांबी तो एक टाइम एने वेलाम, एने अर्ध्या वेळा ताहवोर पोहणे पालनो किरील जाह.

¹⁵ एने गेयळेकान ता बायकून पासाण आपणो मुयामाय नदी हारका वोईल कि ताह ता खोद्रामाय मारीन टाकील.

¹⁶ पुण पृथ्वीने ता बायकूह मदत केरील, एने आपणा मूय उगडीन ता बुंदे जी अजगर वाहीली एती पिईन टाकील.

¹⁷ तेव्ही अजगर बायकू पुर रागाम एनो, एने तीन शेष सोरा से, जे बोगवानान आज्ञा मानत्लू एने यीशु ची गवाही आपितेवी स्थिर हि, लेडणे गीयो

¹⁸ एने तो समुद्राम वालू उपेर जाइन उबरील रेणू.