प्रकाशितवाक्य 10 - नाहाली

स्वर्गदूत एने आतली पुस्तक

¹ ओवतो पोशो मी एक उंजू शक्तीशाली स्वर्गदूताह वादेल पांघरील स्वर्गामाय रीन उतेरतालो देखील. तान मुंडीपोर मेघ धनुष्य (बांण) इतू एने तान मूय सूर्या हारको एने तान पाय आग्ठान हारका एता

² तान आथाम एक उगडील पुस्तक एता. तान आपणो जेवल्यो पाय समुद्रापोर एने बंगाड्यो पृथ्वीपोर मेलील,

³ एने ओहला मोठला शब्दांनी आयडील, जोहलो सिंह आयडणे; एने जेहीकाय तो आयडील तर गोर्जेहे शब्द होमलील गीयो.

⁴ जेवी सातू गर्जनान शब्दांन आवाज होमलानो, तेवी मी लेखणारूच इतू, एने मी स्वर्गामाय रीन ज्यो शब्दांन आवाज होमलानो, “ज्यू वातू गाजणा हेर्यू त्यू सात शब्दांमाय होमलील हेत्यू, गुप्त मेल उंजू मा लिखी.”

⁵ ज्या स्वर्गदूतांन मी समुद्र एने पृथ्वीपोर उबरीयेल देखील एता. तान आपणो जेवड्यो आथ स्वर्गाकडे विशेल,

⁶ एने जो पिडीन पिडी जीवतालू हि, एने तान स्वर्गाला एने जे काही तामायरीन हि, एने पृथ्वी एने जे काही तापोर हि, एने समुद्राला एने जे काही तामायरीन हि सृजा, ताणुच शपथ लीन कियील, “ऐवी तर उंजू टाइम नाहं एय.”

⁷ “पुण सातवा स्वर्गदूतांन तुरही वाजविलो एणाराह शब्दान दिहामाय बोगवानान लिकाईल मनोरथ ता सुवार्तान नुसार जो तान आपानो आपणो दास भविष्यवक्तान आपील, पुरो एय.”

⁸ ज्या वातू मी स्वर्गाला बोलतालुन होमलील एता, ते पोशा मारो हेरी वातू केरूह लागिल, “जा, जो स्वर्गदूत समुद्र एने पृथ्वीपोर उबरील हि, तान हेरी हि का उगडील पुस्तक लेईन ले.”

⁹ मी स्वर्गदूत आहनी जाइन कियील, “हि आत्या पुस्तक माहु आप” ताह माहु कियील, “ले, यीला खाइन ले; हि तारो गुग दिनारू तर कोडवो केरुहू, पुण तारो मुयाम माय सारकोस गुल्यो लागणार.”

¹⁰ शेवेट मी ती आत्या पुस्तक ता स्वर्गदूतां फायरीन खाइन टाकील. ती मारो मुयामाय मधाहारकी गुल्यो तर लागिल, पुण मी ताहेरया तीह खाइन लीईल, तर मारा पेट कोडवो एय गीया.

¹¹ तेवी मारो उगेरीन हे केदाह गीया, “माहु जादा माणहे, एने जाती, एने भाषा एने राज्यान विषयातमाय पोशा भविष्यवाणी केरणे पोळी.”