मरकुस 7 - नाहाली

रीती पालणेन प्रश्न

¹ तेवी फरीसी एने यरूशलेम मायरेन आवील, कोलाक शास्त्री एखठाच आवीन ताफाय आवो,

² तास देखायील का तान कांही चेला अशुद्ध दोव ते ताहोलोच जेवण केरतीन हेते.

³ काहाकाय फरीसी एने आखा यहूदीयान, डाय डायान रीत अनुसरून आथ हास केरीन धोन्याशिवय जेवण केरतीन नाह;

⁴ एने बाजारामाय आवीन, जांह वोर उगंली नाह लेते, ताहवोर नाह खाणु; एने मोक्त्युस ओहल्यू दिहर्यु वातू हेत्यू, जी ताफाय माणने केरीन पोचाड देईल. जीही कोल्हया, एने तांबान ठाम्बला गेहडीन दोवणु.

⁵ ज्यानहोस फरीसीन एने धर्मशास्त्रीन ज्यान यीशुह फुसील, “तुमरो चेला वेगालान पोहणे का केरतीन नाहं? पुण आपणा जेवण आथ दोव ते आवीन खाणु?”

⁶ यीशु ताह कियील, “यशाया तुमु कोपटीन विषयाम खोब हाजी भविष्यवाणी केरील हि, जीही लिखील हि: ज्या माणहे ओठा केरीन मार आदर केर्तेह, पुण तान मोन मारीहरीन सेटो रेणें.

⁷ एने ज्यां मारी वया भक्ति उपासना केर्तेह, काहाकाय ज्या माणहान आज्ञाह धर्मान शिक्षण बोणाव एने हिकाडतेह.”

⁸ तुमूह बोगवानन आज्ञा बाजूमाय मिलवहि एने तुमूह माणहान परंपरा चव मदत लव जाईल हि.

⁹ तो ताह कियील, तुमूह बोगवानान आज्ञा बाजूमाय केरणेल जादा चेत्रो एय गीयो हि तान केरता का तुमूह आपणो परंपरान स्थापना केरनेसेकव.

¹⁰ वार्तानकेरता मुसान कियील, आपणो आईक आबाक सन्मान केरू एने जो कूण आपणो आईक आबाक सन्मान केरतीन नाहं ताह देहांत शिक्षा केराव एने.

¹¹ पुण तुमूह केणु जर एखादु आपणो आबाक आपणो आईक कियील का जो मी तुमूह पोषणानकेरता आपणेन तो कुर्बान म्हणजे अर्पण केरील हि.

¹² तर तुमूह आपणो आबाकने केरीन केवहव आइकनेकेरता ओगांण कांही केरनेआपतेन नाहं.

¹³ इहकेरीन तुमूह आपणो संप्रदाय चालू मेलावा बोगवानन वचन रद्द केरता एने ज्यासाराखा उजू मोक्तास वातू केरता.

माणहाह अशुद्ध केरणारी वातू

¹⁴ तेवी लोकसमुदयामाय पोशो हादाडळव कियील, तुमूह आखा जान मारा होमलू एने होमजाडव लव.

¹⁵ बाहेररीन माणहान माय जाइन ताह भ्रष्ट केरीन इही नाहं तर माणहान मायरीन जो नीकलनेन तोज ताह भ्रष्ट करने.

¹⁶ ऐव एने जान कान एती तो होमेल लेय.

¹⁷ तो लोक्सामुदायामायारिन निकलीन गिर जांणेबादमाय तान चेला ताह ता देखाडणे वार्ता वशीयव फुसील.

¹⁸ तो ताह कियील, तुमूह देखव ओला अज्ञाम हि का काय? जो कांही बाहेररीन माणहान माय जातेह तो ताह नष्ट केरनेशकत अशुद् जो तुमूह होमजाडणे नाहं काय?

¹⁹ काहाकाय तो तान मोनाम नाह तर तो पेटाम जातेह एने शौचकुपातून बाहेर पुडव ओहलो रीन तान माय तान आखा प्रकारान खाणो शुद्ध ठेरायेल.

²⁰ उजू तो ताह कियील, जो माणहा मायरीन बाहेर नीकलनेन तोज माणहाह भ्रष्ट केरणे.

²¹ काहाकाय मायरीन म्हणजे माणहान मोना मायरीन खराब विचार निकलहू. जारकर्मे, चोऱ्या, खुन, व्यभिचार,

²² लोभ, दुष्ट पणा, निंदा, आल्युहू, हेव वो, जुलव हि गाळव, अहंकार मूर्खपणा.

²³ जाह आखा खारब वातू मायरीन बाहेर निकलहू एने माणहाह भ्रष्ट केरणू.

सुरूफिनीकी जातीन बायकून विश्वास

²⁴ पोशो यीशु ने तो जागो सोडीन सोर एने सिदोन प्रांतात गीयो ताहरी तो एक घेराम गीयो ज्यां कुणुथव मालूम नाहा इही तान मोनाम एता तेभी ताह लिकाडरेणे शक्य नाह एता.

²⁵ पुण तान आतव स सोरिन अशुद्ध आत्मा लागिल एतो ओहलव एक बायाकू तान बारामाय चालूच होमलील एने तान आवीन तान पाया पुडील.

²⁶ जी यूनानी एने सुरूफिनीकी जातीन एती; ती ताह विनंती केरील का मार सोरीमायरीन दुष्ट आत्मा काड दी

²⁷ तो तीह कियील, सोराह आफ्री जाणेदी, काहाकाय सोरान रूटू लावीन घेरून चिताह टाकणे हाजो नाहं.

²⁸ उवतू तान ती ताह उत्तर आपील, खेरो हि महाराज, तेभी घेरून चिता भी मेजाखालव सोरान आथा मायरीन पुळवचुरो भी खाणु.

²⁹ तो तान कियील, तारो केणेन पोटनो, जा ताररिन सोरिन मायरीन दुष्ट आत्मा निकली गीया योह.

³⁰ उवतू तान तान आपणे गिर गीया यव, तेवी सोरिन आथरिन लपूर टाकील हि एने दुष्ट आत्मा तिमायरीन निकली जायेल ज्यां इही तान देखणेन आवो.

बेयरा एने हक्लाणार माणहाह हुदारणो

³¹ उवतू तो तो सोर भागाम निकलील एने सिदोनाव रून दिकापुलिस प्रांतामायरीन गलील समुद्रा उगे पोशा आवा.

³² तेवी माणहान एक बेहेरू तोतऱ्या माणहाह ताफाय आवीन आपु ज्यापूर आथ मेलू ओहलो ताह एने विनंती केरील.

³³ तेवी तो ताह भवड मायरीन आंग्ये लव गीयू, एने तो आपणा आंगल्या तान कानामाय रीन गाड्यू, एने थुपव तान जीभीह स्पर्श केरील;

³⁴ एने उपेर स्वर्गा उखेर देखीन हांह लियेल, एने कियील, इफ्फाथा, म्हणजे “उगडी जा.”

³⁵ तेवी तान केरता उगडी गीयो एने तान जीभ बंद लागीच सुटव तो स्पष्ठ बोलणे लागिल.

³⁶ तेवी हे कोणव ज्यां हे मालूम नाहा इही तान चेतावणी केरीन कियील; पुण तो ताह जोहलो जोहलो किथी गीयो तोहोलो तोहोलो तो जादास हे पोरचार केरणे लागा.

³⁷ एने ते अतिशय बोंगलायन केया, तो आखो कांही हाजोच किरील हि, हा बेयराह होम्बलनेन एने मुकाह बोलणेन शक्ती आपीह.