मरकुस 16 - नाहाली

ठाललो माहणो

¹ जेवी शब्बाथान दिहान जाणेन बादमाय, तो मग्दालिया एने याकूबान आहाक मरियम, एने सलोमव ज्याच सुगंधीत तेल वेचातो लीईल आवीन तापोर लागाडील.

² हफ्तान पेल्ला दिह मोठला एने वेगोस ताहेरया सूर्य निकेलनोच एतो, तान कबर उपेर आवी,

³ एने आपसामाय केणेन, “आमरे केरता कबरान बायणा पुर्रिन कूण दिगुड डेकलीन आपुह?”

⁴ ताहेरया तास डोला उगाड ल, तेवी देखायील तर दिगुड ढ़ेकल्या गीयो हि तो जुलुम मोठू एतो.

⁵ एने कबरने आहने जाइन, ता एक जुवान्याह दोवल्या फाडका पेरीन एने जेवड उगे बोहवदेखायील, एने जुलुम भोंग्लाना.

⁶ तो ताह कियील, भोंगलावू मा, तुमूह यीशु नासरी ह, जाह क्रुस पोर चेढाविल एतो ताह होदतेह. तो मोरना मायरीन उठिल हि, न्या नाहं सोतो, देखू ज्यो तोच जागु हि, न्या ता ताह मिलवएता.

⁷ पुण तुमूह जाऊ, एने तान चेला एने पतरसाह केवू का तो तुमरे पेल गलील लामाय जाय; जोहलो का ताह तुमूह कियील एतो, तुमूह ताच ताह देखहु

⁸ एने त्यू निकलीन कबर मायरीन निकलीन गीया यव; काहाकाय थर थर एने भिनोसारखो तापोर एय गीया; तास ताह काहीच कियील नाहं, तान काहाकाय बियेल एती.

मरियम मगदलीनीन यीशुह देखणो

⁹ हफ्तान पेल्ला दिह वेगास एताच तो जव एने ताला एनो पेल्ला हाजा हेकाले मरियम मग्दालिया ज्यान मायरीन तान सात दुष्ट आत्मा काडील एता, ताह यीशु देखानो.

¹⁰ तिने जाइन यीशुन जोडव दाराह शोकात बुडना एता एने रेडतेन एता, वर्तमान आपील.

¹¹ ते हे कोलाक कि तो जीवताला हि एने तिने ताह देखायील, एने विश्वास नाहं केरील.

दुय चेलाह देखाणो

¹² तान उवतू तो तो दिहरान रुपाम तामायवाला दुईजानाह ताहेरया ते गावाउगे जात एता, देखाईल.

¹³ तास पुण जाइन दिहराह समाचार आपील, पुण तास तां पोर पुण एने विश्वास केरील नाहं.

महान आदेश

¹⁴ पासाण ताह ता अकरा जनांना पुण, ताहेरया ते जेवण केरणे बोह्ना एता देखानो एतो, एने तान अविश्वासान एने मोनान वातडो उपेर दोष लागाडील, काहाकाय तान केरता तान मोरना मायरीन उठनेपोर ताह देखायील, तास तापोर एने विश्वास मेलील नाह एतो.

¹⁵ एने तो ताह कियील, “तुमूह आखा जगाम जाइन आखा पृथ्वी एने माणहाह समाचारान सुवार्ता पोरचार केरू.

¹⁶ जो विश्वास करने एने बाप्तिस्मा लेणे ताणुच उद्धार एय, पुण जो विश्वास नाहं केरुहू तो दोषव ठेरायवजाहो;

¹⁷ एने विश्वास केरणारापोर हे चिन्ह रेंय कि ते मारो नावान दुष्ट आत्मा काड्तव, नोवालो भाषा बोलतव,

¹⁸ गेयळेक एने विसीन लेतव, एने केध्दव ते जेनवाराननास वस्तु पुण पिईन लेतव तान भी तान हानव एय नाहं; दुखार्यापूर आथ मेलतव, एने ते हजो ऐतव.”

यीशुन स्वर्गाम जाणो

¹⁹ तेवी प्रभु यीशु तां हेऱ्यो वातू केरणेन बादमाय स्वर्गाम विसाय गीयो एने बोगवानन जेवडी उगे बोह गीयोह.

²⁰ एने ता निकलीन प्रत्येक जागापूर पोरचार केरील, एने प्रभु हेरी काम केरतीन रेणू, एने ता चिन्ह द्वारे जे आहने-आहने एता वाचनाह केरतीन गीयो. आमेन.