मत्ती 8 - नाहाली

कुष्ठरोगिह हाजो केरणेन

¹ जेवी यीशु डोंगरापुररीन उतरणो, तेवी एक मोट्ली माणहान गर्दी तान पासाण चाल पोडील.

² एने देखो, एक कुष्ठरोगी तान आहने आवयो, एने ताह नमन केरीन कियो, “हे प्रभु, जर तारी ईच्छा एय ते माहु शुद्ध केर दी.”

³ यीशु आथ ओगांण केरीन ताह आथ लागाडीन कियो, “मारी ईच्छा हि, तू शुद्ध एय जा” एने तो ताहारूच कुष्ठरोगामायरीन हाजो एय गीयो.

⁴ एने यीशु ताह कियो, “देख, कुणीह मा किही, पुण जाइन आपणे आपह याजकाह देखाड, एने मुसान द्वारे ठेरावील भेट अर्पण केरीन गवाही बोणी.”

एक अधिकारीन विश्वास

⁵ एने जेवी ता कफर्णहुम नगरमा आवा तेवी एक अधिकारी तान आहने आवा एने विनंती केरणे लाग्यो,

⁶ “हे प्रभु, मारो दास लखवामाय पिडीत हि.”

⁷ तो ताह कियो का, “मी आवीन ताह हजो केरुहू.”

⁸ पुण तो अधिकारी उत्तर आप्यो, “हे प्रभु, मी ज्या लायक नाहं का तू मारे घेर आवी, पुण फक्त आज्ञा आप मारो दास हाजो एय जाय.

⁹ कारण मी भी न्यायान अधीन माणुह हि, एने मारे अधीन मारा शिपाई हेते. जेवी मी एकाह केणे जा ते तो जाणे, एने दिहीराह केणे, आव! ते तो आवणे, एने ताह दास केणे ज्यो केरते तो करने.”

¹⁰ ज्यो होमलील यीशुह आश्चर्य एय गीयू, एने आपणे पासाण आवनाराहा कियो, “मी तुमूह खेरीज किथु का, माहु इस्राएल माय भी ओहलो विश्वास कुणामाय भी देखायील नाहं.

¹¹ मी तुमूह किथु का, पूर्व एने पश्चिमाय रीन जुलुम माणहे अब्राहाम, ईसाहाक एने याकूब न्या हेऱ्यो स्वर्गान राज्याम बोहती.

¹² पुण बोगवान राज्यान सोरा बाहेर आंधाराम टाक देय, ताहरी रेडनेन एने दात केकडावणू रेय.”

¹³ एने यीशु सुभेदाराह कियील, “जा, तारो विश्वास हि तोहलोच तारे केरता एय” एने दास तास समयी पोर हाजो एय गीयो.

दुखाऱ्या माणहाह हुदारणे

¹⁴ यीशु पतरस घेर आवयो, तेवी तान हाहवूक दुखारी हेऱ्यामाय पोडील देख्यो

¹⁵ तो तीन आथा आथल्यो, एने तीन हेरी उतर गीयी एने ती उठीन तान सेवा केरणे लागी

¹⁶ एने हांज एनी तेवी दुष्ट आत्मान पीडामाय मोक्तास माणहाह ताफाय लाव्या एने तान फक्त एक शब्दाम दुष्ट आत्माना बाहेर निक्ली जाताला एने तो ता आखाह हाजा किऱ्यो जां दुखारया एता

¹⁷ काहाकाय जो वचन यशाया भविष्यवक्ता द्वारे कियील एतो तो पुरो एने जुवी, तो ज्यो का, “तो जीवेच आमरा दुखे एने आमरा रोगाह वीस लिदो.”

यीशुन चेला बणेन किमुत

¹⁸ यीशु जेवी ताहेरया चारू बाजूमाय माणहे एखठा एताला देख्यो तेवी तो ताह समुद्राम पुरलेउखीर जाणेन हुकुम आप्यो.

¹⁹ एने एक शास्त्री आवीन यीशुह कियो, “गुरुजी, जाहारी तू जाही मी तारे पासाण पासाण चालूह.”

²⁰ यीशु ताह कियो, “कोल्याहा देर एने आकाशान चिडाह पांजरा हि पुण माणहान सोराह मुंड टेकाडनेन भी जागो नाहं सोतू.”

²¹ एक चेलो उंजू ताह कियो, “हे प्रभु माहु पेल जाणेदी, का मी मारा आबाक गाडीन आवु.”

वादुणाह शांत केरणेन

²² यीशु ताह किदो, “तू मार पासाण आव, एने मुरीलाह आपणो मुरदो बुजणे दी.”

²³ जेवी तो नावीम चेढ गीयो, तेवी तान चेला तान पासाण जाणे लाग्या.

²⁴ एने देखू, समुन्द्रमाय एक मोठो तुफान उठ्यो, तान नाव जावटामाय बुडणे लागी यीशु हुवणे बाजरीयील इतो.

²⁵ तेवी तान चेला आवा एने ताह उठाडीन केतेह, “प्रभु, आमूह वोचाड, आमु नाश ऐतेह”

²⁶ तो ताह कियो, “हे अल्पविश्वासी, तुमु ओला काहा बितेह” तेवी तो उठीन वादलाहा आज्ञा आपील, एने ताहारूच पुरो ठावकुच एय गीयो.

²⁷ तेवी ता माणहाह आश्चर्य लागो एने केणे लागा, “ज्यो कोहलो माणुह हि कि वारो एने समुन्द्र भी ज्यान होमलिह.”

दुष्टात्मा लागिल माणहाह हुदारणेन

²⁸ जेवी तो गदरसेकरान प्रदेशाम पोचना, तेवी दुय माणुहे जामाय दुष्ट आत्मा एती, ता कबरस्थानामायरीन निकलीन ताह मीलाना. तो ओला खराब एता कि कुनुस ती वाटी नाह जातालो.

²⁹ एने देखू, ता ताह आयडीन कियील, “हे बोगवानान सोरो, आमारो तारहेरी काय काम? काय न्या तू आमूह टायमान पेल दुख आपणेन आवोह का.”

³⁰ थोडाच अंतरापूर डुकरान एक मोठू कळप चारतेन एतो.

³¹ दुष्ट आत्मा ताह विनंती केरील, “जर तू आमूह काडणेन आवूह तर आमूह डुकरान टोलाम मोकली दी.”

³² तो ताह कियो, “जावो” निकलीन डुकरांम रीन गनो एने देखू, तो पुरो टोलु जाइन कोठापुररीन समुद्रा माय पोडीन बुडीन मोर गीया.

³³ डुकरे चारणारे दोवळतीन नगरांम गीया, एने दुष्ट आत्मा से पिडीत माणहा हेऱ्यो जो एनो तो आखो केया.

³⁴ एने देखू, ता गावान आखा माणहे यीशुह मिलणेन आवा, एने ताह देखीन ताह विनवणी केऱ्यो कि आमरा प्देशामायरीन जातरी.