मत्ती 28 - नाहाली

यीशुन जीव उठणो

¹ शब्बाथान दिह ओवतो हफ्तान पेल्लो दिह उजालेच मरियम मग्दालिया एने दिहरी मरियम कबर देखणेन आवील.

² तेवी, एक मोठलो भूकंप एनो, काहाकाय प्रभुन दूत स्वर्गामाय रीन उतरणो एने आहनी आवीन ता दिगुड हेरकाव देनो, एने तान उपेर बोह गीयो.

³ तान रूप विजने होस एतो एने तान फाडका बर्फान होस दोवल्या एता.

⁴ तान राखवाल केरणार शिपाई जुलुम बिय गीया एने ता थुर-थुर कापणे लागा एने ता मोरेल माणहान होस एय गीया

⁵ स्वर्गदूत त्यू बायकूह केयील, “बिऊ मा, माहु मालूम हि का तुमूह यीशुह जाह क्रुस पोर चेढाविल एतो ताह होदतेह

⁶ तो न्या नाह सोतो, पुण आपणा वचना नुसार जीवतालू एय जायील हि, आवज्यू ज्यू जागो देखू न्या प्रभुह मिलील एता

⁷ एने ऐवी जेल्दी जाइन तान चेलाह केवू का तो मोरना मायरीन जीवतालू एय गीयोह. एने तो तुमरे पेल गलीलामाय गीयोह ताच तान दर्शन तुमूह जुडी देखू मी तुमूह केयील हि.”

⁸ तेवी त्यू बायकू गाब्राईन एने मोठली आनंदमाय त्यू कबर मायरीन जेल्दी वोलीन तान चेलाह समाचार आपणे केरता चालूच दोवडीन गीयू.

बायकूह यीशुन दर्शन

⁹ तेवी यीशु ताह मिलील एने केयेल, “हुकेह रीवू” एने ता आहनी आवीन एने तान पाय देरीन ताह वोंदया.

¹⁰ तेवी यीशु ताह कियील, बिऊ मा; मारो बायहो ताह जाइन केवो कि गलीलामाय निकलीन जा, तिथ माहु देखाह.

पहेदारान खुबेर

¹¹ ता जात एतालून राखवालदार मायरीन काही नगरात आवीन पुरो वर्तमान मुख्य याजका केयेल.

¹² तेवी तास डाय डाया एक्ठाच आवीन संपली केऱ्या, शिपायांना जुलुम चांदी आपिन कियेल,

¹³ ज्याच केणेन कि राती आमु हुविलो एतो, तर तान चेला आवीन ताह चोरीते लेईन गीया.

¹⁴ एने हि वात सुभेदारान कानापूर पोचीही, तर आमु ताह होमजाडीन लेहु एने तुमूह वोचाडीन लेहु.

¹⁵ तास पोयशा लेईन जोहलो हिकाळनेल गीया, तोहोलो किरील हि वात आजवोर यहूदीयान पेरीकेरीन आवी.

चेलाह दर्शन एने आखरी आज्ञा

¹⁶ अकरा चेला गलीलामाय ता बोयडापोर गीया, जोहलो यीशु ताह केयेल एता.

¹⁷ तास तान दर्शन लेईन ताह नमन किरील, पुण कुणी कुणी हि शंका आवी.

¹⁸ यीशु तान आहनी आवीन केयेल, “स्वर्गान एने पृथ्वीन अधिकार माहु आपील हि.

¹⁹ जानकेरता तुमु जाओ, आखा दिहरी जातीन माणहाह चेला बोणावू; एने ताह आबोक, एने सोरा, एने पवित्र आत्मान नावान बाप्तिस्मा आपो,

²⁰ एने ताह आखा वातू ज्या मी तुमूह हुकुम आपील हि, ती पालने हीकाडो के: एने देखू, मी जगान सेवट वोर तुमरे हेरी हि.”