मत्ती 27 - नाहाली

पिलातुसान सामने यीशु

¹ जेवी वेगीस एनी ता आखा मुख्य याजक एने माणहान डाय डाया ज्या यीशुह मारणेन विचार किरील.

² एने ता ताह बांधीन पिलातुसान सुभेदार ज्यान आथाम होप दियील.

यहूदा इस्करियोतीन आत्महत्या

³ ताहेर्या ताह देरीन आपणारा यहूदाने देखील कि तो दोषी नाहं एतो तो पस्तावील एने ते तीस चांदीन शिक्का मुख्य याजक एने डाय डाया यान उगे पोशा लावील.

⁴ एने कियील, “मी निर्दोषांह मोत ने केरता देरीन आपील पाप किरील हि” ते कियेल, “तान आमूह काय? तो देखील ले.”

⁵ उवतू तो मंदिर माय आवीन शिक्का जगार दिन जात रीनू, एने जाइन स्वता फासी लागाड लियील.

⁶ मुख्य याजकावजेसे ते शिक्का लीन कियेल, “दानकोशात मेलणे हाजो नाहं, कारण हे रक्ताचे मोल हि.”

⁷ सेवट ते विचार केरीन ता हिकणे उपऱ्याना पुराविकेरता कुंभाराहा खेत वेचातो लीईल.

⁸ ज्यानकेरता ते खेत आज ताहवोर रक्ताचे खेत कियील जातेह.

⁹ तेवी जे वचन यिर्मया भविष्यवक्तान द्वारे कियील एता ते पुरो एय गीयो: “तास ते तीस शिक्का म्हणजे ते ठेरायेल मोल ज्याह इस्राएलान कुलामरीन केताहा ठेराव्यू एता लेय लीईल,

¹⁰ एने जीही बोगवानान माहु आज्ञा आपील एती तोहोलोच ता कुंभारान खेताहा मोल माय आपील एती.”

पिलातुसान यीशुह से प्रश्न

¹¹ जेवी यीशु सुभेदारान ओगांण उबरील एतो तेवी सुभेदार ताह फुसील, “काय तू यहूदीयान राजा हि? यीशु ताह कियील तू जीवेच किथी हि.”

¹² जेवी मुख्य याजक एने डाय डाया तापोर दोष लागाड ताला तेवी तो काय उत्तर आपील नाहं.

¹³ ज्यापूर पिलातुस ताह कियील, “काय तू नाहं होंबलीत का ज्या तारे विरुद्ध कोलाक खोटी गवाही आपतेन हि?

¹⁴ पुण तो ताह एक भी वातीन उत्तर नाहं आपील, न्यावोर ताहवोर कि सुभेदाराह जुलुम आश्यर्य लागनो.”

मृत्यू-दण्ड कि आज्ञा

¹⁵ एने सुभेदारान जी रीत एती का तान वल्हानडन तीवाराम माणहा केरता काल्लोबी एक बंदीवानाह ताह जा ओळखतेह एता, सोडीन आपतेन एता.

¹⁶ ता टाइम बरब्बा नावान एक तामाय वालो एक नावलायेल गुंडो बोन्दिमाय एतो.

¹⁷ सेवट ताहेरया ते एक्ठाच एय गीयो, तर पिलातुसान ताह कियील, “तुमूह कोणीही जाणे कि मी तुमरो केरता सोडीन आपुह? बरब्बाह, किव्हा यीशुह जो मसीह कियील हि?”

¹⁸ कारण तो जाणतालो का मुख्य याजक ताह कुयराये से देराव देयेल एता.

¹⁹ ताहेरया तो न्यायासणापूर बोह्ना एता तर तान बायकून ताह खोबीर मोकलना, “तू ता धर्मी बारामाय आपु पोडहुं नाय, कारण मी आज होपनाम तान सोरा जुलुम यातना सोसल्या.”

²⁰ मुख्य याजक एने डाय डाया एने माणहाह चेढाविल का ता बरब्बाह मांग लिवू, एने यीशुन नाश केरू.

²¹ सुभेदारा ताह फुसील, “न्यादुयू मायरीन कूण जुवी का ताह मी तुमरीकेरता सोड बोगवानान?” ते ता कियेल, “बरब्बाह.”

²² पिलातुसान ताह फुसील, “पोशा यीशुह जो मसीह केयेल जाथू, काय केरूह?” आखा ताह कियील, “ताह क्रुसांपोर खिळून टाकु”

²³ सुभेदाराने कियील, का, ताह काय वाईट किरील हि? पुण ते उंजू आयडीन आयडीन केणेंन लागिल “ताह क्रुसांपोर खिळून टाकु.”

²⁴ ताहेरया पिलातुसान देखील कि काही फरक नाहं दोवडतीन हि पुण तान उलटो तंटा वोदनेन चालेहे हि, तेवी तान पाणी लीन गेर्दी सुमोर आपणा आथ धुवील एने कियील, “मी आवो नीतिमानान रक्ताने निर्दोष हि; तुमरो तुमुच देखू.”

²⁵ आखा माणहान उत्तर आपील, “तान रक्त आमऱ्येपुररीन एने आमरा सोराह ओहलो.”

²⁶ ज्याह उपेरीन तान बरब्बाह तान केरता सोडीन आपील, एने यीशुह फरके मारीन तान स्वाधीन किरील कि क्रुसांपोर खिलाकेरीन ठोक बोगवानानू.

सिपायडा द्वारा यीशुन अपमान

²⁷ तेवी सुभेदाराने शिपाई यीशुह माय लावा आखीच तुकडी तान चारू उगे जोमाड्यो.

²⁸ एने तान फाडका काडीन ताह रातला रेगांन किरमिजी झगो,

²⁹ एने काटान मुकूट गुथीन तान मुंडीमाय रीगाड दियील, एने तान जेड्या आथाम वेत आपील एने तान ओगांण मांडा टेकिन तान थट्टा केरील एने कियील, “ज्यो यहूदीयान राजा हि, नमस्कार.

³⁰ एने तापोर थूपील; एने तोच जेड्या लीन तान मुंड पोर देणे लागिल.”

यीशुह क्रुस पोर चढ़ावाणो

³¹ जेवी ता तान थट्टा केरीन ता ताह झगा तान शरीरामायरीन काडीन पोशा ताणुच फाडका ताह पेरावील, एने क्रुसांपोर खिलने केरीन लीन गीया.

³² बाहेर जात एतालून ताह शिमोन नावान एक कुरनेकर माणुह मिलील ताह तास तान क्रुस ली जाणे केरताली गीया.

³³ एने ती जागे जो गुलगुथा म्हणजे कवटीई जागो आव पोचना

³⁴ ताच ताह पित्तमिश्रीत अंगूररस पिणे केरीन आपील, “पुण तो चाखीन देखीलपूर तो पिईल नाहा.

³⁵ ताह क्रुसांपोर खिल्योतांहा तास चिठ्या टाकीन तान फाडका वाट लीईल.”

³⁶ एने ताहारी बोहीन तान देखरेख केरणे लागा.

³⁷ एने तान दोषारोपान लेख तान मुंडीपोर लागाडया, काय ज्यू यहूदीयान राजा यीशु हि.

³⁸ तेवी ताहेऱ्यो दुय लुटारू एक जेवडी उगे एने एक डाखरीउगी, क्रुसांपोर चेढाविल एता.

³⁹ एने आवणारे जाणारे मुंडे आलाडी आलाडीन तान निंदा केरताला.

⁴⁰ एने ज्यो केताला का, “अरे, मंदिर पाडीन पोशो तीन दिहामाय बांधणार, स्वताह ते वोचाड! जर तू बोगवानान सोरो एय, ते क्रुसपूर रीन उतरीन आव”

⁴¹ आवो रीतीवजेसे मुख्य याजक पुण शास्त्री एने डाय डाया ह्यांच्या बरोबरी ने थट्टा केरीन केतेह एता,

⁴² ज्यो दिहराह वोचाडील, एने आपणो स्वताह नाह वाचाड नाह शेक्नु “इस्राएलान राजो” हि ऐवी क्रुस पुर रीन उतरीन आवा ते आमु तापुर विश्वास मेलूह.

⁴³ तो बोगवानानापूर विश्वास मेली; तर तो ताह होवा रेंय, तर ऐवी ताह सोडवीत ले, कारण तान कियील एता, “मी बोगवानान सोरो हि.”

⁴⁴ न्या केरीन लुटारू भी ताहे-यो क्रुसांपोर खिलना गीया एता, तान निंदा केरतीन एता.

यीशुन जीव निकलणो

⁴⁵ दिह तारीन तिसऱ्या पहरीरीन ता आखा देशाम आंधारो पोडील.

⁴⁶ सुमारे नवव्या टाईमान यीशु मोठली आवाजामाय आयडीन कियील, “एली-एली सबखुथनी?” म्हणजे हे मारो बोगवानाना, हे मारो बोगवानाना, तू माहु का सुळील?

⁴⁷ जे ताहारी उबरीयेल एता, तामायरीन केतेहेजोये हे होयलू कियेल, “हा तर एलीयाह आयेड थी.”

⁴⁸ तामायरीन एक जन जेल्दी धुवडील, एने स्पंज लेईन आंबेत बुडावल्यो, एने जेड्या टोकोहपूर मेलीन ताह चाखाछाकेरता आपील.

⁴⁹ काही जाणाह कियील, “रेहू आप, एलिया ताह वोचाडीहू आवथू कि नाहं.”

⁵⁰ तेव्ही यीशु पोशा मोठली आवाजामाय आयडीन जीव सोडील.

⁵¹ फासी देखू मंदिरान पोडदु उपेर तारीन ते बुंदे ताहवोर फाटीन टुकडा एय गीयो: एने जोमनि काटील एने दिगुड फोडीन,

⁵² एने कबरे उघाडील, एने हूवताला पवित्र माणहान मोक्तास शरीर जीवताला उठी,

⁵³ एने तान पुनरुस्थान ओवतो ते कबरे मायरीन निकलीन पवित्र नगरात गीया एने दिहरीबी देखा.

⁵⁴ तेव्ही शताधीपती एने ताहेर्यो यीशुन पाहरा केरताला, भूकंप एने जो काही एय जायेल एतो देखीन जादा बिय जायेल एता एने कियेल, “खेरीच ज्यो बोगवानान सोरो इतू”

⁵⁵ ताह मोक्तास बायकून ता गलीलामरीन यीशुन सेवा केरीन तान हेरी आवीन एता.

⁵⁶ त्या माय मरियम मग्दालिया, एने याकूब एने योसेफ ज्यान आहाक मरियम, एने जब्दीच्या सोरान आहाक एती.

यीशुह बुजणो

⁵⁷ जेवी हांजेपो इयेलपूर योसेफ नावान अरीमथाईया एक धनवान माणुह जो आपणे आप हि यीशुन चेलो एतो, आवा.

⁵⁸ त्याने पिलातुसाही जाइन यीशुन शरीर मांगील ज्यापरीन पिलातुसान आपील आज्ञा केरील.

⁵⁹ योसेफाहा शरीर लीईल, ताह साप फाडकाम गुडाळेहे,

⁶⁰ एने ताह आपणो नोवालो कबरेचए बनापुर मोठू दिगड लटकीत निकलीन गीया.

⁶¹ मरियम मग्दालिया एने दिहिरी मरियम ताहारी कबरे आहनी बोहनी एती.

यीशुन माहाणा पोर पहरो

⁶² दिहीरा एक दिह जो तियारी ओवतो चा दिह एतो, मुख्य याजक एने फरीसी पिलातुसाही टोलु कियेल,

⁶³ “ता कियेल हे महाराज, आमूह इर हि का तो लाबाड जीवतालू इतू” कियेल इतू का “मी तीन दिहान बादमाय पोशो उठूह.”

⁶⁴ सेवटे: आज्ञा आपील कि तिसऱ्या दिहावोर कबरेची पाहानारू केरील गीयी, ओहलो होवो कि तान चेला आवीन ताह चोरीते लीन जाहू तेवी फासाई धोका पिलरीन वाईट एय.

⁶⁵ पिलातुसाए ताह कियील, “तुमरीफाय जागतालो तर हि जा, तुमरे वजेसे एय तोहोलो होमाल केर.

⁶⁶ आखिर: ते जागतालो बरोबर गीया, एने देगडापूर शिक्का लागाडीन बरेचा होमाल किरील.”