मत्ती 23 - नाहाली

शास्त्री एने फरीसी

¹ तेवी यीशु गर्दीह एने आपणो चेलाह कियील,

² “शास्त्री फरीसी स्वताह मुसाहा गादिपोर बोहीन गीया हि,

³ तामुळे जे काही ते तुमूह केनार एने ते तुमूह केरुहू, एने कियील पुण तानहोस काम केरुहू नाहं कारण ते केणु पुण केरतीन नाहं.

⁴ ता ओहालो बार जाह विसणेन कठीण हि, माणहान खांद्यापूर मेलणु ता बारह स्वताह ते आपणी आंगली केरीन भी नाह हेरकावने होदते.

⁵ ते आपणा आखा काम माणहा देखणे केरता केरणू, एने ते आपणो मंत्र प्रत्रे आत्या केरणू एने आपणो फाडकान झालर लांबी केरणू.

⁶ एने खाणेन विशेष मानान हाजो जागी, एने आराधनालय माय रेणू.

⁷ एने बाजारामारीन मुख्य मिलवीन, एने माणहापोर गुरु केरीन, लेणेन ताह प्रिय लागीह.

⁸ पुण तुमूह गुरुजी केहू मा कारण तुमरो एकुच गुरु हि एने तुमूह आखा बाहाक हेते.

⁹ पृथ्वीपोर कोणीही आपणो आबुक केहू मा कारण तुमरो एकुच आबुक हि तो स्वर्गाम हि.

¹⁰ तुमूह गुरुजी केहू मा कारण तुमरो एकुच गुरु हि म्हणजे मसीह.

¹¹ पुण जो तुमरो आखान मोठू हि तो तुमरो दास एय.

¹² जो कूण जीवाह मोठू बोनाडी ताह आत्यो केरणे आवी, एने जो जीवाह आत्यो, बोनाडी मोठू केरणेन आवी.”

शास्त्री एने फरीसीन ढोंग

¹³ “हे कोपटी शास्त्री एने फरीसी, तुमु पुर हाय! तुमु माणहान विरुद्ध माय स्वर्गान राज्यान दरिनाजा बोंद केर्तेह, नाह ते तुमु तामाय जातेह एने नाह ते तामाय प्रवेश केरणारा जाणे देतेह

¹⁴ हे कपटी शास्त्री एने फारीसियो तुमु पुर हाय तुमु विधवान घेरा खाय जातेह एने देखाडणे केरीन जुलुम वार उबरीन प्रार्थना केरते रेणू ज्यान केरीन तुमूह अधिक दण्ड जुळी.”

¹⁵ हे कोपटी शास्त्री एने फरीसी तुमु पुर हाय तुमु एक जाणाह आपणे मताह माय लावणे केरीन समुद्र एने पृथ्वीपोर फिरनू, एने जेवी तो मत माय आव जाणे, ते ताह आपणेह रीन भी दुप्पट नरकान सोरान होस बोणाव देणु

¹⁶ हे आधलो वाट देखाड्णारा तुमरो हाय ओहलो जे केणु जर कूण मंदिरान शपथ लीईल तर ते कायीच नाहं पुण जर मंदिरान होना शपथ लीईल तर तो तान कर्जदार एईल जाहू.

¹⁷ हे मुर्खा एने आंधला काय महत्वान हि होना केव्ही ते मंदिर जे होनाह पवित्र करने?

¹⁸ ओवतो केणु जर कूण वेदी शपथ लेहु तर ते कायीच नाहं पुण जे ज्यापूर चढविले भेट ची शपथ लेहु तर तो कर्जदार एईल जाहू.

¹⁹ हे आंधला काय महत्वन हि भेट केव्ही ती वेदी जी मिलुहूं पवित्र करने?

²⁰ तामुळे जो शपथ खाहोव तो ती वेदी एने तीपुर सोडावील शपथ वोनापोर शपथ खाहोव.

²¹ जो मंदिरान शपथ खाहोव तो ता मंदिरामाय रेणार बोगवानान पुण शपथ खाहोव.

²² एने जो स्वर्गाची शपथ खाहोव तो बोगवानान सिहांसनाची एने तापोर बोहील दुयुन शपथ खाहोव.

²³ “हे कोपटी शास्त्री, एने फरीसी, तुमु पुर हाय, तुमु पुदिना एने सोपने एने जीरान दाहवू भाग आपणु, पुण तुमु व्यवस्था महत्वान वातू म्हणजे न्याय, एने दया विश्वासाह ज्यू वातू तुमु सोड दियील हेत्यू पुण तुमूह ज्यू वातू केरणू एतो एने त्यू सोडनु नाह एतो

²⁴ हे आधलो, वाट देखाडनारा, तुमूह मच्छर मारीन ताक्णु पुण उंटळाह गीतीते ताक्णु.”

²⁵ “हे कोपटी शास्त्री, एने फरीसी, तुमु पुर हाय तुमु तेल्यू एने वाटक्यू बाहेररीन साफ करतेह पुण मायरीन आंन्दारो एने असंयम माय बोरायेल हेते”

²⁶ “हे फरीसी तुमु आंधला हेते पेल तुमरी वाटकी मारीन गेहडू एने दोवू म्हणजे बाहेरीन खेरीच साफ एय”

²⁷ “हे कोपटी शास्त्री, एने फरीसी, तुमु पुर हाय तुमु चुनान रेंग लागाडील माहांणान होस हेते जां उपेररीन ते हाजा देखाणे, पुण माय मुरील मुर्दान आडे एने आखा प्रकार ने मलीनता माय बोराएल

²⁸ ता प्रमाणे तुमु भी उपेररीन माणहाह धर्मी देखाणु, पुण मायरीन कपट से एने अधर्मामाय बोरील हेते”

शास्त्री एने फरीसी पोर दाण्डन भविष्यवाणी

²⁹ “हे कोपटी शास्त्री, एने फरीसी तुमु पुर हाय तुमु भविष्यवाणी केरणारा भविष्यवक्तान माहणे हुदारनू एने धार्मिक माणहान माहांण बांधणु

³⁰ एने केणु जर आमु आपणो पूर्वजान वेलाम रेणा हि तर भविष्यवक्तान खुनाहा भागदार रेणा नसतू.

³¹ ज्यापरीन तुमूह स्वताह विरुद्ध गवाही आपणु कि भविष्यवक्तान घात केरनारण सोरा हेते.

³² केरीन तुमूह आपणो पूर्वजान पापाहा कर्ज बोरीन दया.

³³ हे गेयळेकान पिलानो, तुमूह नरकान दण्डम केवी वाचणेन?

³⁴ तावाजेसे देखू मी तुमरीकेरता भविष्यवक्ता एने शास्त्रान मोकलीन रेणा हि तुमूह तामायरीन केरताज घात केरुहू एने कोल्लाकतेबी क्रुस पोर चढविणारो ओवतो कोल्लाकतेबी आपणो आराधनालय माय का मारणार एने शहरा गावामाय सोनावाही केरतीन फिरणार?

³⁵ कि ताहेरया खोरामानहा रक्त पृथ्वीपोर वोईल हि तो तुमरो मुंडीपोर हिकाडणे म्हणजे खेरो हाबेलापोररीन बर्खेए सोरो जख-या ताहवोर ज्याह तुमूह एने मंदिरामाय एने वेदी हीन मारीन टाकील एता.

³⁶ मी तुमूह खेरीच किथु आवो आखा वातू आवो पिडीन मुंडीपोर पोळी.”

यरूशलेमान केरता दुख

³⁷ “हे यरूशलेमा, हे यरूशलेमा! तू भविष्यवक्तान मारीन टाकतोलो एने जो तार केरता मोकलनेमाय आवा हि तापोर दिगुड जगारील केरणू मी कोलाक वेळा ईच्छा केरील कि जीही कुकडी आपणो पिलाह एक्ठाच केरूह तोहोलोच मी पुण तारो सोराह एक्ठाच केरूह पुण तारी ईच्छा नाहां एती.

³⁸ देखू, तारो घेर तार केरता उजाड सुळील जातेह.”

³⁹ काहाकाय मी तुमूह किथु कि एविरीन तुमूह माहु ताहउर देखूह नाहं जेवीवोर तुमूह जो केनार नाहं, “धन्य हि तो जो प्रभुन नावान आविह हि.”