मत्ती 19 - नाहाली

तलाकान विषयामाय यीशुन शिक्षा

¹ ताहेरया यीशु हि वातू केयीन आपील, तेवी गलीला भाग मरीन निकलीन गीयो; एने यार्देन नदीन पुरलेउखील यहूदीयान भागाम आवा

² तेवी मटली गेर्दी तानपासाडण आविह एती, एने तान ताहारी ताह हजो किरील.

³ तेवी फरीसी तान परिक्षा देखणे केरीन आहने आवीन केणे लागिल, “काल्लोबी कारणापोररीन आपणी बायकूह सोडनु हाजो हि”

⁴ तान उत्तर आपील, काय तुमूह नाहं वोचील कि तान केरता ताह बोणावणेन, तास सुखातीहीज नर एने लाडी बोनाडीन कियील,

⁵ ता केरता माणुह आपणो आहाक आबाक आलेग एईन आपणो बायकू हेरी रेय एने ते दुयू एक डील एती?

⁶ ज्यानकेरता तो ऐवी दुय नाहं, तर एक डील हि केरीन ज्याह बोगवानजुडील हि, ताह माणुह आलेग नाहं केरणू.

⁷ तास ताह कियील, “ओवतो मुसा जो काहा ठेराव्यू कि सुटपत्र आपिन तीह सोडीन आप”

⁸ तास ताह कियील, “मुसान तुमरो मोनान कोठोरपणाकेरिन तुमूह आपणो-आपणो बायकूह सोडीन आपणेन हुकुम आपील, पुण सुरुएताच एहलो नाहं एता.

⁹ एने मी तुमूह केथु, का जो कूण व्यभिचार केरीन एने कालाबी कारणान आपणी बायकूह सोडीन दिहिरी हेरी वाराड केरुहू, तो व्यभिचार केरणे, एने जो ता टाकल्या बायकू बरोबर वाराड केरुहू, तो पुण व्यभिचार केरणे.”

¹⁰ चेला ताह कियील, “जर एदमी बायकू संबंध हि, तर वाराड नाह किरील हजो.”

¹¹ तास ताह कियील, “आखा ज्यो वचन स्वीकारून शकत नाहं, फक्त जे ज्याह हे दान आपील गीया हि.”

¹² कारण काही नपुसक हि, ते आईकने उदरी इही जन्मले, एने काही नपुसंक इही हि, ज्यान “माणहान नपुसक बोणावणेन, एने काही नपुसक इही हि, जाह स्वर्गान राज्यान केरता आपणो जीवेच: नपुसक बोणाविल एतो ताह स्वीकार केरूह शकणे, तास स्वीकार केरुहू.”

सोराह आशीर्वाद

¹³ तेवी माणहान सोराह आहने लाव कि तो तापोर मेलीन प्रार्थना केरावी, पुण चेला ताह जुल्या.

¹⁴ यीशु कियील, “सोराह मारो उगे आवणे दिवू, एने ताह मोनाई केरूह मा कारण स्वर्गान राज्य ताणुच हि.

¹⁵ एने तो तान उपेर आथ मेलीन तारीन निकलीन गीयू.”

मालदार जुवान एने अनंत जीवन

¹⁶ एक माणुह यीशु उगे आवो एने ताह कियील, “हे गुरुजी, मी कानलो हाजो काम केरूह कि अनंत जीवन जुळी”

¹⁷ यीशु ताह कियील, “तू माहु हाजो विषयी का फुसीह? हाजो इही एकुच हि, पुण तेबित जीवनामाय प्रवेश केरूह इच्छितोस, तर हुकुम मान.

¹⁸ जुवान ताह कियील, काल्ली आज्ञा” यीशु कियील, “हे कि खुन मां केरू, व्यभिचार मां केरूह, चोरी मां केरूह, खोटी गवाही मां आपी,

¹⁹ आपणा आबुक एने आपणी आहाक यान सन्मान केर, एने आपणो शेजाऱ्यावर प्रेम केर.”

²⁰ तो जुवान ताह कियील, “जो आखा तर मी पालने; ऐवी कुणबी कायताहा वाती कोम हि”

²¹ यीशु ताह कियील, “जर तू पुरो एहू इच्छितो तर जा, आपणो माल वेचीन गेरीबाह आप, एने तुवा स्वर्गाम संपत्ती जुडी, एने चाला मारो पासाण आव.”

²² पुण तो जुवान जीवात होमलीन नाराज एय निकलीन गीयो, कारण तो जुलुम श्रीमंत एतो.

²³ ओवतो यीशु आपणो चेला कियील, “मी तुमूह खेरीच किथु कि धनवानान स्वर्गान राज्यातम प्रवेश केरणेन केठीन हि.

²⁴ तुमूह पोशा किथु कि बोगवानान राज्यातम धनवानान प्रवेश केरीन लेणे ज्यान पेक्षा उंटळाह हुईन नाकाम जाणू सोपो हि.”

²⁵ जो कोलाक चेला जुलुम थक्क एईन कियेल, “ओवतो कुणान उद्धार शक्य हि”

²⁶ यीशु ताऊखीर देखीन कियील, “माणहा फायरीन तर ज्यो नाहं एने शकत, पुण बोगवानानाह तर आखा काही एने शक्य हि.”

²⁷ ज्यापरीन पतरस ताह कियील, “देखू, आमु तर आखोज सोडीन तारो पासाण आवूह हि, तर आमूह काय जुळी”

²⁸ यीशु ताह कियील, “मी तुमूह खेरीच किथु का नोवीन जीवनामाय मी ताहेरया माणहान सोरान आपणा महिमान राजासनापूर बोहहू तेवी मारे पासाण चालणारा, बारा राजासनापूर बोहीन इस्राएलान बारा वंशान न्यायनिवाडू केरती.”

²⁹ एने जो कुणी घेर, बाहाक, बोणिक, आबुक, आहाक, सोरा पौ-या, खेताममाय मारो नावाकेरता सोडीन आईल हि, ताह शंभर पट जुडी, एने ताह अनंत जीवनान अधिकार जुडी.

³⁰ पुण जां पेल्ला हेते, शेवटलो एय जाती, एने जो शेवटयो हि, तो पेल्लो एय जाती.