मत्ती 18 - नाहाली

स्वर्गान राज्यामाय मोठू कूण?

¹ ता समयी चेला यीशु हे-या आवीन ताहा फुसणे लागिल का, “स्वर्गान राज्यामाय आखामाय मोठलु कूण हि”

² तेवी तो एक सोरा आपनेहेऱ्यो हादाडीन, तामाय उबराखाडीन कियील,

³ मी तुमूह किथु, का जो ताहवोर पासाण फिरणार नाहं एने सोरान होस एय, तोच स्वर्गान राज्यामाय आखामरीन मोठलु हि.

⁴ जो कुणआपणे स्वताज्या सोरान होस आत्यो केरी, तोच स्वर्गान राज्यामाय मोठो एय.

⁵ एने जो कूण मारा नावामाय ओहला एखादा सोराह मान लेणे, तो माहु आहने लेणे.

पाप केरणेन परिक्षा

⁶ “पुण जो कुणी न्या आत्या मायरीन जो मारपुर विश्वास मेलणु एका भी ठोकर खावाडी, ते हाजो एय का तान गेलामाय मोठली घेरटीन पूड बांधीन ताह समुद्राम उंडाले बुडाव देणे जुवी.

⁷ ठोकरान वजसे जगा पोर हाय ठोकर ते आवणारूच हि पुण ता माणहापूर हाय हि जान वजसे ठोकर आवणे.”

⁸ “जर तारो आथ नाह ते पाय ठोकर खावाडी, तर ताह काटीन टाक दी, काहाकाय किइल लुला बोणीन जीवनामाय प्रवेश केरणेन कोलोक हाजो हि का तू दुय आथ केव्ही दुय पाय लीन अनंत आकठाम टाकाय जाय.

⁹ जर तारो डोलो तुवाह जेठ पोचाडणार तर ताह काडीन टाकीन आप, कारण तार केरता आदोलो बोणावीन जीवनामाय प्रवेश केरणेन ज्यापोररीन हाजो हि कि तारो दुय डोला असून भी तू नरकाम जाही.”

टाकायील मेंढरान वार्ता

¹⁰ “देखू, तुमूह आत्या मोठलाह तुमु कुणीहुच तुच्छ माणहु मा, कारण मी तुमूह किथे कि स्वर्गाम तान दूत मारो स्वर्गीय आबाकने मूय कायम दिखिह रेतेह.

¹¹ काहाकाय माणहान सोरो टाकाईलाह वोचाडणे आवील हि.”

¹² तुमूह काय लागीह? कूण एक आमरी हे-या शंभर मेंढरे ओहली, एने तामारीन एखादो भटकिल्यो, तर ता नव्याण्णव ला जेंगलामाय सोडीन ता टाकीन जाईल होदणे केरणेन तो जाहू नाहं काय?

¹³ एने जर इही एय गीयो का ती ताह जुड जाय तर मी तुमूह खेरीज किथु का तो तान केरता ता नव्याण्णव जां मेंढरा टाकाय नाह एता, ओलिक आनंद नाय एय जोलोक का ता एक मेंढरान केरीन तापेक्षा होवटो आनंद करने.

¹⁴ तोहोलोच तुमरो आबुक जो स्वर्गाम हि ओहलो ईच्छा नाहं कि आवो हाणाम एकाआ पुण नाश एने जुवी.

गुनेगारान प्रती व्यहवार

¹⁵ “जर तारो बाहाक काही पाप केरतीन रेंय, तर जाइन ताह एखलाच होमजाळ, जर तो तारो होमेल तर तू ताह मिलवी लीईल हि.

¹⁶ पुण जर तारी तो होमबोलणार नाहं तर आपणेहेर्यो एक केव्ही दुय माणुह उंजू लेईन जा तान केरता कि दुय केव्ही तीन गवाही माणहान मुया मायरीन शब्दान ते निश्चित किरील जाहो.

¹⁷ जर तो तान पुण होमबोलणार नाहं तर कलीसियान माणहाह किजी जर तो तान पुण होमबोलणार नाहं तर तो तुवाह दिहरी जाती एने चुंगी लेणार सारखो एतो.”

रोकणु एने समय आपणु

¹⁸ मी तुवाह किथु कि जो काही तुमूह पृथ्वीपोर बाधहु तो स्वर्गाम बाधील जाय एने जो काही तू पृथ्वीपोर बांध हो तो स्वर्गाम उगडन्यो.

¹⁹ मी तुमूह पोशा किथे जर जो तुमरे माय दुय जन पृथ्वीपोर एखादो मांगणीकेरता एक मोन हि तर ते मारो स्वर्गीय आबापुररीन तान केरता आपील जाहू.

²⁰ काहाकाय न्या दुय केव्ही तीन मारो नावान एक्ठाच ऐतेह ताहरीक मी तामाय हि.

निर्दयी दासान वार्ता

²¹ तेवी पतरसाने आवीन ताह कियील, प्रभु मारो बाहाक कोलाक वारीन मारो विरुद्ध पाप केरुहू एने मी ताह क्षमा केरीन रेहू काय सात वेलवर?

²² यीशु ताह कियील, “मी तुवाह हे केरिननाहा कि सात वेला इहज पुण साताआ सत्तर वेला ताहवोर.”

²³ तामुळे स्वर्गान राज्यान मेल एखादो ओहलो राज्याहे-यो केरील जातेह ज्यान आपणी दासाहे-योरीन इसाब लेणेनेन एतो.

²⁴ ताहेरया तो हिशोब लेहु लागिल, तर तान सुमोर एक माणुह लीन आवा, न्यानहेऱ्यो मेंढा रुपयां कर्ज एतो.

²⁵ पुण ताहेरया तान आहने कर्ज फेडणेकेरिन कायीच नाह एता, तेवी राजाने हुकुम केरील कि तान बायकू, सोरा एने जे काही तान आहने हि आखा पाकील कर्ज चुकाडीन आपज्यू.

²⁶ ज्यापूर दासान पाया पोडीन नमन किरील एने कियील मालक धीरज देर मी आखा काही आपील आपण्यू.

²⁷ तेवी दासाहा मालकाह तापोर दया केरीन ताह सोडीन आपील एने तान कर्ज पुण क्षमा केरीन आपील.

²⁸ पुण तो दास बाहेर निकलील एने तान भेट तान एक हेरी दासाबरोबर एनी जो तान शंभर रुप्याआ कर्जदार एतो तान ताह देरील एने तान गळा दाबीन ताह कियील मारो कर्ज फेड.

²⁹ जापोर तान हेगातीई दास तान पाया पोडीन विनंती केरूह लागिल कि धीर देर मी आखा कर्ज फेडीन आपण्यू.

³⁰ तेभी पुण तान तान होमलील नाहं ताहउर ताह ठाणाम टाकीन आपील कि तो कर्ज फेडीन आपण्यू नाहं.

³¹ हि देखीन तान हेगातीई दास अतिशय दुखाम एनो एने तान जाइन हि घटना आपणो मालक्या कियील.

³² तेवी तान मालकाह हादाडळीन कियील, हे दुष्ट दासान तान केरता कि तू माहु विनंती केरील मी तारो आखा कर्ज क्षमा केरीन आपील एतो.

³³ तर ज्याफायरीन मी तारपोर दया केरील त्याप्रमाणे तानहोस दासापुर दया केरणे मां काय?

³⁴ ओवतो तान मालकाह तापोर जुलील तो आखा आपणे फेडीपर्यंत ताह यातना आपणारा होपीन आपील.

³⁵ “केरीन जर तुमूह प्रत्येक जन तुमु आपणो बाहाक मोनामरीन क्षमा केरुहू नाहं तर मारो स्वर्गातील आबुक हि तीहच भी क्षमा तुमूह केरी.”