मत्ती 14 - नाहाली

यूहन्ना बाप्तिस्मा आपणारान खुन

¹ ता समय चौथाई भाग देशान राजा हेरोदेसाने यीशुन किर्ती होमेलनो,

² एने हेरोद दासाह कियील, “ज्यो यूहन्ना बाप्तिस्मा केरणार हि, ज्यो मुरील मायरीन जीवतालू उठिल हि, केरीन तान फायरीन सामर्थ्यन काम प्रगट ऐतेह.”

³ काहाकाय ज्यो हेरोदेसाने आपणो बाहाक फिलीप्पुस ज्यान बायकू हेरीदिया जीन केरता, यूहन्नाहा देरावीन बाधील एने जेलीमाय टाकीन आपील एता.

⁴ काहाकाय यूहन्नान ताह कियील एता कि जिहा मेलणे तारो केरता हाजो नाहं,

⁵ केरीन हेरोद ताह मार टाकण्यो एतो, पुण माणहा बियीईन एती काहाकाय यूहन्ना ताह भविष्यवक्ता मानतला एता.

⁶ ओवतो हेरोदेसिया जन्मदिवसान आवा, तर हेरोदेसिया सोरिन दरबाराम नाचने कृत्य देखाडीन आनंद किरील.

⁷ ज्यापरीन तान शपथ लेईन वचन आपील, “जो काय तू मागही, मी तुवाह आपुह.”

⁸ ते ती आपणी आईकने कानाम बोलिल, “यूहन्ना बाप्तिस्मा केनारान मुंडे तेलीमाय ज्याच मान्हा वचन आप.”

⁹ राजा हेरोद दुखी एनो, पुण आपणी शपथवजेसे, एने हेरी बोहील कारण, हुकुम आपजी लागिल.

¹⁰ एने तान जेलीमाय माणहाह मोकलीन यूहन्नान मुंड काटीन टाकील.

¹¹ एने तान मुंड तेलीमाय लावील गीया एने सोरीह आपील गीया, ताह ती आपणी आहाक आहने लेईन गीयी.

¹² तेवी यूहन्नान चेला आवा एने तान शरीराह लीन जाइन गाड देना, एने जाइन यीशुह वर्तमान खोबेर किरील.

पाच हजार एदम्याह खावाडणेन

¹³ जेवी यीशु होमलील, तर तो नावीपुर बोहीन तारीन सुनसान जागापोर, एखलामाय निकलीन गीयो माणहे हे कोलाक देश-देशांम पायी तान पासाण निकलीन गीया.

¹⁴ तान निकलीन एक मटली गेर्दी देखील एने तापोर दया केरील, एने तान बिमारी हाजी किऱ्यो.

¹⁵ जेवी हांजपोर एनो तेवी यीशुन चेला तान आहनी आवीन कियील, “ज्यो सुनसान जागो हि एने वार एता हि, माणहाह केवू कि ती गावाम जाइन आपणो केरता खाणेन वेचातो लावू.”

¹⁶ पुण यीशु ताह कियील, “जा माणहा तुमुच ताह खाणेन आपु.”

¹⁷ चेला यीशुह कियील, “या आमरा फाय पांच रोटा एने दुय मासा सोडीन उंजू कायीच नाहं सोतो.”

¹⁸ तान कियील, “ताह न्या मारो आहने लीन आवो.”

¹⁹ तेवी तो माणहाह खेडापुर बोहणेन कियील, एने ता पाच रोटा एने दुय मांसाह लेदो, एने स्वर्गा उगे देखीन आशीर्वाद मांगील एने रोटा मुडी मुडीन चेलाह आप दियील, एने चेला, माणहाह आप्या.

²⁰ आखा खाइन आफ्री गीया, एने चेला उग्रील टुकडा बारा टोपला बोरीन विस्या लेदा.

²¹ एने खाणारा बायकू एने सोरा सोडीन, पांच हजार माणहे एता.

यीशुन पाणी पोर चालणु

²² तेवी तान चालूच आपणो चेला नावीपोर चेडिन कियील कि तो तान पेल्ला पुरलेउखीर जावो, ताह माणहाह विदा केरी.

²³ तो माणहाह मोकलीन, प्रार्थना केरणेन केरता दिहीरा डोंगरापोर निकलीन गीयो; एने राती तो ताच एखालो एतो.

²⁴ ता टाइम नाव समुद्रमाय लाटांनी नावी आलने बाज गीयी, कारण वारो जुलुम चालू एतो.

²⁵ एने यीशु रातीन चौथ्या पहरी पाणी पोर चालीन तान आहने आवील.

²⁶ चेला ताह समुद्रापुर चालतालु देखीन बियी गीया, एने केणे लागिल, “ज्यो भूतडो हि” एने बियीन आयडणेन लागिल.

²⁷ तेवी यीशुन चालूच तासहेऱ्यो बोल्णु कियील, “धीर देरू मी हि, बिऊ मा”

²⁸ पतरस यीशुह उत्तर आपील, “हे प्रभुजी, जर तू हि, तर माहु आपणो आहने पाण्या पोर चालणे आवणे आज्ञा केर.”

²⁹ तो कियील, “आव” तेवी पतरस नावापुर उतरीन यीशु आहने जाणेन केरता पाण्या पोर चालणे लागिल.

³⁰ पुण वाराह देखीन बियीन गीयो, एने ताहेरया बुडणे लागिल तर आयडीन कियील, हे प्रभुजी, माहु वोचाड.

³¹ यीशु चालूच आथ ओगांण केरीन ताह देरीन लीईल एने ताह कियील, “अरे अल्पविश्वासी, तू का शक दिरील.”

³² जेव्ही तो नावीपोर चेडिन गीया, तर वारू थोब गीयी.

³³ जा उपेरीन नावीपुर, यीशु नमन केरणे कियील, खेरी खेरीच तू बोगवानान सोरो हि.

³⁴ तू पुरलेउखीर उतरीन गनसरेतमाय पोचील.

³⁵ तावालोच माणहाह ताह आयडीन लीईल एने आहने पाहनेनआखा देशाम समाचार मोकलना, एने आखा दुखार्या तान आहने लावील,

³⁶ एने ता माणहे विनंती केरणे लागिल कि तो ताह आपणो फाडकान गोड्यास कियील आथ लागाडी दया, एने जोलाक ताह आथ लागाडील तो हाजो एय जातालो.