मत्ती 11 - नाहाली

यीशु एने बाप्तिस्मा आपणार यूहन्ना

¹ जेवी यीशु आपणां बारा चेलाह आज्ञा आप दिनू, तो तारीन निकलीन हेयराम जाइन पोरचार आपणे गीयो.

² बोन्दिखाणामाय यूहन्ना यीशुन कामाविषयी होमलल्यो तेवी आपणो चेलाह तान आहने फुसणेन केरता मोकलील,

³ “जो आवणार हि तो तूच हि, काय उजू दिहीरान वाट जुवणे”

⁴ यीशु ताह उत्तर आपील, “जो काय तुमु होमेलतेह एने देखतेह तो आखो यूहन्नाहा जाइन किवू,

⁵ कि आंधलाह देखणु, लेंगडा चालणु, कुष्ठरोगी शुद्ध ऐतेह, बैरा होमेलनू, मुरील जीवता ऐतेह एने गेरीबाह सुवार्ता जुडीह.

⁶ जो मारबाराम ठोकर नाहं, खाते ता धन्य”

⁷ यूहन्नानान जात रेणा यीशु माणहाह यूहन्नान बारामाय केणे लाग्यो का, “तुमु जेंगलामाय काय देखणेन जायील एता? वाराम आलताला जेड्या काय”

⁸ ओवतो तुमु काय देखणेन जायील एता? कोमल फाडका पिरील माणहाह? देखू, कोमल फाडका पेरणाराह राजभवनेमाय रेतेह.

⁹ ओवतो तुमु काहा जाईल एता? काय भविष्यवक्ताह देखणेन? होव, मी तुमूह किथु भविष्यवक्ताह रीन भी मोठा माणहाह.

¹⁰ ज्यू तोच हि ज्यांनबारामाय लिखील हि, “मी आपणा दूताह तार ओगांण मोकलील हि ज्यो तार ओगांण तारी वाट बोणावी”

¹¹ “मी तुमूह खेरीज किथु का, बायकून पेटारीन जेल्मो लेईल मायरीन यूहन्ना बाप्तिस्मा आपणार रीन मोठू कुनुस नाहं एनो, तेभी पुण स्वर्गान राज्याम जो आत्या से आत्या हि तो ताहरीन मोठो हि.

¹² यूहन्ना बाप्तिस्मा आपणेन दिहीरीन आजवोर स्वर्गान राज्यात शक्ती से प्रवेश एतालो, ताकवर सांडाळ लेतेह.

¹³ कारण आखा भविष्यवक्ता एने व्यवस्था भविष्यवाणी यूहन्ना आवी ताहवोर केरताला.

¹⁴ एने तुमु मान लिवू का जोस ती एलिया हि जो आवण्यो एतो”

¹⁵ जान कान हेते ता होमली लेवो.

¹⁶ “मी ओवतो पिडीन माणहान मेल कुणीहेरी केरूह? ता ते ता सोरान होस हि, जा बाजारामा बोहीन एक दिहरा आयेडीन केणु,

¹⁷ आमु तुमरीकेरता पावाली वाजाडील, तेभी तुममु नाचना नाहं, आमु तुमरीकेरता दुखान गीत गायील तेभी तुमूह दुख केऱ्या नाहं.

¹⁸ काहाकाय यूहन्ना नाह खाति एने नाह पिति आयील हि, तीभी ता ताह केणु कि ताह दुष्ट आत्मा लागिल”

¹⁹ माणहान सोरो खाति एने पिति आयील हि, एने ता केणु, “देखू, एड्ख्यो एने पिनार, चुंगीलेणारा एने पापीन हेरी” पुण ज्ञान आपणो कामानहोस खेरलो ठेराईल हि.

अविश्वास पोर हाय

²⁰ ओवतो तो नगराह दोष आपणे लाग्यो, कारण ता नगराम तो जुलुम चमत्कार केरील एतो, पुण ता मोन फिराव्या नाह.

²¹ हाय खुराजीन “हाय, बेथसदा! जा चमत्कार तुमारेमाय इयील एता ता सोर एने सिदोन एणेजुवताल, ताकुल बुखेन मोन फिराव लेता, तारी कोलिक दुर्दशा एय.”

²² पुण मी तुमूह किथु का, न्यायान दिह तुमरी सोर दशा सिदोन एने गमोरान दशा जादा सहने योग्य रेंय.

²³ एने “हे कफर्णहुमा, काय तू स्वर्गामाय वोर उचो केरनेमाय आवही? पुण तू ते अधोलोक वोर नीचे जाही, काहाकाय जां सामर्थ्यान काम तारमाय एना, जर सदोमामाय केराय जाता, ते तो आजवोर टिकीन रेतो.”

²⁴ पुण मी तुमूह किथु का, “न्यायान दिह तारी दशा से सदोम नगरान दशा जादा सहने योग्य रेंय.”

वोजासे दाबायील माणहाह आराम

²⁵ ताच टैमापोर यीशु केयो, “हे आबाक, स्वर्ग एने पृथ्वीन प्रभु, मी तारी स्तुती केरथू का, तू ज्यू वातू ज्ञानवान एने बुद्धिमान माणहान रीन लीडीन मेललील एतो, एने सोरान ओगाण मेलील हि.”

²⁶ “होव, हे आबाक, काहाकाय तुवाह ज्योच हाजो.”

²⁷ मार पिता माहु आखो होप दियील हि, एने काललाह आबाक ओलखतेहे ता सोराह नाह, एने काललाह सोराह ओलखतेहे ता आबाक नाह, एने ताह जापोर सोरू प्रकट केरेणेन होदी.

²⁸ “हे सोब मेहनत केणेवाला एने वोजासे दाबायील माणहा मार फाय आवो, मी तुमूह आराम आपुह.

²⁹ मारा जुतो उपेर विसीन लावो, एने माफायरीन हिकू, काहाकाय मी नम्र एने दिन मोनामय हि, एने तुमु आपणा मोनामय आराम पावहु.

³⁰ काहाकाय मारा जुतो हल्को एने मारो वोज हल्को एय जाय.”