यहुदा 1 - नाहाली

अभिवादन

¹ यहूदा फायरीन जो यीशु मसीहान दास एने याकूबान बाहाक हि, ता हादील जाणारान नाव जो बोगवान आबोक माय प्रिय एने यीशु मसीहाकेरता सुरक्षित हि.

² दया एने शान्ति एने प्रेम तुमूह बहूतायने प्राप्त एता रेय.

जुठा हिकाडणारे

³ हे प्रिय, ताहेरया मी तुमूह ता उद्धारच्या विषय माय लेखणाराहेर्यो अत्यंत मेहनतान प्रयत्न केरतीन रेणू एतो ज्यामाय आमु आखा भेलाईल हि, तर आत्यो तुमूह हे सोमेजणे आवश्यक जाणिल कि ता विश्वासापुररीन पुरो यत्न केरू जो पवित्र माणहान एकुच दा देखाडील गीया एता.

⁴ कारण कि कोलाक इही माणुह बागेज आमरा माय आवीन जुडील हि, ज्यान आवो दण्डाचे वर्णन जुना वेळा माय पेलूच लेखीन गीया एता: हे भक्तीहिन हि, एने आमरा बोगवानान कृपाला लबाडी बदल ताक्णु, एने आमरा एक मात्र प्रभु एने प्रभु यीशु मसीहान नाकार केरणू.

⁵ पुण कधाचित तुमूह आखा वातू इकवारी होमजाडीन गीया हि, तेभी पुण मी तुमूह आवो वातू इआवीह आपुह इच्छितो कि प्रभुन एक मालूम पोडील मिस्र देशामायरीन सोडविल्या ओवतो विश्वास नाहं आपणारा नष्ट केरीन आपील.

⁶ ओवतो ज्या स्वर्गदूताह आपणो पदान स्थिर नाहं मिलील नाहं तर आपणो बुंदे विश्वाला सोडीन आपील, तान ताह ता भीषण दिहान न्याय केरता अंधकारामाय, अनंत वेलान केरीन, बोन्दिमाय मिलील आवा.

⁷ ज्या रीतीवजेसे सदोम एने गमोरा एने तान आहने आहने च्या नगरात, जे यान हारका वाईटकामकेणार एय गीया एता एने पाक्या शरीरान पासाण लागिन गीया एता, आखटोह अनंत दण्डामाय पोडीन दृष्‍टान्त ठेरना हि.

⁸ ता रीतीमाय हे स्वानदर्शी पुण आपणा आपणा शरीराह अशुद्ध केरणू, एने प्रभु पोरत तुच्छ होमोलनु, एने उचो पदावालाहा हाजो वाईट केणु.

⁹ पुण प्रधना स्वर्गदूत मिखाएलने, ताहेरया शैतानाने मुसान डीलआगोरी वाद विवाद किरील, तर ताह हाजो उलटो केरीन दोष लागणेन हिंमत नाहं केरील पुण हे कियील, “प्रभु तुवाह जुलील.”

¹⁰ पुण हे माणहे ज्या वातूह नाहं ओळखतेह ताह हाजो वक्ता केणु एने ज्या वातूह बुद्धिहीन जनावरे ओगांण स्वभावाइहि जाणे, तान आपणो रागावलो नष्ट केरणू.

¹¹ तां पोर हाय! कारण कि ते कैनकीची चाल चाजेल, एने मोजरी केरता बिलामा हारका भह एय गीया हि, एने कोरह च्या हारका विरोध केरीन नष्ट एय गीयो हि.

¹² हे तुमरो प्रेम सभा माय तुमरो हेरी खाणु पियलू, समुद्रा माय लिकाली चटटाना सारकोस हेते, एने आपणाच पेट पेरणारे होमाल केरणारा हि; ते पाणीवालो वादलो हि, ज्याह हपा उघाडीन लेईन जातेह; पानेपडनारे निष्फळ झाड हि, जे दुय दा मोरीन गीया हि, एने मुळाफायरीन उपडी गीया हि;

¹³ हे समुद्राम जास्ती हिलकोरे हेते, जे आपणो लंज्जेचे फेड उसालने हे; दावेडोल तारा हेते, तान केरता कायम ताहवोर कालो आंधाकार ओगोयो मोरील गीया हि.

¹⁴ एने हनोख भी जो आदमान सातवी पिडीमाय रीन इतू, ज्यान विषयामाय जी भविष्यवाणी केरील, “देखू, प्रभु आपणा लाखों पवित्रा हेर्यो आविह.”

¹⁵ “का आखान न्याय केरू, एने आखा भक्तीहिनांना तान अभक्तीन आखा कामान मुंदु माय जे तास भक्तीहिन लेईन किरील हि, एने ता आखा कठोर वातून मुंदु माय जो भक्तीहिन पापकेरीह तान विरोधामाय कियील एता, दोषी ठेराव्यू.”

¹⁶ हे तर असंतृसह, कुरकुर करने, एने आपणो मुया केरीन घमंडच्या वातू केतेह, एने ते लाभ पुण लेईन मूय पाहून बढाई केरतीन रेतेह.

चेतावणी एने उपदेश

¹⁷ पुण हे प्रियांनो, तुमूह ता वातूह एर मेलू जो आमारो प्रभु यीशु मसीह प्रेरित पेलूच केरीन एय गीयो हि.

¹⁸ ते तुमूह केतेह रेतेह, “पासाण दिहामाय इही यहा केरणारा एती जो आपणी अभक्तीई अभिलाषान नुसार चालणारे.”

¹⁹ ते हे हि जे फुट ताक्णु; हे शारीरिक माणहे हि, ज्यामाय आत्मा नाहं.

²⁰ पुण हे प्रियांनो, तुमूह आपणो अति पवित्र विश्वासामाय उंन्नती केरतालून एने पवित्र आत्मा माय प्रार्थना केरतालोन,

²¹ आपणे स्वताह बोगवानान प्रेमामाय बोणावीन मेलू; एने अनंत जीवणे माय केरता आमारो प्रभु यीशु मसीहान दया से वाट देख रीवू.

²² तां पोर जा शंकात हेते दया केरू;

²³ एने जास्तीहाजो आगठीमायरीन झपटून वोचाडो; पुण ता जुलुमापोर बिय हेऱ्या दया केरू, पुण ता फाडका से भी घृणा केरू जो शरीरान द्वारे आखा खराब एय गीया हि.

आशीर्वाद

²⁴ ऐवी जा तुमूह ठोकर खाणीपुरीन वाच शकणे हि, एने आपणी महिमा जुलुम जनान ओगांण मनग एने निर्दोष केरीन उबरील केरूह शकणे,

²⁵ ता एक मात्र बोगवानान केरीन आमरो उद्धारकर्तान महिमा पराक्रम एने अधिकार, आपणा प्रभु यीशु मसीहान द्वारे जोहलो सनातन काल से हि, ऐवी भी एय एने पिडीन पिडी रेंय. आमेन.