यूहन्ना 18 - नाहाली

यीशुह देरावणेन

¹ यीशु आवो वात केयीन आपणो चेलान हेरी किद्रोन खोदरान पुरलेउखीर लेईन गीयो, ताहारी एक बोगीचो एतो, ज्यामाय तो एने तान चेला गीया.

² ताह देरीन आपणार यहूदा पुण ती जागो मालूम एती, कारण यीशु आपणो चेलान हेरी ताहारी जात एतो.

³ ताहेरया यहूदा, शिपायीन एक पलटण ला एने मुख्य याजक फरीसी वूखेर रीन फाडका एने बोला एने दिवा, एने हत्यारे लेईन ताहारी आवा.

⁴ तेवी यीशु, ता आखा वातूह जी तापोर आवूह एती होमजाडीन, निकलील एने ताह कियील, “कुणबी होदतेन हि?”

⁵ तास ताह उत्तर आपील, “यीशु नासरी” यीशु ताह कियील, “मी हि.” ताह देरीन आपणार यहूदा पुण तान हेरी उबरील एतो.

⁶ तो इही केणु, “मी हि” तो पासाण हेरकीन जोमनि पोर पोडीन गीया.

⁷ तेवी ताह पोशा ताह फुसील, “तुमूह कुणबी होदतेन हि” ते कियेल, “यीशु नासरी.”

⁸ यीशु नी उत्तर आपील, “मी तर तुमूह केईन आपील कि मीच हि, जर माहु होदतेन रेंय तर न्या जाहू दया.”

⁹ हे यानकेरीता एय गीयो कि ते वचन पुरो एय जो तास केसेल एता: ज्याह तू माहु आपील तामारीन आत्यो एका भी पुण नाहं टाकाईल.

¹⁰ तेवी शिमोन पतरसा जी तलवार, तान एती जायीन, खेचीन महायाजकान दासापुर चालाडीन तान जेवड्यू कान काट टाकील ता दासान नाव मलख एता.

¹¹ तेवी यीशु पतरसाह कियील, “आपणी तलवार म्यानामाय मेल जो प्याला मार आबोक माहु पीणेन आपील हि, काय मी ताह नाय पीवं?”

हन्नान सामने यीशु

¹² तेवी शिपायी एने सरदार एने यहूदीन पलटण यीशुह देरीन बांध दियील,

¹³ एने पेल ताह हन्नाफाय लेईन गीया, कारण ता तो वर्षी महायाजक कायफान हाहरूक इतू.

¹⁴ ज्यो तोच कायफा इतू, तान केरता यहूदियाने मसलत आपील एती कि आमरा माणहा केरता एक माणहाह मरण हाजो हि.

पतरसान नाकार केरणेन

¹⁵ शिमोन पतरस एने एक दिहरो चेलो पुण यीशुन पासाण गीया हा चेलो महायाजकान ओलखातीन एतो, यानकेरीता तो यीशु हेरी महायाजकान वाडाम गीयो,

¹⁶ पुण पतरस बाहेर बायनामाय उबरील रेणू तेवी तो दिहरो चेलो जो महायाजकान ओलखातीन एतो, बाहेर निकलील एने द्वारपालिकेला केयीन पतरसाला ऐवी माय लेईन आवा.

¹⁷ ता दासीने जी द्वारपालिका एती, पतरसाला कियेल, “काय तू पुण आवो माणहान चेला मायरीन तर नाहं ना? तो कियील, मी नाहं हि.”

¹⁸ दासव पलटण थंडीनवजसे आकठो पेटाळीन उबरीयेल शेक लेतेन एता, एने पतरसस पुण तान हेरी उबरील शेक लेतेन एतो.

माहायाजकान यीशु से पूसतास

¹⁹ तेवी महायाजकान यीशुह तान चेलान विषयी एने तान शिक्षण विषयी विचार नुस केरील.

²⁰ यीशु नी ताह उत्तर आपील, “मी जगान ओगाण उगाडी वातू केरील; आत्यो सभास्थानामाय एने आराधनालय माय जाहारी आखा यहूदी एक्ठाच एता सर्वदा शिक्षण केरतीन एने एखालामाय कायीच नाहं कियील.

²¹ तू माहु का फुसतेन हि? होमलेनारा विचार कि मी ताह काय कियील देखू, ताह मालूम हि कि आत्यो कायकाय कियील.”

²² तान ताहेरया हे कियील, तर शिपायी ज्यामरीन एकजाण जो आहने उबरील एतो, यीशुह चापट मारीन कियील, “काय तू महायाजकाह ओहला प्रकारे उत्तर आपीह?”

²³ यीशु नी ताह उत्तर आपील, “जर मी वाईट बोलनो, तर ता वाईटान गवाही आप; पुण जर हाजो केयेल, तर माहु का देतेन हि?”

²⁴ हन्ना ताह बांधील कायफा महायाजकाफाय मोकलीन आपील.

पतरसान दुसरी वार नाकार केरणेन

²⁵ शिमोन पतरसस उबरीन आगठो तापतेन लेतेन तेवी ता ताह कियेल, “काय तू भी ता चेला माय ते नाहं?” तो नाकार केरीन कियील, “मी नाहं सोतो.”

²⁶ महायाजकान दासाफायरीन एक, जो तान परिवार मायरीन एतो ज्यान कान पतरसाने काटीन टाकील एता कियील, “काय मी तुवाह तान हेरी भागाम नाहं देखील?”

²⁷ पतरस पोशा नकार किरील, एने चालूच कुकडो वाह देनो.

पिलातुसने सामने यीशु

²⁸ तेवी ते यीशुह कायफा जागे रीन काचेरीमाय लीन गीया, एने वेगीस ची टाइम एती पुण ते कचेरीन आहने नाहं गीया कारण अशुद्ध एय केरीन पुण फसहान खावणार केरूह शकणार.

²⁹ तेवी पिलातुस तान आहने बाहेर निकलीन आवा एने कियील, “तुमूह आवो माणहापूर कायताहा वातून आरोप लागाळ हि?”

³⁰ तां ताह उत्तर आपील, “जर तो दुष्कर्मी नाहं येतो तर आमु ताह तारो आथाम नाहं स्वाधीन किरील हि.”

³¹ पिलातुस ताह कियील, “तुमुच ज्याह ली जाइन आपणा व्यवस्था नुसार तान न्याय केरू.” यहूदी ताह केयो, आमूह अधिकार नाह का कुणान जीव लीजू.

³² ज्यो यानकेरीता एय गीयो कि यीशु ती वात पुरो होवो कि जी ताह हे आकारो आपतेलीन कियील एती कि तान जीव कोहलो जाहू.

³³ तेवी पिलातुस पोशा किल्लामाय गीयो, एने यीशुह हादाडीन ताह फुसील, “कारण यहूदीयान राजा हि?” पिलातुस ताह केयेल ते काय तू राजा हि.

³⁴ यीशु उत्तर आपील, “तू किथी का मी राजा हि मी राजा हि मी ज्यान केरीन जेल्मो लियील हि केरीन जगत माय आवील हि का सत्या पुर गवाही आपु जो कूण?” सत्यानही तो मारो शब्द होमेलने.

³⁵ पिलातुस जापाप आपील, “काय मी यहूदी हि? तारीच जातीनी एने मुख्य याजकने ज्या तुवाह मार आथे होप दियील हेते, तू काय किरील हि?”

³⁶ यीशु नी उत्तर आपील, मारो राज्य आवो जगान नाहं; जर मोठलो राष्ट्र आवो जगान एतो, तर मारा शिपायांनी लेढाई केरूह कि मी यहूदीयान आथे स्वाधीन नाह एनो; पुण मारा राष्ट्र ओरोस नाहं.

³⁷ पिलातुस ताह कियील, “तर काय तू राजा हि?” यीशु नी उत्तर आपील, “तू किथे कि मी राजा हि मी आवो केरता जेल्मो लियेल एने यानकेरीता जगाम आवूह हि कि सत्यान गवाही आपुह जो कूण सत्यान हि तो मारो शब्द होमलने.”

³⁸ पिलातुस ताह कियील, “सत्य काय हि?” हे केयीन तो पोशा यहूदियावुगे निकलीन गीयो एने ताह कियील, मी तर ताफायरीन केध्दीह दोष नाहं लेतेन.

मोत दण्डने आज्ञा

³⁹ पुण तुमरी जी रीत हि का मी फसहान दिह मी तुमरीकेरता एक माणुह सोड बोगवानान. ऐवी: काय तुमरी ईच्छा हि का मी तुमरीकेरता यहूदीयान राजाह सोड बोगवानान?

⁴⁰ तेवी तास पोशा आयडीन कियील, “ज्याह नाह, पुण आमरे केरता बरब्बाह सोड दी.” एने बरब्बा ते गुंडो इतू.