यूहन्ना 12 - नाहाली

यीशु पायापोर ईत्र

¹ यीशु फसहान सहा दिह पूर्वी बैथानीयामाय आवा जांबी लाजरस एतो, ज्याह यीशु मुरील मायरीन जीवतालू किरील हि.

² ताहारी तास तान केरता जेवण तियार किरील; एने मार्था सेवा केरतीन एती, एने लाजरस तान मायरीन एक एतो जो तान केरता जेवण करण्या केरता बोहील एतो.

³ तेवी मरियम लेट माखान अर्धा हेर मोंगो सुगंधीत तेल लीन यीशुन पायापोर टाकीन, एने आपणो लेट्याकेरिन तान पाया नुसेल; एने सुगंधीत तेलाकेरिन घेर सुगंधीत एय गीया.

⁴ पुण तान चेला फायरीन यहूदा इस्कर्योत नावान एक चेलो जो ताह देरावनेपूर आपण्यू एतो, केणेंन लागिल.

⁵ “ज्यो सुगंधीत तेल तीन होव रुपये माय पाकील गारीबांह का आपायेल गीयो नाहं?”

⁶ तान हि वात जानकेरता केदाली नाहं कि चिंता एती पुण जानकेरता तो चोर एतो, एने, तान आहने तान थेयली रेथे एती एने तामाय जे काही टाकील जातेह ते काडीन लेतेन एतो.

⁷ यीशु केयेल, “ताह रेणेदेन ताह मारो पुरणे जाला दिहान केरता रेहू द्या.

⁸ काहाकाय गरीब तर तुमरो हेरी कायम रेणे पुण मी तुमरो हेरी कायम रेहू नाहं.”

लाजरान विरुद्ध चाल

⁹ ताहेरया यहूदी मटली गर्दीह मालूम एय गीयो कि तो तिथ हि, ते नाहं केवळ यीशुन कारण से आवा पुण ज्ञान केरता कि लाजराला देखू, ज्याह तास मुरील ताम जीवतालो किरील एता.

¹⁰ तेवी मुख्य याजकान वजेसे लाजरस ला मारणे केरता होमच्यो तियार किरील.

¹¹ काहाकाय कि तान कारण से जादा यहूदी निकलीन गीया एने यीशु उपेर विश्वास किरील.

यरूशलेममा विजय-प्रवेश

¹² दिहीरा एक दिह जादा माणहान जे पूर्वी आवा एता हे होमलील एता कि यरूशलेम माय आविह हि.

¹³ तां खजुरान झाडान डालखा लीन, एने ताह मिलने निकेलना, एने आयेडने लागिल, “होसांन्ना! धन्य इस्राएलान राजो, जो प्रभु नाव से आविह.”

¹⁴ ताहेरया यीशुह गेदळीन शिघरू जुडना; तर तो तान उपेर बोहीन गीयो; जोहलो लेखील हि,

¹⁵ हे सियोनान सोरी, बिऊ मां; देखू, तारो राजा गेदडान पिला पोर बोहील आविह हि.

¹⁶ तान चेलो हि वात पेल्ला समजील नाहं, पुण ताहेरया यीशुन महिमा प्रगट एय गीयो तर ताह इआवीह कि हि वात तान विषय माय लिखील एती एने माणहान तान हेरी ज्योच प्रकारचा व्यवहार किरील एतो.

¹⁷ तेवी गेर्दी च्या ता माणहान गवाही आपील, जे ता टायीमा तान हेरी एता तास लाजरला माहाण मायरीन हादाडळीन मोरील मायरीन जीवतालू किरील.

¹⁸ ज्योच कारणाने माणहान ताह भेट आपणे केरता आवा एता कारण तास होमलील एता कि तान आश्चर्य कर्म देखाडील.

¹⁹ तेवी फरीसीन आपसामाय केयेल, “फूस तर केरू कि तुमरो फायरीन कायीच नाहं एहू शकणार देखू, जग तान पासाण चालतो हि.”

यूनानी माणहान यीशुह होद्णो

²⁰ जां माणहे तीवारामाय उपासना केरणे केरता आवील एता न्या मायरीन काही यूनानी एता

²¹ तास गलीलामाय ता बेथसदान रेणारे फिलीप्पुस आहने आवीन तान आहने विनंती केरील, “महाराज; आमु यीशुह भेट आपणेन ईच्छा हि.”

²² फिलीप्पुस आवीन आंद्रियास ला केयेल, तेव्ही आंद्रियास एने फिलीप्पुस ने आवीन यीशुह केयेल.

²³ ज्ञान उपेरीन यीशु केयेल, “ती टाइम आवीन गीयी हि, कि माणहान सोरान महिमा ओहलो”

²⁴ मी तुमूह खेरो खेरो किथे कि ताहेरया ताहुकवोर गोवान दाणा जोमनि पोर मेलीन मोरीन नाहं जात तो एखालो रेणे; पुण ताहेरया मोरीन जाथू, तेवी जादा फोल आपथु.

²⁵ जो आपणो जीवाह प्रिय माणने, तो ताह गोमाडी आपथु; एने जो ओवतो जगामाय आपणो जीवाह नाहहाजो होमजथी तो अनंत जीवनान केरीन तान होमाल केरूह.

²⁶ केध्दीह कूण मारी सेवा केरूह, तर मारो पासाण आवो; एने जांबी मी हि, ताआ मारो दास पुण रेंय केध्दीह कूण मारी सेवा केरूह, तान आबोक तान आदर केरूह.

यीशुन क्रुस पोर मोरणेन भविष्यवाणी

²⁷ “ऐवी मारो जीव व्याकुल हि ज्ञान केरता मी काय कियील?” हे पिता, माहु आवो वेल तारीन वोचाड? नाहं, कारण मी ज्योच कारणाने आवो वेल ताहुकवोर पोचुज हि.

²⁸ हे पित्या, आपणो नावान महिमा केर. तेवी इही आकाशवाणी एनी, “मी तान महिमा किरील हि, एने पासाणवूर केरूह.”

²⁹ तेवी माणहे उबरीन होंबलेह एता तान कियेल कि ढग आवाजकीर दिहरो केयेल, कूण एक स्वर्गदूत बोल्णु.

³⁰ ज्ञान उपेरीन यीशु केयेल, हा शब्द मारो केरता नाहं पुण तुमरो केरता आवा हि.

³¹ ऐवी आवो जगान न्याय एता हि, ऐवी जगाच्या सरदारला काडीन टाकील जाह;

³² एने मी केध्दीह पृथ्वीपोररीन उन्चोईनो जाहो, तर हि-यो माहुफाय खेचीन लेह.

³³ आपु कायताहा मरणाने मोरण्यू हे केणेन केरता तो इही बोल्णु.

³⁴ ज्ञान उपेरीन माणहान ताह केयेल, आमु व्यवस्था माय हि वात होमेल्नी हि कि मसीह कायम रेंय, ओवतो तू काय करने कि माणहान सोराह उपेर चेढाविल जाणू गर्जेन हि! हा माणहान सोरो कूण हि

³⁵ यीशु ताह केयेल, “प्रकाश ऐवी थोडच वेळा ताहवोर तुमरे माय हि जो ताहवोर प्रकाश तुमरो आहने हि तो ताहवोर चाला निकलीन जावू इही एहू नाहा कि आंधारो आवीन लेह; जो आंधाराम चलील तो तो नाहं सोमजणे का जाथी.”

³⁶ जो ताहवोर प्रकाश तुमरो हेरी हि, प्रकाशमान विश्वास केरू काहाकाय कि तुमूह प्रकाशन सोरा बोणो. हि वात केयीन यीशु निकलीन गीयो एने तापुररीन लिकाईन रेणू.

यहूदीयान अविश्वास मा दिट बोणीन रेणो.

³⁷ तान तान सुमोर ओलोक चिन्ह देखाडील, तेभी तास तापोर विश्वास किरील नाहं;

³⁸ तेभी यशाया भविष्यवक्ताचे वचन पुरोज एय जे ताह लिखील एता केयेल एता: “हे प्रभु आमरा सुवार्तोन कूण विश्वास किरील हि? एने प्रभुन भूज कुणापोर प्रगट एनो हि?”

³⁹ ज्योच कारणाने ते विश्वास केरूह शकले नाहं, कारण यशायाने हे पुण केयेल हि:

⁴⁰ तान तान डोला आंधली, एने तान मोन केठीन केरीन आपील हि; केध्दीह इही नाहं एय कि ते डोलाकेरिन देखू, एने मोनाकेरिन सोमजुहू, एने फिरहू, एने मी ताह हजो केरुहू.

⁴¹ यशायाने हि वात जानकेरता केदाली कि तान तान महिमा देखील, एने तान तान विषय माय वातू केरील.

⁴² तेभी सरदार मायरीन जादा जाणाह तापोर विश्वास किरील, पुण फरीसीमच्या कारणाने प्रगटाम नाहं मानतला एता, केध्दीह इही होवो कि ते आराधनालय माय काडीन टाकील जाह:

⁴³ काहाकाय माणहान प्रशंसा ताह बोगवानान प्रशंसाह रीन हाजी प्रिय लागणे.

यीशुन वचन: न्याय ने आधार

⁴⁴ यीशु जोरेस कियील, “जो मारपुर विश्वास करने, तो मारपुर नाह पुण मार मोकलणारान उपेर विश्वास करने.

⁴⁵ एने जो माहु दिखेह तो माहु मोकेलनाराह दिखेल हि.

⁴⁶ मी जगान उजालो बोणावीन आवूह हि, काहाकाय का जो कूण मारपुर विश्वास करने तो अंधकारामाय रेहू नाहा.

⁴⁷ केध्दीह कूण मारी वात कोलाक पुण देखतालु नाहं, तर मी ताह दोषी ठेरावीन नाहं; कारण मी जगाह दोषी ठेरावण्याम केरता नाहं तर, पुण जगान उद्धार केरणेन केरता आवूह हि.

⁴⁸ जो माहु तुच्छ माणने एने मारी वात ग्रहण केरतीन नाहं ताह दोषी ठेरावणार तर एकुच हि: म्हणजे जे वचन मी केयेल हि, तोज पासाण दिहामाय ताह दोषी ठेरिनेल.

⁴⁹ कारण मी माफायरीन वातू कियील नाहं कि; पुण आबुक जाह माहु मोकलणार हि ताणुच माहु आज्ञा आपील हि कि कायकाय केहू एने कायकाय बोलहू?

⁵⁰ एने माहु मालूम हि कि तान आज्ञा अनंत जीवन हि जानकेरता मी जे काही बोलेहे, ते जोहलो आबुक माहु केयेल हि तोहोलोच बोलेहे.”