इब्रानियो 8 - नाहाली

यीशु आपणो माहायाजक

¹ ऐवी जीवात आमु केणे बाज रेनाह, तामायरीन आखाह रीन मोठली वात जीही का आमारो ओहलो महायाजक हि, जो स्वर्गराजान महिमान वैभवान सिंहासनापोर जाइन बोहील हि,

² एने पवित्र स्थानान एने ता खेरा तम्बून दास एनो, ज्याह कुणी माणुह नाह, पुण प्रभु उबो किरील.

³ कारण प्रत्येक महायाजक अर्पण एने मोरना चेढावणे केरता ठेराव्यू जाथू तामाय जरुरी हि, कि आवो याजकाफाय पुण काही तेभी चेढावणे केरता रेणेन जुवी एता.

⁴ जर तो पृथ्वीपोर रेणू येतो तर केधीच याजक एनो नसते, तान केरता व्यवस्था नुसार अर्पण केरणार तर हेते.

⁵ ता स्वर्गामाय वाल्यू वातीन नक्कल एने सावलान सेवा केरणू; जीही मुसा मंडप बोणावणे पोर एतो, ते ताह जी चेतावणी जुडणी, “देख, जो बोयडापुर देखाडील, तीच सुचना होस बोणावजी.”

⁶ पुण ता याजकापेक्षा श्रेष्ठ सेवा यीशु मसीहाह जुडील कारण तो उंजू हाजो व्यवस्थाचा मध्यस्थ ठेरेल, तो उंजू हाजो प्रतिज्ञा माय मोदेतसे बाधील गीयो हि.

⁷ कारण जर ती पेहली वाचा निर्दोष रेती, ते तेवी दिहीरा केरता टाइम होदल्यो गीयो नाह.

⁸ पुण बोगवान माणहापूर दोष लागाडीन किथी का, प्रभु किथी का, देखू, का ता दिह आवतेह का मी इस्राएलान घेराणा हेर्यो, एने यहूदान घेराणा हेर्यो हे नोवालो वाचा केरूह.

⁹ हि ता करने होच एय नाहं, जी मी ता पुर्वजां बरोबर ता टाईमपोर केरील एती, जेवी मी तानकेरीन आथ देरीन ताह मिस्र देशामायरीन काडीन लावील; कारण ते मारो वाचा पोर स्थिर रेणा नाहं, तामुळे मी तान पावणाय किरील नाहं, प्रभु ज्याच किथे.

¹⁰ पोशा प्रभु जो किथे, कि जो वाचा मी ता दिहा बादमाय इस्राएलान घेरावाल्योह्या बाधहु, ते जो हि कि मी आपणो व्यवस्थाेला तान मोना माय टाकूह, एने तान हृदयापुर लेखुह, एने मी तानकेरीन बोगवान ठेरुह एने ता मारा माणहे ठेरती.

¹¹ एने प्रत्येक आपणो देशामायरीन एने आपणो बायाक हि लिकाडतालु आपण्यू नाहं, कि तू प्रभुह ओलेख, कारण आत्युचने वोडारोत आखा माहु सेमजीन लेहु.

¹² काहाकाय मी तान अधर्मा विषयातमाय दयाळू रेहू, एने तान पाप पोशा ज्यान केरीन केरुहू नाय.

¹³ नोवालो वाचा बनावल्या तास पेल्ला वाचान जुनो ठेरिनीन आपील; एने जी वस्तु जुनो एने जारकी एय जातेह ताह नाहीसे एय जाणे हाजो हि.