इब्रानियो 5 - नाहाली

¹ कारण प्रत्येक महायाजका मायरीन लियेल जाथू एने माणहान केरीन, ता वातून विषयी जी बोगवान संबंध ठेराव्यो जाथू, कि भेट एने पापपुर अर्पण सोडतोलो रिजी.

² तो मूर्ख एने फिरणारा हेरी नरमी से व्यवहार केरूह शकणे, तामुळे कि तो स्वताह पुण अशक्त पणा माय केडाळल्यू हि.

³ तामुळे ताह जुवी कि माणहा केरता तोहोलोच आपणे केरता पापान अर्पण चेढावती रिजी.

⁴ हे मानपानाचे पद कूण स्वताहा लेतेन नाहं, जेवीवोर हारोना सारखे बोगवानारीन ठेरायेल जात नाहं.

⁵ तोहोलोच मसीह भी महायाजक बोणणेन केरीन महिमा स्वताह लीईल नाहं, पुण ताह तोच आपील, ज्यान ताह कियील एता, “तू मारो सोरो हि, आज मीच तुवाह जेल्मो आपील हि.”

⁶ ज्या प्रमाणे तो दिहरी जागे भी केणे, “तू मलिकिसिदकान रीतीपूर कायमने महायाजक हि.”

⁷ यीशुन आपणो शरीराम रेणार दिहामाय उचो वातू माय आयेड मारीन एने आहवा गेलीन ताह जो देद्लाताहा वासाडूहु शकत एतो, प्रार्थना एने विनंत्या केरील, कि एने तान भक्तीवजेसे तान होमलील गीया.

⁸ सोरो हेरो हिकडील पुण तान दुख सहन केरीन आज्ञा मानणु शिकायो,

⁹ एने परिपूर्ण बोणावीन, आपणा आखा आज्ञा केरणारान केरी खा पिडीन पिडी उद्धार ने कारण एय गीयो,

¹⁰ एने ताह बोगवाना वूखेर रीन मलिकिसिदकान रीतीपूर महायाजकान पद जुडील हि.

विश्वासा से भटक जाणेन परिणाम

¹¹ ज्या विषयातमाय आमूह जुलुम वातू केताला हेते, ज्याह होमजणे पुण कोठीने हि, ज्यानकेरता कि तुमूह उचो होमलने लागिल हि.

¹² टाइमो फुसणे तर तुमूह स्वामी एय जाणेन जुवी एता, तेभी पुण हे जरुरी एय गीयो हि कि कूण तुमूह बोगवानान वचनाने पेल्ली शिक्षा पोशा हिकाडी. तुमूह इही एय गीयो हि कि तुमूह जेवणान बोदल्याम उंजू ताहवोर दूधज जुवी.

¹³ काहाकाय दुध पिनार सोरा तर धार्मिकता वचनाने ओलेख नोसती, काहाकाय तो सोरो हि.

¹⁴ पुण जेवण तर दायामाहाकेरता हि, ज्यान अवयव अभ्यास केरतीन हाजो चुकीत फरक ओहलोज हुशार एय गीया हि.