इब्रानियो 4 - नाहाली

बोगवानान माणहान आराम

¹ ज्यानकेरता का तान आरामामाय प्रवेश केरणेन प्रतिज्ञा एविवूर हि, तर आपुह तान बिय जुवी कि तुमरे मायरीन कोलाक जा ताउगेरीन एजाणल्या रेयीन जाहू.

² काहाकाय आमूह तानहोस सुवार्ता कियील गीयी हि, पुण होमलील वचनाने ताह कायीच फायदा एनो नाहं; कारण होमलाडनारा मोनाम विश्वासाहेर्यो बोह्ना नाहं.

³ एने आमु तान केरता विश्वास किरील हि, ता आरामाम प्रवेश केरणू, जीही तो कियील, “मी आपणो रागाईल शपथ खायील कि ते मारो आरामाम प्रवेश केर शकणार नाहं.” म्हणजे जगान सुरुवातीरीन तान काम पुरो एय जायील एतो.

⁴ काहाकाय सातवो दिहान विषयातमाय तान कां इही कियील हि, “बोगवानान सातवो एक दिह आपणो आखा कामान पुरो केरीन आराम किरील.”

⁵ एने जी जागे पोशा हे किथी हि, “ते मारो आरामात प्रवेश केरूह शकणार नाहं.”

⁶ तर ताहेरया हि वात बाकी हि कि कोलाक उंजू हि कि ते ता आरामात प्रवेश केरुहू, एने ज्याह तान सुवार्ता पेल्ली कियील गीयी तास आज्ञा मानल्याने तान माय प्रवेश किरील नाहं,

⁷ ते पोशा ता कानली तेभी विशेष दिहा ठेरिनीन ओलाक माय दिहा बादमाय दाविदान पुस्तकामाय ताह आजन दिह किथी हि. जीही देखील केईल गीया, “जर आज तुमूह तान शब्द होमेलहू, ते आपणा मोनाह कोठर केरहू मा.”

⁸ एने जर यहोशवा ताह आरामामाय प्रवेश केराव लितू, ते तान बादमाय दिहीरा दिहान चर्चा नाय एती.

⁹ केरीन होमजाडीन ली कि बोगवान माणहा केरता शब्बाथान आराम बाकी हि;

¹⁰ काहाकाय तान केरता तान आरामामाय प्रवेश किरील हि, तास पुण बोगवानान होस आपणो काम पुरो केरीन आराम किरील हि.

¹¹ केरीन आपु ता आरामात प्रवेश केरणेन प्रयत्न केरुहू, इही एणेन मां कि कूण तान सारकोस आज्ञा मानीन पोडीन जाणे.

¹² काहाकाय बोगवानान वचन जीवतालू, एने प्रबळ, एने प्रत्येक दोनधारी वालाह तलवारीन पुण जुलुम तेज हि; एने जीव एने आत्माला एने सांधे एने मोजे यान आलेग केरीन आरपार मिलतले एने मोनान ऐहिक एने पुसिलो तापासीन देखणे.

¹³ उत्पन्न किरील काल्लीज वस्तु ताउगेरीन लिकाली नाहं पुण ज्यान आमूह काम हि, तान डोलान ओगाण आखा वस्तु उघड एने प्रकट हि.

मोठलु माहायाजक

¹⁴ तामुळे ताहेरया आमारो ओहलो मोठू महायाजक हि, जो स्वर्गाहून गीयो हि म्हणजेच बोगवानान सोरो यीशु, तर आवो, आपु आपणो देरणे मजबूत देरीन रिजी.

¹⁵ कारण आमारो ओहलो महायाजक नाहं जो आमरा कोमजोरीमाय दुखी एय नाहं; पुण तो आखी वातून पारख मायरीन गीयो तेभी पुण निष्पाप निकलील.

¹⁶ तामुळे आवो, आपु कृपेने सिहासनापोर हिमंत बांधीन चाला कि आपणेपूर दया एनु, एने ती कृपा जुडणे जी गरज टाइम आमूह मदत केरुहू.