इब्रानियो 1 - नाहाली

बोगवानान वचन सोरा द्वारे

¹ पेल्लाज टाईमपोर बोगवानान वेगाला फायरीन थोडे-थोडे केरीन एने मोकता प्रकारान भविष्यवक्तान मार्फत वातू केरील,

² ज्या शेवटेस दिहामाय आमूह सोरान मार्फत वातू केरील, ज्याह तान आखा वस्तूंऊ वारिस ठेरिन्यो ताहानद्वारे तान आखा सृष्टीची बनिव्ल्या केरील हि.

³ तो तान महिमान प्रकाश, एने तान तत्वान छाप हि, एने सोब वस्तूह आपणा सामर्थ्यान वचना केरीन होमालणे. तो पापाह धोवीन उची जागीपोर राज वैभवान जेवडी उगे जाइन बोहील हि;

⁴ एने स्वर्गदूताह एतो जे श्रेष्ठ ठेरेल, जोलाक तान ताउगेरीन मोठला पदान वारिस एईन श्रेष्ठ नाव मिलाल्यु.

बोगवानान सोरान महानता

⁵ काहाकाय स्वर्गदूतामायरीन तो केवी तेभी कुणीह कियील, “तू मारो सोरो हि, आज मीच तुवाह जेल्मो आपील हि?” एने पोशो मी ज्यो, “मी जो तान आबोक हि? एने तो मारो सोरो रेय?”

⁶ एने जेवी जेष्ठ सोरा जगाम पोशो लीन आवथू, तर किथे, “बोगवानान आखा स्वर्गदूत ताह नमन केरू.”

⁷ एने स्वर्गदूतान विषयामाय हे किथी हि, “तो आपणो दूतांना वारा, एने आपणो दासाह जादा हेलेगताला आकठाम बनावथू.”

⁸ पुण सोरान विषय माय किथी हि, “हे बोगवान, तारो सिहास पिडीने पिडी रेंय: तारो राज्यान राजदण्ड न्यायान राजदण्ड हि.

⁹ तू धार्मिकता हेर्यो प्रेम एने अधर्मा बारोबर इतो राख्यो; तामुळे बोगवानान तारो हाती केरता जादा हर्ष रूप तेला केरीन तुवाह अभिषेक किरील हि.”

¹⁰ एने हे कि, “हे प्रभु, सुरुएताच तू पृथ्वीन पाया टाकील, एने स्वर्ग तारो हाथाहेर्यो कृती हि.

¹¹ ते तर ऐन जाण्यांरेवू एय जाहू, पुण तू टिकीन रेहू; एने ता आखा फाडक होस जुनो एय जाहू,

¹² एने तू ताह चादराप्रमाणे गुडालि, एने ते फाडकाहोस बोदलीन जाहू: पुण तू तोच हि एने तारो वोरोजे निवरील एय नाहं.”

¹³ एने स्वर्गदूतमायरीन तान केवी कुणीह कियील कि, “तू मारो हाजाड़ीवगे बोह, जेवीवोर कि मी तारो दुश्मना तारो पायाबुंदवालो पिडी बोनाडीन आपण्यू नाहं?”

¹⁴ कायता आखा पावणाय करणारी आत्मा नाहं, जे उद्धार मिलवीन सेवा केरणे मोकलील जातेह?