गलातीयो 6 - नाहाली

एक दिहरान मोदेद केरू

¹ हे बायहो, जर कूण माणुह काल्लाच भी अपराध माय सापडील तेभी पुण तर तुमु जर आत्मिक हि, सौम्य बायाकने आशांना होमाल केरू, कि तुमु पुण परिक्षाम नाह बोगवानानडू.

² तुमूह एक दिहरा बारिनिसू, एने यारीती मसीहान व्यवस्थाह पुरो केरू.

³ काहाकाय जो कूण काही तोत्लुने पुण आपणो जीवाह काही होमजाडणे रेंय, तर आपणो जीवाह ठेगनु.

⁴ पुण प्रत्येक जन आपणो हि काम केरता पारखीन देखू, ओवतो तेवी दिहीरा विषयी नाहं पुण आपणो विषयी ताह अभिमान केरणेन जागो जुडी.

⁵ काहाकाय आखाज माणहा आपणाच बार वीसति.

⁶ जे वचनाने शिक्षण लेनो, ता आखा हाजाला वस्तूपूर हिकाड्णार भागीदार केरुहू.

⁷ फोसू मा; बोगवान मुर्खात नाहं जोड्याय जात, काहाकाय जो पेरणु काही पेरणु तोच पाकाडणु.

⁸ काहाकाय जो आपणो शरीर केरीन पेरणेन, तोज शरीरान द्वारे नाशान कापणी काट्नार; एने जो आत्मासाठी पेरणु, तो आत्मान द्वारे अनंत जीवनान कापणी केरुहू.

⁹ आमु हाजो काम केरणेन केरता मद्तकेरदेहे सोडहुं, काहाकाय जर आमु मोकला नाहं हि तर तीबोखे कापणी केरुहू.

¹⁰ आवो केरता जेवीवोर प्रसंग जुळी आमूह आखाच हेरी हाजो केरणू, विशेषता विश्वासु बंधून हेरी.

आखरी चेतावणी एने अभिवादन

¹¹ देखू, मी केवी मोठली अक्षराम मी तुमूह आपणो आताकेरिन लेखील हि.

¹² जे माणहे शारीरिक देखाडीले केरणू तोज तुमरो खताइल केरणेन केरता दबाव ताक्णु, फक्त यानकेरीता कि ते मसीहान क्रुसाच्या कारण से देरील नाहं जाणे.

¹³ काहाकाय खतना केरणारा जीवेच हीन व्यवस्था पाळीत नाहं, पुण तुमरो संता यानकेरीता केरणेन केरता दिखेह कि तुमरी शारीरिक दशापूर अभिमान बाळगु.

¹⁴ पुण इही मां होवो कि मी दिहरा कायताहा वातून अभिमान केरहू, फक्त आमारो प्रभु यीशु मसीहान क्रुसान, ज्यान द्वारे जगान मारो नजरेम एने मी जगाच्या नजरेम क्रुस्पोर चेढील जाईल.

¹⁵ काहाकाय नाहं खतना एने बेखतना काही हि, पुण नोवालो जग.

¹⁶ हेताके नियमापुर चालूह तापोर, एने बोगवानान इस्राएलाह शान्ति एने दया आविह रेहू.

¹⁷ ओगांण तारीन कूण माणुह दुख नाहं, आपण्यू, काहाकाय मी यीशुन खुनाला आपणो शरीराम लेईन फिरणे.

¹⁸ हे बायहो, आपणा प्रभु यीशु मसीहान कृपा तुमरे आत्मा हेऱ्यो रेंय. आमेन.