2 तीमुथीयुस 1 - नाहाली

अभिवादन

¹ पौलुसा फायरीन जो, ता जीवनान प्रतिज्ञेन अनुसार जो यीशु मसीह हि, बोगवानान ईछा यीशु मसीहान प्रेरित हि,

² प्रिय सोरा तीमुथियुसाहन नावापुर: बोगवान आबुक एने आमारो प्रभु यीशु मसीहफायरीन तुवाह कृपा, दया, एने शान्ति जुडती रेय.

धन्यवाद एने प्रोत्साहन

³ ज्या बोगवानान सेवा मी आपणो पूर्वजान रीतीपूर शुद्ध विवेकाने केरतीन हि, तान धन्यवाद करने कि मी आपणो प्रार्थनाम निरंतर करने,

⁴ एने तारो आहवा केरीन-केरीन रात दिह तुवाह मिलणेन ईच्छा केरतीन रेती कि, आनंदमाय बोरीन जाहू.

⁵ माहु तारो ता केरणे निष्कपट विश्वासाआ आवी जो पेल्ला तारी आजाली लोईस, एने तारी आहाक युनी माय एतो, एने माहु खात्री हि कि तुमाय पुण हि.

⁶ तान केरताच मी तुवाह केरीन आपथु, कि तू बोगवानान ता वरदानाह जे मारा आथ तारपोर मेलील जे मिलना हि वापरणे केरीन आप.

⁷ कारण बोगवानान आमूह बिणारा नाहं पुण सामर्थ्या एने प्रेम एने सयमांची आत्मा आपील हि.

⁸ तामुळे आमरा प्रभु च्या गवाही केरीन, एने मारीवजेसे जो मी तान बोन्दि हि लाजवायल मां पुण ता बोगवानान सामर्थ्या नुसार सुवार्ता केरीन मारहे-या दुख सहन केर.

⁹ ज्यान आमरा उद्धार किरील हि एने पवित्र पाचारानाने हादाडील, एने हे आमरा कामापुररीन नाहं; पुण तान उद्देश एने ता कृपान अनुसार हि जे यीशु मसीहा माय युगान कालाम पेलुरेनुच आमऱ्येपुररीन एयील हि,

¹⁰ पुण ऐवी आमारो उद्धार केरणार यीशु मसीह प्रकट ला द्वारे प्रकाशित एय गीयोह, जो मरणाह नाश केर दियील हि, एने जीवन एने अमरताह तां सुवार्तान द्वारे प्रकाशमान केर देनो

¹¹ जानकेरता मी पोरचारक, एने प्रेरित, एने सुवार्ता भी ठरिनिल्यो.

¹² ज्यानकेरता पुण मी हे दुख पुण सहन करने, पुण लाजवाईल नाहं, कारण मी ताह ज्यापूर मी विश्वास किरील हि, मी ताह ओळखणे; एने माहु खात्री हि कि तो मारो धोरहराची ता दिहावोर रक्षा केरूह शकणे.

¹³ ज्या खेरा वातू तू माफायरीन होमल्या हेते ताह ता विश्वास, एने प्रेमानवजेसे, जो यीशु ख्रीस्तात हि आपणो आदर्श बोनाडीन मेलील.

¹⁴ एने पवित्र आत्मान द्वारे जो आमरा माय वचुरुरा हि, आवो हाजो धोरहराची रक्षा केरूह.

¹⁵ तुवाह मालूम हि कि आशिया चे आखा माफायरीन आलेग एय गीयो हेते, ज्यामाय फुगीलूस एने हिरमुगीनेस हेते.

¹⁶ उन्नेसीफुरूसच्या परिवारापुर प्रभु दया केरणे जुवी, कारण तान जादा वेळा मारो जीवाह ठावको किरील हि एने मारो कैदेत लाजवातलु नाहं.

¹⁷ पुण ताहेरया ते रोम माय आवा, तर मोठला केणेन माणहा होदणे मारी भेट लीईल.

¹⁸ प्रभु केरणे जुवी कि ता एक दिह तां पोर प्रभुन दया रेणार एने जी जी सेवा तास इफिसुस माय केरील हि ते पुण तुवाह हाजे मालूम हि.