2 कुरिंथीयो 5 - नाहाली

आपणो स्वर्गाम वालो घेर

¹ काहाकाय आमूह मालूम हि कि जेहीकाय आमरा पृथ्वीपोर्यो मंडपामाय सारखो घेर बोणावणेन जाहो, तर आमूह बोगवाना फायरीन स्वर्गाम एक इही जुळी जे आथान बोनाडील नाहं, पुण कायमस्वरूपी हि.

² याम तर आमु केणेन एने ईच्छा करने आपणो स्वर्गीय घेराह रीगाडीन लेणेन.

³ कि हे पेल्या आमु उखडो सापडील नाहं.

⁴ एने आमु आवो मंडपाम रेथे एतालून दाबावु दाबीन कण्हत रेणे, काहाकाय आमु काडनु नाहं पुण पेहू केरुहू मागणे, तो जो देनारा हि जीवनामाय बुडीन जावा.

⁵ ज्यान आमूह आवो वातू साठीच बोणाविल हि तो बोगवान, ज्यान आमूह आत्मा केरीन आपील हि.

⁶ म्हणजे आमु कायम हिमंत देरीन रेणे एने हे मालूम हि कि जेवीवोर आमु शरीराम रेणे, ताहउर प्रभु फायरीन आलेग हेते.

⁷ काहाकाय आमु मूय देखीन नाहं, पुण विश्वासान चालणो.

⁸ तामुळे आमु हिमंत देरीन रेणे, एने शरीरांपुररीन आलेग एईन प्रभु हेर्यो रेणे उंजू हाजो होमजथी.

⁹ ज्यानकेरता आमरा मोनान शोखहोय जिच हि कि जर हेरी रेणा, पुण आमु ताह पुटीह रेणेन जुवी.

¹⁰ काहाकाय हे जरुरी हि कि आपु सोबान वागणू मसीहान न्यायान प्रतेक जाणाह ओगाण उगडीन जाणेन जुवी, म्हणजे प्रत्येक माणुह आप आपणा हाजो हाजो वाईट शरीर कामा प्रतिफोल जो ताह आखठापुररीन किरील हि मीलनार.

बोगवाना हेरी मेल मिलाप

¹¹ तामुळे प्रभुन बिय आमु माणहाह होमाजाडणे; पुण बोगवानान आमरी वागणू उघड हि, एने माहु आशा हि कि तुमरो विवेक भी उघड एय गीयोह.

¹² आमु तेभी पुण आमरी प्रशंसा तुम्राओगाण केरतीन नाहं, पुण आमु आपनाबारामाय खत केरणेन संधी आपथु कि तुमूह ताह उत्तर आपुह, शकणार? तुमूह कि जे मोनापुर कायनय पुण देखानार वातुपोर खत केरणू.

¹³ जर आमु बेशुद्ध हेते तर हे बोगवानान केरता एने जर शुद्धीपूर रेंय तर ते तुमरीकेरता.

¹⁴ काहाकाय मसीहान प्रेम आमूह विवेश केरीन आपीह; कि तामुळे आमु हे होमजथी कि जर एक आखाहेर्यो मोरणु तर आखा मोराना.

¹⁵ एने ते यावजेसे आखाहेर्यो मोरणु कि जो जीवतालू हि, ते ओगाण आपणे केरता जीवतालू एणेन मां पुण तान केरता जो तान केरता मोरणु एने पोशा जीवतालू एनो.

मसीह माय नोवाली सृष्टी

¹⁶ ज्यानकेरता एविरीन आमु कुणबी शरीराप्रमाणे समजी नाहं. म्हणजे आमु मसीहान पुण शरीराप्रमाणे समजील एता, तेभी पुण एविरीन ताह इही समजी नाहं.

¹⁷ तान वजेसे जर कूण मसीहात हि तर तो नोवो सृष्टी: हि जुना वातू निकलीन गीया हेते: देखू, आखा वातू नोवालो एईल हेते.

¹⁸ आवो आखा वातू बोगवाना फायरीन हेते, तान मसीहाद्वारे आपणेहेर्यो एक्ताहोने केरीन लियेल, एने मेल मिलापाची सेवा आपणो आथाम आपील.

¹⁹ केरीन बोगवानान मसीहाम रेयीन आपणेहेर्यो जगान एक्ताहोने केरीन लियेल, एने तान अपराधान दोष तां पोर लागाडया नाहं, एने तान मेल मिलापाचे वचन आमूह होपीन आपील हि.

²⁰ तान वजेसे आमु ख्रीतान राजदूत हेते; जिहकाय बोगवान आमरा द्वारे विनंती केरतीन हि. आमु मसीहा फायरीन नेवतो करने कि बोगवाना हेर्यो मेल मेलणु केरीन ली.

²¹ जो पाप्याफायरीन एजानल्यो एतो, तुहा तान आमरे केरता पापी ठेरायेल कि आमु तामाय एईन बोगवानान धार्मिकता बोणाविल.