2 कुरिंथीयो 13 - नाहाली

आखरी चेतवणी

¹ ऐवी तिसऱ्या टाइम मी तुमरो आहने आवथू; दुय केव्ही तीन गवाहीदारांच्या मुया मायरीन प्रत्येक वात निवाड केरील जाहो.

² जोहलो मी ताहेरया दिहीरा टाइम तुवाहेर्यो एतो, तोहोलोच ऐवी सेटो रेथे येतो ता माणहाहे-यो तान केरता पेल्ला पाप किरील, एने दिहीरा आखा माणहाह ऐवी पेलूच केयीन आपथु कि जर मी पोशा आवूह तर सोडणार नाहं,

³ कारण तुमूह तर ज्यान प्रेमान मागनु कि मसीह मारामाय बोलीह, हि जे तुमरीकेरता अशक्त नाहं पुण तुमरे माय समर्थी हि.

⁴ तो तुमरे वजेसे क्रुस पोर चेढांविल गीयो, तेभी पुण बोगवानान सामर्थ्यान जीवतालू हि. आमु पुण तामाय अशक्त हि पुण बोगवानान सामर्थ्यान तुमरो केरता हि, जेहीकाय जीवतालू रेहू.

⁵ स्वताह पारखीन देखू का तुमु विश्वास माय हेते का नाहं. स्वताह पारखीन देखू. काय तुमूह स्वताहन विषयी मालूम नाहं का यीशु मसीह तुमरे माय हि? नापून तुमूह पारखिल बिनकामान हेते.

⁶ पुण मारी आशा हि का तुमूह मालूम एय जाय का तुमूह बिनकामान नाहं.

⁷ आमु आपणा बोगवानान हि प्रार्थना करने कि तुमूह कायीच वाईट केरूह नाहा, तान केरता नाहं कि आमु खेरो देखील जुवी, पुण तान केरता कि तुमूह हाजो केरणे जुवी, जर आमु बिनकामात ठेरणार.

⁸ काहाकाय आमु सत्यान विरोधामाय कायीच केरूह शकत नाहं, पुण सत्याकेरिन केरूह शकणे.

⁹ जेहीकाय आमु अशक्त हेते एने तुमूह बलवंत हेते, तर आमु आनंद एतो, एने हि प्रार्थना पुण करने कि तुमूह पुरो एय जाणेन जुवी.

¹⁰ ज्यानकेरता जर तुमरो पासाण आवील वातू लेखातालु, कि उपस्थित एयमाहु ता अधिकारा प्रमाणे ज्याह प्रभुने बिगाडणारकेरता नाहं पुण बोनाडाणे केरीन माहु आपील हि, केठीन पणाने वागु नाहा.

अभिवादन

¹¹ सेवट हे बायहो, आनंदमाय रीवू; तुमु तुमरी जादासे जादा सुधारणा केरू; इमुत मेलू; एक मोन मेलू; मेलसे रीवू, प्रेम एने शान्ति दाता बोगवान तुमरे हेर्यो रेंय

¹² एक दिहीरा पवित्र गुल्यादीन नमस्कार केरू.

¹³ आखा पवित्र माणहे तुमूह सलाम केणु.

¹⁴ प्रभु यीशु मसीहान कृपा एने बोगवानान प्रेम एने पवित्र आत्मान सहभागिता तुमरे आखा हेरी एते रेंय.