1 थिस्सलुनिक्यो 3 - नाहाली

तीमुथियुसाह मोकलणेन

¹ ज्यानकेरता जेवी आमु से नाहा रेवानो नाह, ते आमूह दोम देरानो नाह का अथने माय एखालो रेंय जाय;

² एने आमु तीमुथियुसाह जो मसीह धेरनु आमारो बाहाक एने बोगवानान सुवार्ता दास हि, ज्यानकेरता मोकलील कि तो तुमूह मजबूत केरणूताहा तुमरो विश्वासापुररीन तुमूह होमाजाडणे,

³ कि कूण आवो रागाईल बियीन जाहू नाहा. कारण तुमूह स्वताह होमेजणु कि आमु ताजकेरिन निवाड किरील हि.

⁴ कारण पेलूच, आमु तुमरीफाय एता तेवी तुमूह किथी एतो कि आमूह दुख सोसावे लागणार, एने ओहलाच एय गीयो हि जोहलो तुमूह मालूम हि.

⁵ ज्यानकेरता माफायरीन उंजू रेवायनाहा नाहं, तर तुमरो विश्वासाआ संबंधावजेसे विचार नुस केरणे मी मोकलील हि कि कां इही एणेन मां कि परिक्षा केरनारामाय तुमरी परिक्षा केरील रेंय, एने आमरा मेहनत वाया गीया रेंय.

तीमुथियुस द्वारा समाचार जुडणो

⁶ पुण ऐवी तीमुथियुसाहने, तुमरेफायरीन जो आमुफाय आवा हे, तुमरो विश्वास एने प्रेमाची सुवार्ता होमलावीन एने आवो वातूह पुण होमलावत्लू कि तुमूह दाडीन प्रेमाकेरिन आमरी इआवीह केरणू, एने आमूह देखणेन ईच्छा केरणू, जोहलो आमु पुण तुमूह देखणेन ईच्छा करने.

⁷ तामुळे हे बायहो, आमु आपणो आखा दुखा माय एने शळात तुमरो विश्वासान तुमरो विषयी शान्ति जुडी.

⁸ कारण ऐवी जर तुमूह प्रभु माय स्थिर रेणा तर आमु जीवतालू हि.

⁹ एने तोहोलोज आनंद आमूह तुममुळे आमूह आपणो बोगवानान सुमोर हि, तान बोदल्याम तुमरेबाराम आमु कायताहा प्रकारे बोगवाना हेर्यो आभार मानेतू?

¹⁰ आमु रात दिह जादा प्रार्थना केरतीन रेणे कि तुमरो मूय देखहु विश्वासाचे थोडो पुरो केरणू.

¹¹ ऐवी आमारो बोगवान एने आबोक आपुच एने आमारो प्रभु यीशु, तुमरीफाय हाजामाय आमरा मार्गदर्शन केरणू;

¹² एने प्रभु इही केरणे जुवी कि जोहलो आमु तुमरे पोर प्रेम करने, तोहलोच तुमरो प्रेम पुण हाती एने आखा मान्हाहेर्यो वादनेह, एने विपुल वोडते रेय.

¹³ म्हणजे तो तुमरो मोनांह ओहलो मजबूत केरू का ताहेरया आमारो प्रभु यीशु आखा पवित्र माणहाहे-यो आवूह, तर ते आमारो बोगवान आपणो आबोक ज्यान ओगाण पवित्र तामाय निर्दोष रेणेन जुवी.