1 थिस्सलुनिक्यो 2 - नाहाली

पौलुसान पोरचार कार्य

¹ ऐ बायहो, तुमरे माय आमरो आवणेन वाया नाह गीयो, ज्यो तुमूह भी मालूम हि.

² पुण तुमूह स्वताह होमेजणु फिलीप्पी सुरुएताच दुख सहन केरणे एने उपद्रिन केरतालोन पुण बोगवानान आमूह ओहलो हिमंत आपील, कि आमु बोगवानान सुवार्ता इही केठीन विरोध एतालून पुण तुमूह कियील.

³ कारण आमरी हिकाडणो भ्रमसे नाहं केव्ही अशुद्धतेणे नाहं, एने कपट पुण नाहं;

⁴ पुण जोहलो बोगवानान आमूह योग्य ठेरिनीन सुवार्ता होपील हि, आमु तोहोलोच वर्णन करने, तामाय माणहाह नाहं, पुण बोगवानान, जो आमरा मोनाह होमजथी, ताह आनंद केरतीन असतो.

⁵ कारण तुमूह मालूम हि कि आमु केवी चापलुसी च्या वातू केरतीन एतो, एणेन लोभासनी नाटक केरतीन एतो, तान बोगवान गवाहीदार हि;

⁶ एने जर आमु यीशु मसीहान प्रेरित एणेसे तुमरे पोर दबाव टाक शकत थु एतो, तीभी आमु माणहान आदर नाह होदते, एने तुमूह नाहं तर दिहीराह पुण नाहं.

⁷ पुण ज्या प्रमाणे आहाक आपणो सोरो सोरान पोहणे पालनो केरूह, तोहोलोच आमु पुण तुमरे माय रेयीन स्नेह देखाडील हि;

⁸ एने तोहोलोच आमु तुमरी ईच्छा केरतीन एता, ओलख नाहं तर बोगवानान सुवार्तापूर आपणो जीव तुमूह आपणेन तियार एता, तामुळे हि तुमूह आमरा प्रिय एय गीया एता.

⁹ कारण, हे बायहो, तुमूह आमरा परिश्रमाला एने मेहनत केरणार इर आविह मेलतेन; आमु तान केरता रात दिह कामधंदा केरतीन तुमरो माय बोगवानान सुवार्ता पोरचार केरील कि तुमरे मायरीन पुण कुणापोर हि दबाव आवहू नाहा.

¹⁰ तुमूह स्वताह च गवाहीदार हि, एने बोगवान पुण गवाहीदार हि कि तुमूह विश्वासामाय आमरा वागणू केवी पवित्र एने खेरो एने निर्दोष रेणू.

¹¹ तुमूह मालूम हि कि तोहोलोज आबुक आपणो सोराहेऱ्यो वागीह, तोहोलोच आमु पुण तुमरे मायरीन आखाह शिक्षण आपथु, एने शान्ति आपथु, होमाजाडणे.

¹² कि तुमरो वागणू बोगवानान योग्य एय, जो तुमूह आपणो राज्यातम एने महिमात हादुहु हि.

¹³ तामुळे आमु पुण बोगवानान कायम धन्यवाद करने कि ताहेरया आमरे पोररीन बोगवानान वचन तुमरेहे-यो पोचेल, तेवी तुमूह ताह माणाहान नाहं पुण बोगवानान समजून (एने खेरी खेरीच हे ओहलाच हि) इही समजून स्वीकारून लीईल; एने तो विश्वास माय जो विश्वास मेलील, तो प्रभावशाली हि.

¹⁴ तामुळे तुमूह, हे बायहो, बोगवानान ता कलीसियासारखी वागणू केरू जे यहूदामाय मसीह यीशु माय हि, कारण तुमूह पुण आपणो माणहा फायरीन तोहलोच दुख मिळवील जोहलो तास यहूद्यांफायरीन मिळवील एतो,

¹⁵ तान केरता प्रभु यीशुह एने भविष्यवक्त्यांहा पुण मारीन टाकील, एने आमारो वेखडणु किरील, एने बोगवान तान केरता आनंद नाहं, एने ता आखा माणाहान विरोध केरणू,

¹⁶ एने ते दिहरी जातीही तान उद्धारान वातू केरणेम आमूह उभराखील कि कायम आपणो पापान क्षमा एता रेणार; पुण तां पोर बोगवानान जाहखो राग आवीन सुक्यू हि.

कलीसिया हेरी मिलाणेन ईच्छा

¹⁷ हे बायहो, जेवी आमु थोडच वेला केरता, मोनाम नाहं पुण उघड, पुण आलेग एनो एतो, तर आमु मोठला ईच्छा तुमरो मूय पालीलाकेरता उंजू जुलुम प्रयत्न किरील.

¹⁸ तामुळे आमु (म्हणजे मी पौलुसुसाने) इकवारी नाहं पुण दुयीवारी तुमरेहे-यो आवील प्रयत्न किरील, पुण शैतान आमूह थोबाडीन रेणू.

¹⁹ कारण आमरा आशा केव्ही आनंद केव्ही महिमान मुकूट काय हि? काय आपणा प्रभु यीशु सुमोर तान आवणारा टाइम तुमूह रेहू नाहं?

²⁰ आमरा महिमा एने आनंद तुमुच हेते.