Taetɔ̌ 2 - Nyesoaa Kuo Win Jajle

Noǎ Bò Tee Lee Nyopò

¹ Keǒ Nyesoaa tee noǎ nu ɛɛ ble popoɛ, kě kɔ̀n bò nu nyopò teea ke bu nuu kmɔ̌ neneɛ.

² Tee kunkunyo ke bu nuě jǐ mǒ bo tbatba klee bu nu noǎ nyopò miǒ u tùtuɛ nye klee bu jiǒ uu chɛ̀ɛ wlò mɔ̀ kwa bleblɛ̌. Uu tè wlò popoɛǒ u kɔnʼɔ klě Tentǎn Jǔ Jùsu mǒ bɛ nyna bo kpankpa klee bu noɛɛ Nyesoa klee tùonyopo mǒ plě bu ji tǐ jakě wùɛ jebo nynanyna.

³ Dɛɛ doǒ nɛ̀ bò nu, tee nynekpaklě bu ne kàan kmɔ̌ nyopò miǒ u tùtuɛ nye klee buǔ pe nyopò tùu sen dlǒ le klee buǔ nɛ̌ nmɔ ɛɛ̌ ni nu, kɛɛ bu moo kàan dɛɛ tee nyo

⁴ ɛ̈ di ɛɛ numa u mǐ kofa nyno tee le keǒ bu noɛɛ uu jbeapò klee jlǔ mǒ klee

⁵ bu jiǒ uu chɛ̀ɛ wlè mɔ̀ kwa bleblɛ̌ plě u miě mɔ̀le snǎ klee u mǐ kàan nyno tù klee u mǐ kàan wlò kɔn plě u miě uu jbeapò tùtuɛ nye ɛ̈ di ɛɛ numa nyu wùɛ ɔɔ̌ diǒ Nyesoaa winʼà dɛ kukǔ jleě mǒ boɔ.

⁶ Tmɔɔ̌ nyengmè bu jiǒ uu chɛ̀ɛ wlè mɔ̀ kwa bleblɛ̌ ke.

⁷ Nè chɛ̀ mò bɔ moo ɛɛ jboo dɛ keǒ u mɔ̀ keǒ kàan noǎ wùɛ mìi numa mɔ̀. Bò ke tee le, nu ɛ bu ji ɛ ɛ̈ moo noǎǒ tèe le sɛ̀n ɛ nynɛ̌ plě i moo kàan tè è boɛ li.

⁸ Nè boɔboɔ win bi pàe chnɛ̀ le ï nyu wùɛ slě wɔ̀ bɔ boɔǒo dɛ jleě mǒ ɛ̈ di ɛɛ numa nè jlae nyo mǒ tònwe měne be plě uǔ di dɛ kukǔ kɔn u miǒ ämoo jleě mǒ boɔ.

⁹ Tee na wien po nyebajle klee nynejlu bu nyeǒ uu chì kpa ämopò tùtuɛ tǐ wùɛ mɔ̀ klee bu tɛ̀n ɛ mǒ keǒ bu bloo uu plɔ. Bo uu chì kpa ämopò bǔ klě u mɔ̀ boɛ, uǔ jɛɛ win de uǔ boɛě u mɔ̀

¹⁰ klee uǔ jlǐ u le, kɛɛ bu tee ɛ ɛ̈ moo u mǎ lě bo sèn tɛɛ ɛ̈ di ɛɛ numa dɛ wùɛ u mii numa ɛ mǐ teeaà ä tee lee kàan nynɛ̌ nye ɛ̈ kwɛɛǒo Nyesoa jleě mǒ bo Ɔ̈ moo äa Gblàgbla Nyu.

¹¹ Nyesoa po Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ ä mɔ̀ pepě mǒ, nɛ̀ nu ɛ ɛ̌ wɔ̀le ɛ keǒ nyopò wùɛ bu gblàe le klě uu kpni kukwǐi plɔɔ tu kɛn bo maěa bobo.

¹² Ɔ tee ɛ ä le keǒ bä tɛ äa se Nyesoa ji kmɔ̌à bo klee kmɔ̌ɔ noǎ ä jlɛ̌ɛ, è bä jiǒ äa chɛ̀ɛ wlò mɔ̀ kwa bleblɛ̌ klee bä siǐnʼǒ jebo plě klě tǐà wlòmo bä nee Nyesoa dɛ kmɔ̌ kělɔ kmɔ̌à ä neɔɔ mɔ̀

¹³ ɛ̈ kɔn ämo fee ü kuun ɛ wlò je keǒ ngmna ä miǎa kɔnma mɔ̀ bo äa Nyesoa Ɔ̈ kɔn tè kuun plě ï boǎa jǐ klee äa Wowa Nyu Jùsu Tentǎn Jǔ Bǔ wǒǎ tàmo.

¹⁴ Tentǎn Jǔ koǒǒ äa tèe tà keǒ ä mǒ dbǐ mǒ wan klě kmɔ̌ kukǔ wùɛ slè plě Ɔ mǐ ä mɔ̀le snǎ nyo mǒ nu ü kɔnʼǒ Ɔɔ mɔ̀ɔ do plě ü kɔn fě nymɛ̌ɛ bü nuu kàan dɛ.

¹⁵ Noǎǒ nì bò tee le. Nyesoaa kpě wùɛ nì bò nu mì nyopò kbě ja le po klee mìě u snǔ mɔ̀le po kàan wɛ̀. Nè sonwɛǒ nyu wùɛ mɔ̀ mǒ ɔɔ jleě ɛɛ̌ dli mò.