Wlǔmɔ 9 - Nyesoaa Kuo Win Jajle

Nyesoaa Nyopò Ǐsòwɛ̌ Kwɛɛn

¹ Ě tmɛɛ̌ a kàan tè wòje Tentǎn Jǔ, ně tmɔ̌ sen. Ngmà Je Ne Sùsu Nɛ̀ jboo ɛ ně tè le jbojbɛ le plě Nɛ̀ nu ɛ Ě kuun ɛ wlò je

² bo ke bò dɛ̌ ɛ̈ moo ně wlò be wɔ̀ɔn chɔɔ plě Ě kɔn chnechně dɛ ɛ̈ see dɛ bobɔ̌ kɔn klěě wlò jleě

³ keǒ ně nyopò Ǐsòwɛ̌ kwɛɛn mɔ̀ ü moo ně chɛ̀ɛ kmɔ̌ wǒ nyo. Bɛ̌ nu bɛ̌ diiǒ u mɔ̀ mǎma, Ě mii ɛ kɛn wɔɔnma keǒ Nyesoa Bɔ bɛ̌ɛ̌ mǒ na slè mumuɛɛ wun kɛn plě Ě miiǒ Tentǎn Jǔ jleě mǒ sàe le.

⁴ Nyesoa nu u mǒ Ɔɔ jlǔ Ɔ̌ nye u tè jǐ boaboǎ Ɔ̌ po kuo win keǒ u mɔ̀ Ɔ̌ nye u Ɔɔ teteǎ plě Ɔ̌ tee u ke bu nu Ɔɔ wɛ̀ sèsa plě Ɔ̌ pooě u noǎ.

⁵ Nù moo äa gbeǐpòo jlǔu jlǔ. Klě tùonyu tǔn mǒ Tentǎn Jǔ moo u nyuu do ke. Nɛ bo Nyesoa Ɔ̈ neěe noǎ wùɛɛ dlǒ jleě Bɔ kɔn baea tǐ wùɛ mɔ̀, kě bɛ ne.

⁶ Ɛ se ɛ nynɛ̌ sɛ̀n ɛ̈ moo Nyesoa seae Ɔɔ dɛà le ɛ̈ Ɔ je Ɔ mii numa. Ɛ se nyopò wùɛ ü moo Ǐsòwɛ̌ɛ jlǔu jlǔ u se Nyesoaa jlǔ.

⁷ Ɛ se Eblɛ̌hɛ̀moo jlǔu jlǔ wùɛ u se Nyesoaa jlǔ. Bi beě a wlò jleě dɛ Nyesoa tmɔɔ̌a Eblɛ̌hɛ̀mo ɛ̈ moo, “Aesěèe jlǔ nù u mi nè jlǔu jlǔ daeba.” (Gen 21.12)

⁸ Ɛ se nynɛ̌ sɛ̀n bǎ moo nyu tɔ̀ɔ jlǔu jlǔ ɛ se a Nyesoa nyo mǒ numa mu, kɛɛ bǎ moo Nyuà Nyesoa peeě Ɔɔ mɔ̀ na nyo nɛ̀ mi a Nyesoaa nyo mǒ numa.

⁹ Nyesoa peeaě ɛ Eblɛ̌hɛ̀mo Ɔ je, “Tǐi doà a nee kɛn bǐ keaǒ nyni Ě miǎ je tbaeba, è Selɔ̌ miǎ jbɛjuju kɔnma.” (Gen 18.10,14)

¹⁰ Ɛɛ doǒ ɛ sea pee dɛ, tà Wlibɛkɔ̌ neaa jlǔu kwlě mǒ keǒ äa gbeǐ Aesěè mɔ̀

¹¹ plě ɔ mǐa ɔɔ jlǔǒ kɔn üà sěɛɛ̌a jèe kàan dɛ klee dɛ kukǔ ji, Nyesoa teea lɛ ɛ̈ moo dɛ Ɔ poaa ble ɛ mia tùɔn kpaba,

¹² Ɔ̌ tmɔɔ̌a Wlibɛkɔ̌ ɛ̈ moo, “Nè nyǐsaju ɔ miě jǔ wɛ̀le bobo neema.” (Gen 25.23) Dɛǒ jlǔǒ u nuaa ɛ se ɛɛ tè Nyesoa sea tèǒ boɔ, kɛɛ dɛ kɔn tè Ɔ nua nɛɛ nɛ̀ moo Ɔ poa ɛ ble nyu Ɔ miaa daba.

¹³ Plě Jèkɔ̌po klee Isɔ̀ mia kɔɔn no, kě Nyesoaa win dɛ̌ ke i je, “Ě noɛɛa Jèkɔ̌po mǒ no, kɛɛ Ě faenʼa Isɔ̀ lo.” (Mal 1.2-3)

¹⁴ Ɛmoǒ ɛ sɛ̀n kɛ nynɛ̌ Nyesoa se mǒ slɛɛ̌ lee? Òooǒn, sɛjesɛ ɛ se bò nu!

¹⁵ Ba jě ke Nyesoa dǎlaa Mɔ̀sě je Ɔ je, “Ě mi wɔle je jbojbɛ kɔnma keǒ nyopòà Ě jlɛ̌ Boǒ jboo wɔle je mɔ̀. Ě mi nyopòà Ě jlɛ̌ Boǒ noɛɛ mǒo mǒ noɛɛma.” (Ex 33.19)

¹⁶ Ii tè ɛ slě ɛ mɔ̀ kɔn dɛ moo aa kɛn wɔɔn dɛ plě dɛ a nii, ɛ se ɛ ɛɛ̌ nu a Nyesoaa nyopò mǒ. Kɛɛ Nyesoaa wɔle je jbojbɛ nɛ̀ ni ɛ.

¹⁷ Ɛɛ jboo dɛ tɛ̀ɛ nɛ̀ moo Nyesoaa win Ɔ boɔlaa tà Ɔ dǎla bòo keǒ Fɛ̀lǒte jleě mǒ ɔ̈ mooa Klɔ̀ba keǒ Ǐjɛ̀te nyo mɔ̀ ɛ̈ moo, “Mǒà Mǒ nuù klɔ̀ba mǒ ɛ̈ di ɛɛ numa Ě mǐ Ně kpě nyopò wùɛ tee le keǒò jleě mǒ plě Ně nynɛ̌ mǐ kmɔ̌ wùɛà kɛn le gbɛ̀tɛɛ le.” (Ex 9.16)

¹⁸ Ii tè Nyesoa kɔn wɔle je jbojbɛ keǒ nyu wùɛ Ɔ jlɛ̌ Bɔ jboo wɔle je mɔ̀ plě Ɔ̌ jɛkɛ̌ɛ nyu wùɛɛ wlò ɔ̈ kɔn wlò Ɔ jlɛ̌ Bɔ jakǎ lee.

¹⁹ Aa nyu wɔ̀le je bɔ chɛtlǐi li kělɔɔ̌ mɔ̀ bɔ dǎ bò ɛ̈ moo, “Bɛ̌ nu nyu wùɛ bɔ̌ slě wɔ̀ bɔ sàǒ Nyesoaa dɛ Ɔ jlɛ̌ɛ snǔ mɔ̀, è nyopò bǔ se Ɔ de na, mɛ kɔɔ̌n tè Ɔ jɛɛ leě kɛ u tè kaǒ?”

²⁰ Kɛɛ mòà monoo tùonyugbe, à kpě tae kɔ̀ɔ̌n kɛ è jɛɛ leě wun de kělɔ Nyesoa mɔ̀? Dɛ̌ɛ̀ jagbee ɛɛ̌ gbà nyuǒ nu ɛ wan ɛ̈ moo, “Mɛ kɔɔ̌n tè nùǔ bo mǒ nunuɛ?”

²¹ Bɛ̌ nu bɛ mɔ nyu bɔ̌ jlɛ̌ bɔ nu bɛǒ bɔ mɔ jǐlenmɔ jagbee klee jǐlenymi jagbee, ɛ se kɛ lɔ̀ ɔ se kpě blě keǒ bɔ chlà dɛ ɔ mii numa le?

²² Dɛɛ doǒ nɛ̀ ɛ mono, bɛ̌ nu Nyesoa Bɔ̌ keea ɛ jlɛ̌, Ɔ mii Ɔɔ jlo nyopò teeba plě u mǐi Ɔɔ kpě jě. Kɛɛ Ɔ chlà lɛ keǒ Bɔ dbǎ wlò plě Ɔ miǒ nyopòà ü blɛɛ ɛɛ je uu plɔ tu kɛn bo maě ne ü wɔ̀ luu chɛ̀ mɔ̀le keǒ gbè sùesuɛ mɔ̀.

²³ Dɛǒ nɛ̀ Ɔ ni ɛ̈ di ɛɛ numa Ɔ mǐ Ɔɔ tè jǐ boaboǎ fòɛ tee le keǒ nyopòà mɔ̀ ü Ɔ jboo wɔle je Ɔ wɔ̀ɔ mɔ̀ keǒ tè jǐ boaboǎǒ mɔ̀ klě seela tǐ jleě.

²⁴ Nyesoa se ämo Jùwɛ nyo do sosǒ da, kɛɛ klee kuodakwɛ̌ ke keǒ bu moo Ɔɔ nyopò

²⁵ wòje keǒ Nyesoa dǎlaa klě Ɔɔ wnɔsàɔ Hosiǎ mǒ seela tǐ jleě ɛ̈ moo, “Ě mi nyopò Ně nyopò daeba ü se pnɔ Něe nyopò. Ě mi nyopò mǒ noɛɛma ü Ě se pnɔɔ mǒ noɛɛ ne.

²⁶ È tàě kmɔ̌ sie Nyesoa tmɛɛ̌ pnɔ lěe nyopò ɛ̈ moo, ‘A se Ně nyopò,’ klě kɔn do Ɔ miě u Ɔɔ nyopò daeba.” (Hos 2.23, 1.10)

²⁷ Nyesoaa wnɔsàɔ Aesaeǎ sàla ɛ wan seela tǐ jleě, è kě ɔ dɛ̌a ɔ je, “Baǎje bɛ̌ nu Ǐsòwɛ̌ɛ jlǔu jlǔ uu fòfoɛ bǔ wǒ je jbǒo mǐsiɔ̌ ɛ̈ neǒo jbǒ wien, uu mòngmɛ nyo sosǒ nù mi waba.

²⁸ Nyesoa miě umoǒ see wa uu plɔɔ tu kɛn bo maěma kpǎkpǎ.” (Is 10.22-23, Hos 1.10)

²⁹ Kě Aesaeǎ dǎla ke ɔ je, “Bɛ̌ nu kpě kɛne Nyesoa Bɔ̌ see ämo Jùwɛ nyo äa jlǔu jlǔu tìe kmɔ̌ si, è äa nyuu doo chɛ̀ see kmɔ̌ si wòje keǒ dɛ kukǔ nu nyopò ü neaěe deěǒ wlòmo ï moo Sedɔ̀n klee Komolà uu ka neaa je.” (Is 1.9)

³⁰ Dɛɛ do ä wɔ̀le je bä sàě ii wlòmo nɛ̀ moo kuodakwɛ̌ üà uǔ pɔ̀n pnɔ ɛɛ le bü moo pnɔɔ jebo siǐn nyo u moo jebo siǐn nyo klě uu tè wlò popoɛ mǒ ɛ̈ u kɔnʼɔ klě Tentǎn Jǔ mǒ,

³¹ kɛɛ Ǐsòwɛ̌ kwɛɛnʼà pɛ̀n ɛɛ le keǒ bü moo jebo siǐn nyo keǒ Nyesoaa teteǎa bo tùtuɛ mɔ̀, u se jebo siǐn nyo.

³² Mɛ kɔɔ̌n kɛ tè u seǒo jebo siǐn ni? Dɛ nu ɛɛ nɛ̀ moo u pɛ̀n jebo siǐan le klě dɛ u nii mǒ ɛ̈ se bu kɔn tè wlò popoɛ. Dɛǒ nɛ̀ kɔn wlòmo klě u bòoě bojoɛɛ keǒ Seɔ̌ jleě mǒ Ɛ̈ moo Tentǎn Jǔ

³³ Ɔ̈ Nyesoaa win boɛɛ lee kɛn ɛ̈ moo, “A tanàle, Ě miǎě Seɔ̌ klě Jlǔsnɛ diǎ bo tùba ɛ̈ u dɛɛ Sàna diě ke, Ɛ miǎ nyopòǒ miǎ Ɛ bòba wɔ̀ɔn le po, kɛɛ nyu wùɛ ɔ̈ miǎ Ɔɔ tè kàan tè poba, tònwe seǎ ɔ numa mu.” (Is 8.14, 28.16)