Wlɛ̀velesɔ̌n 9 - Nyesoaa Kuo Win Jajle

¹ Tà m̀m nonɔ najiǒpòiǒ ɔ bea ɔɔ nokpaǒ, Ě jěa jɔtnàe ɛ̈ bloaěe jɔ mǒ ɛ̈ bea lɔɔ kmɔ̌ mɔ̀, bǐtìee gbàadɛ̌ nɛ̀ nyeea ɔ no ɛ̈ u dɛɛ bǐtìeà see mɔ̀ kɔn.

² Tà ɔ knanaa bǐtìeǒ see mɔ̀ kɔn je, è nǎno fòfoa nia buɛɛ ɛ̌ sonwɛaě ɛ wlòmo keà u nu wiěn tùadlo fòɛǒ nǎno sonwɛě kɛn mǒò. Nǎnoǒ sonwɛa lěe bǐtìeǒ wan mǒ ɛ nua wɛn ɛ̌ pala kwijlě mǒ plě nyu ně jěa jɔtùwle.

³ È tànynakpaǐ nì sonwɛaě nǎnoǒ slè mǒ ï beaɔ kmɔ̌ mɔ̀, nì kpě nyeea kělɔ blǒɔ mɔ̀ wòje kèaǐkèe.

⁴ U tmɔɔ̌a tànynakpaǐǒ biǐ toěa kwlǎ le klee ti plě dodɔ̌ dɛ wùɛ, tùonyopoo do sosǒ nù bi nua ka kukǔ ü Nyesoaa slii seaǒo kɛn ne keǒ uu jigbàa gblee wnana mǒ.

⁵ U sea tànynakpaǐǒ kpě nye keǒ bi dbǎla u, kɛɛ bi paea u dɛ wan le klě sòbaii m̀m wlòmo. Uu dɛɛ wan le popa wǒa je keà kèaǐkèa nmii nyu.

⁶ Klě sòbaii m̀mǒ wlòmo uu nyu mi kokoɛ̌ le pɔ̀nma, kɛɛ ɔ se ɛ jěba mu, uu nyu mi kokoɛ̌ sòaba, kɛɛ u slě wɔ̀ bu kǒ.

⁷ Tànynakpaǐǒ i wǒ je sòkwe ï wɛ̀ɛ mɔ̀ keǒ to kɛn mumuɛ mɔ̀. Ɛ kɔn noǎ tìi neǒ ii dlǒ, i wǒ klò fleǎ plě ii jigbè wǒ tùonyopoo jigbè.

⁸ Ii moamoa dlǒ tmɔ le wòje nynɔɔ moamoa dlǒ. Ii nyěà neě ii wan i wǒ sàa nyě.

⁹ Noǎǒ i mǎnaa wulee ble i wǒa pneě papɔ̌. Ii kpakpeaa wonwan chìnchin wǒa win mǒ keà sòkwe chlì sòkwe gbɛ̀ klě takaně mǒ

¹⁰ ǐ ne wèn ngmɛ̀ɛ le ï sunwii nyu keà kèaǐkèa, ii wènʼǒ nì nea kpě kɛn bï sieěa nyopò dɛ mǒ bo klě sòbaii m̀mǒ wlòmo.

¹¹ U kɔna najiǒpòi ɔ̈ mooa klɔ̀ba ɔ̈ bǐtìeǒ seaa mɔ̀ kɔn ɛɛ kpě nea lěe kwete mǒ, ɔɔ Hiblǔ nynɛ̌ u dɛɛ ɔɔ nɛ̀ moo Abadàn, è ɔɔ Kwlǐki nynɛ̌ nɛ̀ moo Apolèɔn ɛ̈ sɛ̀nʼɛ nynɛ̌ Gbè Sùeɔ.

¹² Dɛǒ nɛ̀ mooa klekle tǐ jakěe dlǒ chlɛ̀chlɛ. Kaǒ tǐ jakě kplěe sɔ̌n tìi siǒ ï miěe diba.

¹³ Tà najiǒpòo m̀mɔdo nonɔ bea ɔɔ nokpa, è Ě wɔ̌na win ï sonwɛa lěe ngmèe hɛ̀nʼǒ mɔ̀ mǒ ï neaǒo klò chɔ̀no tògbeǒ dlǒ keǒ Nyesoa jemǒ,

¹⁴ kě i dɛ̌a najiǒpòo m̀mɔdo nonɔǒ beaa nokpaǒ je i je, “Jle najiǒpòo hɛ̀nʼǒ bo ü pee chěen mɔ̀ ü moaa bo klě ně sakaěǒ moo Ufletì wien.”

¹⁵ Ii tè najiǒpòo hɛ̀nʼǒ ü wɛ̀aa mɔ̀le keǒ ɛmo àwɔǒ mɔ̀ klee chnɛ̀ jlǒ waěǒ mɔ̀ klee keǒ sòbaeǒ mɔ̀ klě jlǒǒ wlòmo ɔ̌ tɛa u bo bu dbǎla tùonyopoo dɛ fòfoa.

¹⁶ Ě wɔ̌na ni ɛ̈ moo uu tabɔ̀ǒ nɛɛaa sòkweǒ kɛn u nea mǐniɔwɛɛ wlèe pù (200,000,000).

¹⁷ Klě slèe wlòmo Ě jěa sòkweǒ klee ii kɛn nae nyo, u kɔna pneě papɛ̌ u mǎnaa wulee ble ï floaa wòje na, è tìe blěa ɛɛ dɛà nuaa blùu wòje seɔ̌ǒ u dɛɛ safàe plě uu tìe blěa ii chomǒ wòje seɔ̌ǒ u dɛɛ sɔfɔ̀. È sòkweǒ ii dlě wǒa sàa dlě, è na klee nǎno klee wnewne seɛ̌ nì sonwɛa lě i wan měne.

¹⁸ Tùonyopoo dɛ fòfoa nù kǒa keǒ dɛɛ wan le paa noǎ kplěe tanʼǒ mɔ̀ ï mooa na klee nǎno plě wnewne seɛ̌ ï sɔna lěe sòkweǒ wan mǒ.

¹⁹ Sòkweǒ i blěe kpě neaě i wan klee klě ii wèn mɔ̀, ii wèn wǒa smea, ǐ kɔna dlě ï i niaa ǐ sieěaa nyopò noǎ mǒ ble.

²⁰ Nyopòo tìeǒ siaǒo tǐ jakě seaa dbǎ, kaǒ uǔ wɔɔnʼa ɛ kɛn keǒ bu tbɛa noǎ uu chɛ̀ nuaa kɛn, uǔ bɔ̌a uu nǔkpuǐǒ ii wɛ̀ sèsa kaǒ ï u nuuaa klò klee sěbla klee kanwɛɛ klee seɛ̌ plě ti ï slěe wɔ̀ bï jěe dɛ klee bï wɔ̌nʼɔ tè plě bï naa.

²¹ Plě uǔ wɔɔn ɛ kɛn keǒ bu bitǐ uu wlè bo keǒ mnùngma popoɛ mɔ̀ klee bu siǒ uu sàlesa kmɔ̌ bo klee uu se wòn mɔ̀ɔ wɛ̀ kmɔ̌ plě uu jlijlǐ kmɔ̌.