Wlɛ̀velesɔ̌n 6 - Nyesoaa Kuo Win Jajle

Blajǔ Sàla Plaplǎ Chněedɛ̌ǒ Sluu Jele

¹ Ě keaǒ Blajǔǒ mɔ̀le tɛn Ɔ̌ sàlaǒ sluu kpɛɛ nyiɛtaǒ i dɛɛ do. È Ě wɔ̌na kmɔ̌ ne soaa hɛ̀nʼǒ ii win ni, i wǒa win mǒ keà tɛ̀n pnɛ̌aa ǐ dɛ̌a bò ɛ̈ moo, “Diě!”

² Tà Ě chèaǒo bo, Ě jěa sòko plǔ. Nyuǒ nɛɛa nɔɔ kɛn pno neaě ɔ kwete mǒ ǔ nyea ɔ klɔ̀ba flɛ̌ ɔ̌ nɛɛa sòkoǒ kɛn ɔ̌ mia ɔ̌ duia toe, bɔ̌ du ɛɛ bě, ɔ̀ du ɛɛ bě.

³ Tà Blajǔ sàlaǒo sluuǒ ɛɛ sɔ̌n nenɛ dɛ, Ě wɔ̌na sɔ̌n nonɔ nmiǒ ɔɔ win, kě ɔ dɛ̌a ɔ je, “Diě!”

⁴ È sòko tɔ̀ɔ ɔ̈ floaa nɔ̀ǒ beaǒ pepě mǒ. Ɔɔ kɛn nae nyuǒ nɔ̀ u nyea kpě bɔ̈ sàlaɔ ně bo wnawna kělɔ kmɔ̌ɔ mɔ̀ ɛ̈ di ɛɛ numa kmɔ̌ɔ nyopò mia dedbǎe le. U nyea ɔ pan fòɛ.

⁵ Tà Blajǔǒ ɔ sàlaǒo sluu tan nenɛǒ, Ě wɔ̌na tan nonɔ nmiǒo ɔɔ win, kě ɔ dɛ̌a ɔ je, “Diě!” Tà Ě keaǒo le tɛn, Ě jěa sòko jlee, ɔɔ kɛn nae nyu blěa kwa noǎ kɛn dbee dɛ ɛ̈ nee dlěe sɔ̌n je.

⁶ È Ě wɔ̌na dɛ tɛ̀ɛ ɛ̈ wǒaa win ï slè mǒ ï dɛ̌a bòo ɛ̈ moo, “Plo kouu sǎnma wěe sɔ̌n bi jě chnɛ̀ jlǒ waěe doo snǒ sàe dɛ, è plo kǔbɔ̀loo sǎnma wěe m̀mɔdo bi jě chnɛ̀ jlǒ waěe doo snǒ sàe dɛ, kɛɛ nè sɛ̀ dɛǒ chnɔ̌ǒ ɛ klee nmɔǒ i pee de.”

⁷ Tà Blajǔ sàlaǒo sluu kpɛɛ hɛ̀n nenɛǒ, Ě wɔ̌na hɛ̀n nonɔ nmiǒ ɔɔ win, kě ɔ dɛ̌a ɔ je, “Diě!”

⁸ Ě keaǒ le tɛn, è Ě jěa sòko keà dɛ kplɔɔ, nyuǒ nɛɛa ɔɔ kɛn nɔ̀ kɔn nynɛ̌ mooa Kokoɛ̌ plě nyuǒ moo Hedì ɔ̌ nɛa ɔ de, Hedì sɛ̀n nynɛ̌ Kokǒ Nyoo Blǒ. U nyea u kpě keǒ kmɔ̌ɔ wakǎ gbe mɔ̀ keǒ bu kpala nyopò to mɔ̀ bu dbǎla u klee bu nua dodopà klee kweǎ klee kwlǎ slè soa kukwǐ ï neɔɔ blǒɔ mɔ̀ bu dbǎla u.

⁹ Tà Blajǔ sàlaǒo sluu kpɛɛ m̀m nenɛǒ, è Ě jěa nyopòo sìsi ü u dbǎlaa keǒ Nyesoaa win boɔboɔ tè mɔ̀ klee Ɔɔ sàse dɛ nunuɛ mɔ̀, nù neaě chɔ̀no tògbee kǒngmà bobo

¹⁰ nù jɛɛ̌aě win ü pnɛ̌a dɛ jleě le ü dɛ̌a bò ɛ̈ moo, “Kpě kɛne Koɔn, Mòà nee ngmà je plě Ɔ̈ mǎ lěe sèn bo, è ke ɛ miǐ jè kɛ jleě mǒ bo tonma plě mìěe di mìǐ kmɔ̌ ne tùonyopoo blilǐ tù mìǐ äa kpa sà.”

¹¹ È u nyea uu wùɛǒ wlawlě plǐ pɛ̀ti ǔ tmɔɔ̌a nu bu foa klě tǐ gbei wlòmo ɛ mǐa ɛ kpa kpa uu bǐì Tentǎn Jǔu wǎnʼǒ miaa dbaěba keǒ uu ka nee je, uu tìɛn taeǒ ɛ mǐaě je wɛ̀.

¹² Tà Ě keaǒo le tɛn kaǒ, Ě jěa Blajǔǒ Ɔ̌ sàlaǒ sluu kpɛɛ m̀mɔdo nenɛǒ, è blǒo sèkea ɛ̈ neaa kpě kɛn nɛ̀ kpala tùɔn, è wɛn chlea le ɛ̌ pala kwijlě mǒ, ɛ wǒa je daloà u dbae lee wli jlee pìnpni, è sòbae wùɛ ɛ wǒa nymɔ,

¹³ è jɔtnè nìǒ blea jɔ měne kělɔ kmɔ̌ mɔ̀ keà tu blee bui ngmè ja le bo fèflɛ bɛ̌ ke i le tɛkɛ̌ɛ le.

¹⁴ È jɔtùwle fǎna ne keà nyu plɛ̌ɛ chněedɛ̌. È togbei fòe klee blě tìià neǎ tbɛɛ lee dǐ è nìǒ wɛ̌a tùɔn měne.

¹⁵ È kmɔ̌à ɛɛ klɔ̀bapoo klee win kwa kɔn nyo klee tabɔ̀ɔ jǐgbàdiɔpo klee pònpan nyo klee kbě mǒ ne nyo klee kèiapo wùɛ klee nyopòà see kèiapo, è nùǒ wɛ̌a klě bǐtìi wan le klee klě seɛ̌ slè ï neaa togbei fòeǒ mɔ̀le.

¹⁶ Ǔ tmɛɛ̌a togbei klee seɛ̌ fòeǒ, kě u dɛ̌a i je u je, “A wlɛ ä kɛn, a wɛɛ̌ ä Nyuǒ jǐ mǒ Ɔ̈ neǒo klɔ̀ba gbèsɛɛǒ kɛn bo klee Blajǔu jloǒ Ɔ pee.

¹⁷ Uu jloo chnɛ̀ jlǒ waě fòɛǒ ɛ nyni ni keǒ ä mɔ̀, à nyu tae wɔ̀le je bɔ̈ siǐ kɛ kmɔ̌?”