Wlɛ̀velesɔ̌n 16 - Nyesoaa Kuo Win Jajle

Nyesoaa Dɛ Wan Le Pae Fui

¹ Ě wɔ̌na win ï sɔna lěe kǎ fòɛǒ bo mǒ ï jɛ̌a lěe, kě i dɛ̌a najiǒpòo nyiɛtaǒ je i je, “A mu Nyesoaa jlo fuiǒ bo wlǎ klě blǒ mɔ̀!”

² Tà nyane najiǒpòiǒ ɔ wlǎla ɔɔ fuo bo kělɔ blǒ mɔ̀, chnechně noǎa kukwǐi chìi nì wěa tùonyopo fǒ měne ü blěaa nmiǒ ɔɔ mǎkpee plě ü sɛ̀a ɔɔ sùsu tuu wɛ̀.

³ È sɔ̌n nonɔ najiǒpòiǒ ɔ̀ wlǎla ɔɔ fuoǒ bo klě jbǒ kɛn, è jbǒ wùɛ ɛ nua nymɔ sosǒ keà u nu wiěn nyuǒ kǒo mnùngma mǒò, kmɔ̌ ne dɛ wùɛ nea lěe jbǒ mɔ̀ ɛ kǒa le.

⁴ È tan nonɔ najiǒpòi wlǎla ɔɔ fuo bo klě neǎ wùɛ wan klee klě něe chlolǎi mɔ̀, ìi wùɛ ï ponpnɔɔa nymɔ ke.

⁵ Ě wɔ̌na najiǒpòiǒ ɔɔ win ɔ̈ neǎa kpě nea lěe kwete mǒ ɔ je, “Ngmà Je Ne Nyesoa Ɔ̈ ɛ tùaa plě ɛ tùu, Nè wlòo ble po dɛà ɛ slɛɛ̌ mǒ no keǒ dɛà nùu kɛn.

⁶ Mɛ kɔɔ̌n tèǒ joo nɛ̀ moo u wlǎ Nè ngmà je ne nyo klee wnɔsàɔpoo nymɔ bo. Tèǒ nì kɔn tè u blɛɛ ɛ je keǒ Bò nye u nymɔǒ bu nǎna.”

⁷ È Ě wɔ̌na chɔ̀no tògbee kǒngmàa win, kě ɛ dɛ̌a ɛ je, “Kòo, kpě kɛne Koɔn Nyesoa, Nè wlòo ble po dɛ nu kàan plě ɛ̌ slɛɛ̌ mǒ.”

⁸ È najiǒpòo hɛ̀n nonɔǒ ɔ̀ wlǎla ɔɔ fuo bo keǒ wɛn kɛn, wɛnʼǒ nɛ̀ nua na ɛ̈ siɛna nyopò.

⁹ Tà kpě kɛne naa funfǔ keaa nyopòǒ le fɛɛn ne, u pea Nyesoaa nynɛ̌ fla wan Ɔ̈ kɔnaa nyopòo dɛ wan le pae noǎ win kwa, kaǒ uǔ sòa bu bitǐa uu wlè bo u mǐa Ɔ tè jǐ boaboǎ nye.

¹⁰ Tà najiǒpòo m̀m nonɔ wlǎla ɔɔ fuo bo keǒ nmiǒ ɔɔ gbèsɛɛ kɛn, è kwijlě bea nmiǒ ɔɔ deplě wùɛ kɛn, ɔɔ nyopò dia mɛ keǒ chnechně noǎa sosǒ mɔ̀.

¹¹ U pea jɔkɛn Nyesoa fla wan ke keǒ uu chnechně noǎa tè mɔ̀ klee chìiǒ nea uu fǒ měne. Uǔ sòa bu bitǐa uu wlè bo keǒ dɛ u nuaa mɔ̀.

¹² Keǒ ɛ demǒ de, Ě jěa najiǒpòo m̀mɔdo nonɔ ɔ̌ wlǎla ɔɔ fuo bo keǒ ně fòɛǒ u dɛɛ Ufletì kɛn ɛ̌ mana kpǎkpǎ ɛ̌ nyea klɔ̀bapoo fɔ̌ bu sɔnaě wɛnʼɛ kwlǎ mǒ wǒla mǒ.

¹³ È Ě jěa dɛ kukǔ sìsii tan ï wǒaa chìwen, nì sonwɛaě dɔsmɛǒ ɔ klee nmiǒ klee sen le tmɔ̌ wnɔsàɔǒ wan měne.

¹⁴ I moo kǔ sìsi ï niaa wlòlekaen noǎ, nì nɛa blě kɛn le ï gbèa klɔ̀bapoo le keǒ to mɔ̀ ɛ̈ miaa tùɔn kpaba klě kpě kɛne Nyesoaa chnɛ̀ jlǒ waě fòɛǒ Ɔ mǐa lěe jaba mɔ̀.

¹⁵ Bi beě a wlòmo kě Jùsu dǎla Ɔ je, “A tanà le, tǐà a se Mǒo snǔ mɔ̀le pɔ̀ɔnma mu nì Ě miě jaba wòje jliɔ̌. Ɛ moo ngmna keǒ nyopòà mɔ̀ ü neěe gbɛ̀ɛa wlòmo ü uu wlawlě miěe mǒ nema ü wɛ̀ɛ mɔ̀le ɛ̈ di ɛɛ numa uǔ dii gblàgblo le nae ne tònwe iǐ di uu nu.” (Mt 24.42-44, Lk 12.36-40)

¹⁶ Kǔ sìsiǒ i bòa klɔ̀bapoo le klě tùɔnʼǒ u dɛɛ Amajedɔ̀ kɛn klě Hiblǔ win wlòmo.

¹⁷ È najiǒpòo nyiɛta nonɔǒ ɔ̀ wlǎla ɔɔ fuo bo klě jɔ mǒ, è win jɛ̌a le ï sɔnaěe klɔ̀ba gbèsɛɛǒ mɔ̀ mǒ ɛ̈ nea lěe Nyesoaa kǎ fòɛ bo, kě i dɛ̌a i je, “Ɛ wɛ̀ mɔ̀ no!”

¹⁸ È tɛ̀n bea bo klee ɛɛ klukwlɛ plě Ě wɔ̌na de wlewlɛ̌ klee blǒo sèkea ɛ̈ neaa kpě kɛn. Sɔɔnʼě tǐǒ nyopò bea lɔɔ kmɔ̌ɔ mɔ̀ jleě mǒ, ɛɛ blǒo sèkea sěɛlǎ tùɔn kpɛ.

¹⁹ Dě fòɛǒ u dɛɛ Babòlɔn ɛ klǎla mǒ ɛ̌ nua peěnʼe tan, è deě fòe wùɛ ï nee blě kɛn le ï sùea gbè. Nyesoa sea Babòlɔn nyoo kpni kukwǐi tè snù, Ɔ nua nu ǔ nǎna Ɔɔ jloo nmɔ kàe waě ɛ̈ jǐa lěe.

²⁰ Blě wùɛà neǎ tbɛɛ lee dǐ i fǎna ne, togbei fòe wùɛ i sea tà ne,

²¹ è chɛn kpěn fòe ï kɔn kwa kunkuɛn klee sǎnma wěe wlèe m̀m gbɛ̀ɛ boaa lee nì bleaě jɔtùwle měne ï bea nyopòǒ dlǒ le. Ɛ mooa jǐlenymi dɛ wan le pae chɛn kpěn, ii tè u cheɛɛ̌a Nyesoa le keǒ Bɔ dia i dbo.