Matiɔ̌n 8 - Nyesoaa Kuo Win Jajle

Jùsu Peana Bale Kwɛ̌ Nyu

¹ Tà Jùsu sonwɛa lěe togbee dlǒ mǒ Ɔ kea lɔɔ wɔ̀ɔn di, è diblɛ̌ fòfoa nù nɛa Ɔ de.

² È jbɛju tɔ̀ɔ bale kwɛ̌ niaa nɔ̀ dia lě Ɔ mɔ̀ ɔ̈ kɔlaǒ Ɔ kwne jemǒ bo, kě ɔ dɛ̌a ɔ je, “Koɔn, bɛ̌ nu Bò wɔɔn ɛ kɛn, nu mǒ boǒ wɛ̀ sìnɛ.”

³ È Jùsu pnɛ̌na Ɔɔ son mǒ Ɔ̌ gbèa jbɛjuǒ mɔ̀ Ɔ je, “Ě wɔɔn ɛ kɛn, wɛ̀ sìnɛ.” Tǐi doo tǐ jleě ɔɔ bale nìǒ wɛ̀a.

⁴ È kě Jùsu dɛ̌a ɔ je Ɔ je, “Tanàle, nè tmɛɛ̌ nyu wùɛ keǒ dɛà ɛɛ tè mɔ̀, kɛɛ mu dìe Nyesoaa kpatòa je te, bɔ̌ poo loò kòo kɛn mì dɛǒ Nyesoaa tetěǒ Ɔ nyeaa Mɔ̀sě ɛ tmɔɔ̌ uu nu, mì chɔ̀no pi ɛ mǐ ɛ nyopò wùɛ tee le ɛ̈ moo wɛ̀ sìnɛ.”

Wlǔmɔ Nyoo Jǐgbàdiɔɔ Tè Wlò Popoɛ

⁵ Tà Jùsu palaa Kapanìa dǐa, Wlǔmɔ nyoo tabɔ̀ɔ jǐgbàdiɔ nɔ̀ dia lě Ɔ mɔ̀ ɔ̈ bɛ̀tea Ɔ le keǒ mǒ sɛ̀ɛa mɔ̀

⁶ ɔ je, “Ně Koɔn, ně nyebajlo bo klɔ̀ɔ kwɛ̌ pean nɔ bo, ɔ neě sònwɛ jejeɛ̌ slè klě koǔ bo.”

⁷ È Ɔ tùa lɔ kɛ̀ɛn Ɔ je, “Ě miě diba Ě mǐ ɔ pean.”

⁸ Kɛɛ kě jǐgbàdiɔǒ ɔ dɛ̌a ɔ je, “Ně Koɔn, mǒà Ě seǒ je blɛɛ le keǒ Bò diě ně tà. Kɛɛ boɔ wien sosǒ ně nyebajloǒ ɔɔ kwɛ̌ mi dɛ bɔ̌ba.

⁹ Mǒà Ě neeě nyopò tùu kpě bobo plě tabɔ̀ neeɔɔ̌ bobo ke. Bo tmɔɔ̌ u nyuu do mu ɔ̀ mu nu, bo da do tɔ̀ɔ diě ɔ̀ diě le, bo tmɔɔ̌ ně nyebajlo nu dɛà ɔ̀ nu ɛ ne. Dɛɛ doǒ nɛ̀ ɛ mono, wɔ̀le je Bò boɔ wien le bo kwɛ̌ǒ bɛ bɔ̌ dɛ.”

¹⁰ Tà Jùsu wɔ̌naa winʼǒ, i kaenʼa Ɔ le wlò, kě Ɔ dɛ̌a nyopòǒ ü nɛa Ɔɔ de je Ɔ je, “Kàan tèà Ě tmɛɛ̌ amo, Ě sěɛlǎ ɛ nyu jě bɔ̈ kɔnʼɔ tè wlò popoɛ taeà klě tà wùɛ klee kělɔ Ǐsòwɛ̌ kwɛɛn slèe chɛ̀.

¹¹ Ě tmɛɛ̌ ane, nyopò fòfoa miǎě wɛnʼɛ kwlǎ mǒ wǒla mǒ sɔnma klee klě wɛnʼɛ pala mǒ u mǐǎ lě jɔkɛn diblɛ̌ slè ne u klee Eblɛ̌hɛ̀mo klee Aesěè klee Jèkɔ̌po u mǐǎě tàa do dɛ dii li.

¹² Kɛɛ nyopòà ü blɛɛ lee je bu neěe Nyesoaa win kwa konkɔn bobo, Nyesoa mǐǎǒ u plomǒ tuǔnma klě kwijlě slè, tàà nyopò neěe u miǎ wɔle fìɛn fìn u miǎ nyě di.”

¹³ È kě Jùsu dɛ̌a jǐgbàdiɔǒ je Ɔ je, “Mu, keǒ nù ɛɛ tè kàan tè popoɛ nɛ̀ bɛ mono keǒò mɔ̀.” Klě tǐi doǒ wlòmo ɔ̀ɔ nyebajlo nɔ̀ǒ kɔn kwɛ̌ bɔ̌a dɛ.

Jùsu Peana Nyopò Fòfoa

¹⁴ È Jùsu mua lě Pitɛ̌ɛ tà klě Ɔ jɛɛaě Pitɛ̌ɛ nynenaǎ ɔ̈ fèflɛ bea lěe fǒ mǒ.

¹⁵ Tà Ɔ gbèa ɔɔ kwete mɔ̀, è fèflɛ nɛ̀ǒ gbɛ̀a ja klě ɔ fǒ mǒ. È nynɔ nɔ̀ǒ dǔa jemǒ, ɔ̌ nyea nyopòǒ didi dɛ.

¹⁶ Klě wìtie waěǒ wlòmo u jalaě nyopò fòfoa ü kǔ sìsi nea lěe ja, Jùsu tmɛɛ̌a kǔ sìsiǒ bi sɔnaě nyopòǒ ja měne bi mua Ɔ̌ paena nyopò tùu ü kɔn wùɛ kweǎ niaa ke.

¹⁷ È dɛǒ nɛ̀ nua lɛ winʼà Nyesoa poa Lɔɔ wnɔsàɔ Aesaeǎ wan ǐ jaěaǒ ï dɛ̌a bòo ɛ̈ moo, “Nɔ̀ kpala äa kmakma klee kweǎ ne ämoo ja le.” (Is 53.4)

Jùsuu Mɔ̀ Na Nyo

¹⁸ Tà Jùsu jěaa nyopò fòfoa u tbɛɛa Ɔɔ dǐ, Ɔ tmɔɔ̌a Ɔɔ mɔ̀ cheěn nyo bu bɛɛ̌a Lɔ Jàlalǐi jbǒ tìe klě ɛɛ wakǎ tɛ̀ɛ mɔ̀.

¹⁹ È plě u mǐaǒ tàǒ mǒ sɔn, teteǎ tee nyu tɔ̀ɔ nɔ̀ diaě Ɔ mɔ̀, kě ɔ dɛ̌a Lɔ je ɔ je, “Tee Nyuò, Tà wùɛ mìi muma, Ě miì mɔ̀ nama.”

²⁰ È Jùsu tɛ̀na ɔ mǒ kě Ɔ dɛ̌a Ɔ je, “Totǒgbea kɔn bǐtìi i tǐnʼěe wan plě noeà neěe jɔ mǒ i kɔn dlě, kɛɛ Jbɛjuu Jǔà Ɔ se pɛna kɔn.”

²¹ È Ɔɔ mɔ̀ na nyu tɔ̀ɔ kě ɔ dɛ̌a Ɔ je ɔ je, “Ně Koɔn, nyane dɛ nɛ̀ moo sɔnʼǒǒ mɔ̀ mǒ bo mu ně gbeǐ bo tù.”

²² Kɛɛ kě Jùsu dɛ̌a lɔ je Ɔ je, “Naǎ de bä mu, nɛ bo nyopòǒ kokǒ kmɔ̌ neě ja bu tù uu kokǒ nyo bo.”

Jùsu Poa Pìpia Kpee Mǒ

²³ È Jùsu beaě blǎgbè chěnchaě wan Ɔɔ mɔ̀ cheěn nyo beaě Ɔ mɔ̀ ǔ mia lě Jàlalǐi jbǒo wakǎ tɛ̀ɛǒ mɔ̀.

²⁴ È keà nyu kɛpǒo jǐ pìpia blɔ̀ nɛ̀ dia le klě jbǒǒ kɛn, è jbodoě tùngmaea blǎgbèǒ je le ngmnangmna. Jùsu pɛna bo klě blǎgbè wan Ɔ̌ mɛa,

²⁵ è Ɔɔ mɔ̀ cheěn nyo muaě Ɔ mɔ̀ ǔ sàla Ɔ momnɔ mǒ, kě u dɛ̌a u je, “Koɔn, gblà ämo! Ä kwě leàò!”

²⁶ Kɛɛ kě Ɔ dɛ̌a u je Ɔ je, “Mɛ kɔɔ̌n tè a peě kɛ fano? Aa tè wlò popoɛ chɛɛ̌n mǒ no!” È Nɔ̀ǒ nynana bo Ɔ̌ tmɔɔ̌a pìpia klee jbodoě bi poa kpee, ìi wùɛ nìǒ tbala bo.

²⁷ È i kaenʼa Ɔɔ mɔ̀ cheěn nyoǒ le wlò, kě u dɛ̌a u je, “À nyu taeà kɛ? Jbodoě klee pìpiaa chɛ̀ tùiǒ Ɔɔ win bo!”

Jùsu Peana Kǔ Sìsi Jbɛjluu Sɔ̌n

²⁸ Tà Jùsu bɛ̌aa jbǒǒ tìe Ɔ nynia lěe Kedawlà kwɛɛnʼɛ fle mǒ, è nyopòo sɔ̌n ü kǔ sìsi nea lěe ja ü tǐnʼa lěe sɛklɛ bǐtìi wan, nù dia lě Ɔ mɔ̀. Uu kpni wɔ̌na jǐlenymi tè, ii tè snǔǒ nyu wùɛ nɔ̀ sea lě wɔ̀ bɔ nana ɛ mɔ̀.

²⁹ Tà u jboaa Jùsu, u pnɛ̌a dɛ jleě le u je, “Nyesoaa Jǔ, mɛ jlɛ̀ Bò nuǔ kɛ ä mǒ? Dì kɛɛ̌ le Mì ä sònwɛ tù plě tǐ miǒ nyni le?”

³⁰ È keǒ u gbàa bogbò fòɛ neaǒ nɛ̀ dia wan le.

³¹ Ii tè kě sìsi kukwǐǒ i nia Jùsu bàtea i je, “Bɛ̌ nu Bò klě ä jbɛjluǒ ja sɛ̀, dbo ämo klě bocheǒ mǒ.”

³² È kě Jùsu dɛ̌a i je Ɔ je, “A mu.” Ii tè ǐ sɔnaě jbɛjluǒ ja mǒ ǐ palaě bocheǒ mǒ, tǐi doo tǐ jleě boche wùɛǒ è nìǒ tèeaǒ jbǒo kponkpǒo dɛǒ pɛ̀slɛɛa je ǐ wɛ̀ɛaě jbǒ mɔ̀ de ɛ̌ kpala i.

³³ Ii tè nyopòǒ ü tùia lii jǐ mɔ̀ u kpala dǐa plùplɛ ǔ tmɔɔ̌a nyopòǒ dɛ wùɛ kpalaa tùɔn keǒ jbɛjluǒ jleě mǒ ü kǔ sìsi nea lěe ja.

³⁴ Ii tè ǔ sɔnaě dǐa mǒ ǔ mua Jùsu nya bɛ̌ba. Tà u jěa Lɔɔ, u pea Ɔ kpěǒ ii fano, ii tè u tmɔɔ̌a Nɔ u je, “Ä bɛ̀teè le, sɔn nɔ äa blǒɔ wlòmo.”