Mǎkè 9 - Nyesoaa Kuo Win Jajle

¹ È kě Jùsu dɛ̌a u je Ɔ je, “Tèe jleě nìà Ě tmɛɛ̌ amo, ɛ kɔn nyopòo tìe ü nynanàa tàà bo ü see kǒba mu ɛ mǐ ɛ kpa kpa u miǎ Nyesoa jě Ɔ miǎ u win kwa kɔnma di klě kpě kɛne tǔn wlòmo.”

Jùsu Sàea Le

² Tà chnɛ̀ jlǒ wěe m̀mɔdo sìnʼaa, Jùsu dǔa Pitɛ̌ klee Jìmǐse klee Jɔ̀ɔ̌n mǒ Ɔ̌ kpalaě u togbee pɛ̀tu dlǒ uu do Ɔ̌ sàea keǒ u jemǒ.

³ È Ɔɔ dalee plɛplɛ̌ keklɛ̌a uu jǐ. Nyu wùɛ nɔ̀ seɔ kmɔ̌ɔ mɔ̀ nee chɛ̀ ɔ̈ wɔ̀le je bɔ jlaa dalo ɛɛ plɛplɛ̌ bɛ jɛɛ Ɔɔ daleǒ ii plɛplɛ̌ kɛn.

⁴ È Ilaejɔ̀ klee Mɔ̀sě nùǒ wǒa tàmo keǒ u gbàa ǔ boɛaě Jùsu mɔ̀.

⁵ È kě Pitɛ̌ dɛ̌a Jùsu je ɔ je, “Tee Nyu, ɛ nu tɛɛ ä neà tùɔnʼà kɛn. Sɔnʼǒ ä mɔ̀ mǒ bä po bleaa tan, do keǒò mɔ̀, do keǒ Ilaejɔ̀ mɔ̀, è do keǒ Mɔ̀sě mɔ̀.”

⁶ È tè kɔn tè Pitɛ̌ dɛ̌a bòo nɛ̀ moo uu wùɛǒ kètekee bea u bo wan, è Pitɛ̌ sea dɛ bɔ boɔaa ji.

⁷ È nukpǎ nɛ̀ wǒa tàmo ɛ̈ chlìa u dlǒ, è Nyesoaa Win sɔnaě nukpǎǒ wlòmo kě I dɛ̌a I je, “Ně Jǔ Ě noɛɛ nee mǒ Nɔ̀à, a po Ɔɔ win nɔkǔ jebo!”

⁸ È tà u dǔaa jǐ je měne klě jǐ kapǒ kǎ wlòmo ù sea kɛ̀ nyu wùɛ jě de, ɛ̀ sìnʼaǒ Jùsuu do Ɔ̈ klee uu sɔ̌n neaǒo.

Chlachlǎ Bo Keǒ Ilaejɔ̀ɔ Tè Mɔ̀

⁹ È tà u keaěe togbeeǒ dlǒ mǒ sonwɛ, Jùsu tmɔɔ̌a nu buǔ tmɛɛ̌a nyu wùɛ keǒ dɛǒ u jěaa mɔ̀ ɛ mǐa ɛ kpa kpa bo Jbɛjuu Jǔǒ Bɔ̌ kǒa Bɔ̌ sɔnǎě kǒla mǒ Bɔ̌ dǔa jemǒ plě.

¹⁰ Ii tè dɛǒ u jěaa u sea ɛ nyu wùɛ tmɔɔ̌ no, kɛɛ dɛà nɛ̀ u pepeaě měne u je, “Nyu bɔ dǔ jemǒ bɔ sɔnʼě kǒla mǒ mɛ ɛ sɛ̀ɛ̌n kɛ nynɛ̌?”

¹¹ È u gbɛ̀a Ɔ wan u je, “Mɛ kɔɔ̌n tè teteǎ tee nyo dɛ̌ɛɛ̌ kɛ bò ɛ̈ moo Ilaejɔ̀ kɔn bɔ diǎ lě klekle plě Nyesoaa Tentǎn Jǔ miǎě di?”

¹² Ɔ tùa u kɛ̀ɛn Ɔ je, “I moo kàan tè, Ilaejɔ̀ kɔn bɔ diǎ lě klekle ɔ miǎ dɛ wùɛ mɔ̀le wɔ̀ keǒ Tentǎn Jǔ mɔ̀. Ɛ chleě le klě Nyesoaa win wlòmo ɛ̈ moo, ‘Jbɛjuu Jǔà Ɔ miǎ sònwɛ fòfoa jěba, u miǎ Ɔ jleě mɔ̀ sàba.’

¹³ Kɛɛ Ě tmɛɛ̌ ane, Ilaejɔ̀ diě le ɛ̌ wɛ̀ mɔ̀le, nyopò nu ɔ noǎ kukwǐ wùɛ mǒ ï u jlɛ̌ɛ wòje ke ɛ nuaa chleěa klě Nyesoaa win wlòmo.”

Jùsu Peana Jbɛju Bɔlo Kǔ Sùsu Nea Lěe Ja

¹⁴ Tà Jùsu klee Ɔɔ mɔ̀ cheěn nyoo tanʼǒ u nyniaǒo Ɔɔ mɔ̀ cheěn nyo tùuǒ mɔ̀, u jɛɛaǒ nyopò fòfoa ü tbɛɛa uu dǐ, u klee teteǎ tee nyoo tìe chɛtlǐia.

¹⁵ Tà diblɛ̌ǒ u jeěa lěe Jùsu nya, è nùǒ nia chǒn le ǔ kpalaě Ɔ mɔ̀ plùplɛ ǔ pea Ɔ tàto.

¹⁶ È Ɔ gbàla u wan Ɔ je, “Mi a chɛtlǐi liǐ kɛ mǒ?”

¹⁷ È nyuu do neaě diblɛ̌ǒ slè nɔ̀ tùa Lɔ kɛ̀ɛn ɔ je, “Tee Nyu, Ě jaě ně jbɛjuju kělɔɔ̀ mɔ̀. Kǔ sùsu neě ɔ ja, ɛ nu ɔ ɔ̌ se wien boɔboɔ ji.

¹⁸ È bɛ̌ nu ɛmo sùsuǒ bɛ̌ jɛɛ ɔ, ɛ pe ɔ wɔ̀ɔn fenfeɔ plǔ diiě ɔ wien ɔ̌ di nyě, è nɔ̀ǒ kɔn fǒ wùɛǒ kligbǎ. Ě gbà Nè mɔ̀ cheěn nyoà wan bu sàě ɔ kǔ sùsuǒ ja, kɛɛ u slě ɛ wɔ̀.”

¹⁹ È kě Jùsu dɛ̌a Ɔɔ mɔ̀ cheěn nyo je Ɔ je, “Amo nyopòà a se tè wlò popoɛ kɔn! È tǐ tae Bo sìǐn kɛɔ a slè plě a mǐǐ kàan tè popoɛ kɔn? È ke bo wlò dbadbǎà Ě kɔnʼɔ bɛ toǒn kɛ jleě mǒ bo keǒ a mɔ̀? A jaě jǔ bɔloǒ keàǎ mɔ̀.”

²⁰ Ii tè ǔ jalaě Ɔ jǔǒ mɔ̀. Kɛɛ tà sùsuǒ ɛ jeěa bòo Jùsu, ɛ kpɔtǐa jǔǒ dlǒ je chɔɔ ɔ̌ bea wɔ̀ɔn, è nɔ̀ǒ bitǐia mǒ ble keǒ blǒ mɔ̀ fenfeɔ plǔ diiaǒ ɔ wien.

²¹ È Jùsu gbàla jǔǒ ɔɔ gbeǐ wan Ɔ je, “È ke ɛ toǒn kɛ jleě mǒ bo ɛmo dɛà ɛ bea làa jǔà fǒ mǒ be be?” Ɔ tùa Lɔ kɛ̀ɛn ɔ je, “Sɔɔnʼě ɔɔ jǔ dɛ jleě mǒ.

²² Klě tǐ fòfoa wlòmo bɛ̌ kme ɔ, ɛ pe ɔ tǎn plě ɛ̌ peě ɔ ně mɔ̀ ɛ̌ jlɛ̌ bɛ dbǎ lɔ. Oo kàan Jbɛju, jbo ä wɔle je, bɛ̌ nu Bò wɔ̀le je Bò nu dɛ, è Bò sɛ̀ɛ ä mǒ!”

²³ È Jùsu gbàla ɔ wan Ɔ je, “Mɛ sɛ̀ɛ̌n kɛ nynɛ̌ ɛ̈ moo, ‘Bɛ̌ nu Bò wɔ̀le ɛ?’ Dɛ wùɛ wɔ̀le ɛ le keǒ nyuà po Něe tè kàan tè mɔ̀.”

²⁴ È tǐi doo tǐ jleě jǔǒ ɔɔ gbeǐ pnǎna dɛ jleě ɔ je, “Ě po i kàan tè, Ě bɛ̀teè le, mǎǒǒ mɔ̀ Ě mǐ kplɛ popoɛǒ bɔ̌!”

²⁵ È tà Jùsu jěaa diblɛ̌ǒ u keaa le gbè, è kě Ɔ dǎla kǔ sùsuǒ je Ɔ je, “Mò sunsǔn klee se wien boɔboɔ ji sùsuà, Ě tmɛ̌ neè ne, sɔnʼě jǔǒ ja mǒ plě nè diiǎa kɛ̀ě ɔ ja de!”

²⁶ È nɛ̀ǒ nenea ɛ̌ kpɔtǐa jǔǒ dlǒ je ɛ̌ poa ɔ wɔ̀ɔn, è nɔ̀ǒ ɛ sɔnaě ja mǒ. Tà ɛ sɔnaě ɔɔ ja mǒ, bò kea lɔ jě è je ɔ kǒa le, ii tè nyopò fòfoa je ɔ kǒa le.

²⁷ Kɛɛ Jùsu kmeea ɔ son Ɔ̌ dǔa ɔ jemǒ, è nɔ̀ǒ nynana bo.

²⁸ È Jùsu Nɔ̀ǒ muaě koǔ bo. Ɔɔ mɔ̀ cheěn nyo kpleaǒ je ǔ gbàla Ɔ wan u je, “Mɛ kɔɔ̌n tè ä seě kɛ lě wɔ̀ bä sà leě jǔǒ kǔ sùsuǒ ja?”

²⁹ È Ɔ tùa u kɛ̀ɛn Ɔ je, “Nyu wùɛ nɔ̀ slě ɛ wɔ̀ bɔ̈ sà lě nyu kǔ sùsu ja, ɛ̀ sìnʼǒ bɔ chìn bɔ bàte Nyesoa plě.”

Jùsu Sàla Ɔɔ Kokǒ Klee Jemǒ Dǔ Tè Wan De

³⁰ È nùǒ sɔnaǒ tùɔnʼǒ kɛn mǒ ǔ nymaea Jàlalǐi wakǎ mǒ, Jùsu ně jlǎ bo nyu bɔ jia tà Ɔ neaǒo.

³¹ Mɛ kɔɔ̌n tèǒ joo nɛ̀ moo Ɔ teea Ɔɔ mɔ̀ cheěn nyo Ɔ je, “Jbɛjuu Jǔà Ɔ miě bo demǒ sàeba Ɔ miě nyopò kwete mǒ poo lo u mǐ Ɔ dbǎ, kɛɛ bɛ̌ sìn, klě chnɛ̀ jlǒ wěe tan nenɛ wlòmo Nyesoa mi Ɔ jemǒ dǔba de.”

³² Uǔ jboa dɛǒ Ɔ boɛaa le, è u pea fano keǒ bu gbàla Ɔ wan keǒ Bɔ sèsaea ɛ kɛn le.

Mɔ Kɔɔ̌n Kɛ Tè Kmaǎ Chɔɔ Dɔ̌

³³ Tà u nynia lěe Kapanìa dǐa u pala lěe koǔ tɛ̀ɛ bo, è Jùsu gbàla u wan Ɔ je, “Mi a boɛɛ̌ kɛ keǒ snǔ mɔ̀?”

³⁴ Uu wùɛ u nua kpee. Mɛ̌oǒ joo nɛ̀ moo u chɛtlǐia keǒ snǔ mɔ̀, do bɔ̌ neǒ ɔ̀ je nɔ̀ kɔn tè kma chɔɔ dɔ̌, è do tɔ̀ɔ je nɔ̀ kɔn tè kma chɔɔ dɔ̌ ke.

³⁵ È Jùsu Nɔ̀ǒ nea bo Ɔ̌ dala Ɔɔ mɔ̀ cheěn nyoo pù tùo sɔ̌nʼǒ, è kě Ɔ dɛ̌a u je Ɔ je, “Nyu wùɛ bɔ̈ jlɛ̌ ɔɔ tè bi kma chɔɔ dɔ̌, ɔmo nyuǒ nɔ̀ miě deměne bɔɔ̌ba plě nɔ̀ bɔ̈ moo na wien po nyebajlo keǒ nyu wùɛ mɔ̀.”

³⁶ È Ɔ dǔa jǔ gbe mǒ nɔ̀ Ɔ nynaea bo keǒ u slè Ɔ̌ pea ɔ gbàe dɔ Ɔ je,

³⁷ “Nyu wùɛ ɔ̈ mii jǔ gbeà kuun Mǒo wlò je jebo kmema wòje keà jǔà ɔɔ ka nee je, è Ně chɛ̀à ɔ kmeě jebo. È nyu wùɛ ɔ̈ mi Mǒo jebo kmema, ɛ se bɔ kmeě jeboo do, kɛɛ Nyuà dbo Mǒo Nɔ̀ǒ ɔ kme jebo.”

Nyopòà Neeěe Jùsuu Wakǎ Kɛn

³⁸ È kě Jɔ̀ɔ̌n dɛ̌a Jùsu je ɔ je, “Tee Nyu, ä jě nyu tɔ̀ɔ ɔ̈ ni Nèe nynɛ̌ ɔ̈ sɛ̀ lěe nyopò kǔ sìsi ja le, ɔɔ̌ be ä kɛn äǎ naà de. Ii tè ä tmɔɔ̌ ɔ bɔ bɔ̌ dɛ.”

³⁹ Kɛɛ kě Jùsu nia u kɛ̀ɛn tùtuɛ Ɔ je, “Ɛ se nyu kɔn bɔ̈ nuu wlòlekaen dɛ klě Ně nynɛ̌ wlòmo plě bɔ̈ bitǐi bo tǐi doo tǐ jleě bɔ̈ boɔɔ win kukwǐ kěàǎ jleě mǒ. Tèǒ nì kɔn tè a bɔ̌ ɔ je kenkan.

⁴⁰ Nyu wùɛ ɔ̈ se ämoo je wɔ̀n ɔ neeě äa wakǎ kɛn.

⁴¹ È sɔ̌noka, Ě tmɛɛ̌ ane, nyuà mi amoo něe kàe waě nyema a mǐi nǎ keǒ tà a nɛ Mǒo de tè mɔ̀, ɔ mi ɔɔ snǒ sàe dɛ jěba keǒ ɛ mɔ̀.

⁴² È nyu wùɛ ɔ̈ mii jlǔ klɔkwlěà ü po Něe tè kàan tè uu nyu numa ɔ miě tè wlawlǎ slè be, ɛ mi tɛɛ numa bu pe ɔ kèuseɔ dɔ bu tuǔnʼě ɔ jbǒ mɔ̀, ɛ̀ sìnʼǒ bɔ beě Nyesoaa plɔɔ tu kɛn bo maěa bobo.

⁴³ Tèǒ nì kɔn tè bɛ̌ nu nè kweta bɛ̌ keè ni bò keě kpni kukwǐ slè be, bɛ̌ ɛ je mì ɛ kwa po. Ɛ mi tɛɛ numa bò kɔ̌ bò nae son tìe mɔ̀le bò muě jɔkɛn, ɛ̀ sìnʼǒ bò kɔn sonwee sɔ̌n bò beě na slè, naà ɛ̈ see chlechlɛ kɔn,

⁴⁴ tàa chenʼà dii nyopò iǐ kǒ lěe plě na ně chle lěe.

⁴⁵ È bɛ̌ nu nè bo bɛ̌ keè ni bò ke kpni kukwǐ ni, bɛ̌ ɛ je. Ɛ mi tɛɛ numa bò kɔ̌ bò ne boo do je bò muě jɔkɛn, ɛ̀ sìnʼǒ bò ne bee sɔ̌n je Nyesoa Bɔ poǎ lěè na slè,

⁴⁶ tàa chenʼà dii nyopò iǐ kǒ lěe plě na ně chle lěe.

⁴⁷ È bɛ̌ nu nè jleě bɛ̌ keè ni bò ke dɛ kukǔ ni, sàě ɛ dìe jǐ mǒ. Ɛ mi tɛɛ numa bò kɔn jleě do bò muě jɔkɛn, ɛ̀ sìnʼǒ bò kɔn jǐi sɔ̌n Nyesoa Bɔ poǎ lěè na slè,

⁴⁸ tàa chenʼà dii nyopò iǐ kǒ lěe plě na ně chle lěe.

⁴⁹ Nyopò wùɛǒ neěe u mi u na dlǒ le poba keà nyu pee dɛ tmɔ̌ kɛn.

⁵⁰ Tmɔ̌ nu tɛɛ, kɛɛ bɛ̌ nu bo tmɔ̌ɔ tanǔ bɛ̌ mǎ, è mɛ miǐ kɛ ɛ tmɔ̌ mǒ numa de? A tùě Nyesoaa win klě aa chɛ̀ wlè jleě bo keà tmɔ̌ neěe dɛ mɔ̀ ɛ̈ di ɛɛ numa a mǐ ně bo wnawna kmɔ̌ nee ne.”