Mǎkè 15 - Nyesoaa Kuo Win Jajle

U Kpalaǒ Jùsu Pàlɛ̌te Jemǒ

¹ Kènta gbìi Nyesoaa kpatòapoo fòe klee Jùwɛ nyoo bòlibo klee teteǎ tee nyo klee Jùwɛ nyoo tè tù nyo wùɛ bòa le kekǎ kekǎ ǔ poa dɛ ble keǒ Jùsu jleě mǒ ǔ pea Ɔ chěen sonwe le ǔ dǔa Ɔ mǒ ǔ kpala Ɔ klě Wlǔmɔɔ kòngmna nyefòɛ ɔ̈ moo Pàlɛ̌te mɔ̀.

² È Pàlɛ̌te gbàla Ɔ wan ɔ je, “Deě Mò moo kɛ Jùwɛ nyoo Klɔ̀ba?” Ɔ tùa ɔ kɛ̀ɛn Ɔ je, “Ii teěn nìǒ bòɔ.”

³ È Nyesoaa kpatòapoo fòe pea Ɔ noǎ fòfoa tìi dlǒ le.

⁴ È Pàlɛ̌te gbàla Ɔ wan de ɔ je, “Sè kɛ dɛ kɔn Bò boɔɔ le? Jě noǎ wùɛà u pe Mòo dlǒ le.”

⁵ Kɛɛ Ɔɔ̌ boɔa wien, ii tè i kaenʼa Pàlɛ̌te le wlò.

U Bɛ̌a Jùsu Kokǒ Wun Kɛn

⁶ Tǐ wùɛ mɔ̀ bo Dlǒ Mǒ Sìin Didi Dɛɛ de ngmně tǐ bǐ nyniǒ, Pàlɛ̌te tɛ wùlo po nyoo nyuu do bo ɔ̈ diblɛ̌ sòɛ bu tɛɛ bo.

⁷ È klě tǐǒ wlòmo jbɛju tɔ̀ɔ u dɛɛ Balabɔ̀ nɔ̀ u poa wùlo ɔ̈ klee nyopò tùu ü jlɛ̌ bu sàlaǒo Wlǔmɔ kòngmna ü pooa nyopò tùu mnùngma mǒ bo.

⁸ Tà diblɛ̌ǒ u dia lěe Pàlɛ̌te mɔ̀ u gbàla ɔ wan keǒ kàan dɛ ɔ ni pnɔɔ keǒ u mɔ̀ ɛɛ tè,

⁹ ɔ gbàla u wan ɔ je, “A jlɛ̌ boǒ tɛ kɛ Jùwɛ nyoo Klɔ̀ba bo keǒ a mɔ̀le?”

¹⁰ È tè kɔn tè ɔ gbàlaa dɛǒ wan nɛ̀ moo ɔ jia ɛle ɛ̈ moo Nyesoaa kpatòapoo fòe jalaě ɔ Jùsu mɔ̀ klě chea tǔn wlòmo. Nɛ̀ kɔn tè ɔ jěa lɛ ɛ̈ moo Jùsu Nɔ̀ u miia bo tɛba.

¹¹ Kɛɛ Nyesoaa kpatòapoo fòe nyenynǎea diblɛ̌ǒ, kě u dɛ̌a u je, “Balabɔ̀ nɔ̀ ä jlɛ̌ bò tɛ bo!”

¹² È kě Pàlɛ̌te nia u wan gbògba de ɔ je, “È mɛ a jlɛ̌ bo nuǔ kɛ Nyuà a dɛɛ lee Jùwɛ nyoo Klɔ̀ba mǒ?”

¹³ È uu wùɛ nùǒ pnaěaě jɔ mǒ de u je, “Kɔǒ Ɔ pète bɛ̌ tu jleě!”

¹⁴ È Pàlɛ̌te gbɛ̀a u wan de ɔ je, “Mɛ̌oǒ? Mɛ sɛje Ɔ nuǔ kɛ ɛ̈ monoǒ kenkan dɛ?” Kɛɛ u pnɛɛ̌aě jɔ mǒ chɔɔ u je, “Kɔǒ Ɔ pète bɛ̌ tu jleě!”

¹⁵ Pàlɛ̌te jlɛ̌ bɔ blooa nyopòǒ uu plɔ, ii tè kě ɔ nua Balabɔ̀ bo tetɛ keǒ u mɔ̀, è Jùsu Nɔ̀ ɔ sàla fǎe kɛn ɔ̌ nyea Ɔ tabɔ̀ bu muaǒ Ɔ pète bɛ̌ tu jleě kɔ.

Tabɔ̀ Pea Jùsu Pà Kɛn

¹⁶ È tabɔ̀ dǔa Jùsu mǒ ǔ paeaě Ɔ kòngmnaa kǎ fòɛ bo ɛ̈ u dɛɛ lee Platonìa ǔ dala tabɔ̀ wùɛǒ ǔ bòa le.

¹⁷ È u poa Lɔ jǐlenmɔ manǐwlù wlawlǒ pɛ̀tu mǒ keà klɔ̀ba ǔ nua dɔwiǎ chùnɔɔ gbàkla nɛ̀ u tùa Ɔ dlǒ.

¹⁸ È Nɔ̀ǒ u tùngmaea pà kɛn popoɛ ǔ dɛa Lɔ, “Hehejoo, Jùwɛ nyoo Klɔ̀ba!”

¹⁹ U nia tu ke ǔ beea Ɔ dlǒ ǔ pepeea ɛ kwete měne ǔ wnea Ɔ tontmɔ ǔ chlìaǒ Ɔ jemǒ bo ǔ sɛ̀a Ɔɔ wɛ̀ keǒ bu tbala Ɔ je le.

²⁰ Tà u wɔ̀la Ɔɔ pà kɛn popoɛ mɔ̀, u sàla Ɔ manǐwlù wlawlǒǒ mǒ ǔ poa Lɔɔ chɛ̀ɛ wlawlǒ mǒ de, è Nɔ̀ǒ u kpala u mǐaǒ Ɔ pète bɛ̌ tu jleě kɔ.

U Kɔlaǒ Jùsu Pète Bɛ̌ Tu Jleě

²¹ È tà u keaa mi keǒ snǔ mɔ̀, u klee jbɛju tɔ̀ɔ ɔ̈ moo Saemɔ̌ nù mɔɔa, Saemɔ̌ǒ ɔ sonwɛa mǒ ɔɔ blětà ɔ̌ miaě dě fòɛǒ moo Jlǔsnɛ wlòmo ǔ kpaea ɔ kpě ɔ̌ blěa Jùsuu pète bɛ̌ tu. Saemɔ̌ sɔnaě mǒ diěǒ u dɛɛ Sawlinì kɛn, è ɔ mooa Ɛlesandɔ̌ klee Wlufɔ̀ɔ gbeǐ.

²² È u kpalaě Jùsu klě tùɔnʼǒ kɔn kɛn u dɛɛǒo Kɔkɔ̀ta ɛ̈ sɛ̀nʼɛ nynɛ̌ Kǔ Dlǒ Kankǒ Kɛn.

²³ Keǒ tàǒ keǒ u pooaǒ nmɔ wan nonǒ dɛ mɔ̀ u dɛɛ maà nɛ̀ u nyea Nɔ, kɛɛ Ɔ sea ɛ nǎ.

²⁴ Ii tè kě u nuaǒ Ɔ pète bɛ̌ tu jleě kokɔ ǔ pooa Ɔɔ wlawlě nòkpo kɛn keǒ ii ploplɛ mɔ̀ plě u mǐa ɛ jě ii dɛ tae nyuu do miaa kpaba.

²⁵ Ɛ mooa àwɛɛ siědo nenɛ mɔ̀ klě kènta wlòmo ǔ kɔaǒ Ɔ pète bɛ̌ tuǒ jleě.

²⁶ È dɛǒ mooa Ɔ blěe tè jɛɛa u mǎna Ɔɔ kɛn bo u chlěaa keǒ Ɔ dlǒ mǒ kě ɛ dɛ̌a ɛ je, “JÙWƐ NYOO KLƆ̀BA NƆ̀À.”

²⁷ È u mǎna Ɔ kɛn bo jlǐ nyoo sɔ̌n u kɔaǒo pète bɛ̌ ti jleě ke, do neea Lɔɔ dilǎ son mɔ̀, è do tɔ̀ɔ neea Lɔɔ gbàpe son mɔ̀.

²⁸ È Nyesoaa win jaěaǒ lo ï dɛ̌a bòo, “U mi Ɔ ka kukǔ numa wòje dɛ kukǔ nuɔ.” (Is 53.12)

²⁹ Nyopòǒ nɛaa snǔǒ mɔ̀ ü sìinʼaǒo tàǒ bǔ kea Jùsu jě, u blɛa dlě je le ǔ tbɛa Ɔ je le ǔ pea Ɔ pà kɛn, kě u dɛ̌a u je, “Ɛ̀nhɛɛ̀, dɛ̌ jè mia kɛ Nyesoaa kǎ fòɛ blǒ mǒ wlǎba mìa ɛ po klě chnɛ̀ jlǒ wěe tan wlòmoò, dɛ̌ Mòǒ jo?

³⁰ Gblà Dìe! Sàǒ Dìe pète bɛ̌ tuǒ jleě!”

³¹ È dɛɛ doǒ nɛ̀ Nyesoaa kpatòapoo fòe klee teteǎ tee nyo nia ke ǔ pea Ɔ pà kɛn, kě u dedɛ̌ɛa je le, “Ɔ gblɛ̀ nyopò tùu, kɛɛ Ɔ se Ɔɔ chɛ̀ gblàgbla wɔ̀!

³² A nɛ bä jě Nyesoaa Tentǎn Jǔ Ɔ̈ moo Ǐsòwɛ̌ kwɛɛn Klɔ̀ba Bɔ sàǒ Ɔɔ chɛ̀ pète bɛ̌ tu jleě kèkeà ɛ̈ di ɛɛ numa ä mǐ Ɔɔ tè kàan tè po!” È tàii sɔ̌nʼɔ chɛ̀ǒ ü klee Ɔ̀ neaǒo pète bɛ̌ tiǒ jleě u pea Ɔ pà kɛn ke.

Jùsuu Kokoɛ̌

³³ È klě wɛnʼɛ blǒ mǒ wulee tǐ wlòmo ùu blǒ wùɛǒ ɛ̈ bea kɛn kwijlě ɛ̌ kpala ɛ kpa ɛ̌ nua àwɛɛ tan nenɛ klě wanpno wlòmo.

³⁴ Klě àwɛɛ tan nenɛ tǐ wlòmo Jùsu pnaěaě jɔ mǒ Ɔ je, “Ilà, Ilà Lɛma Sabatnè!” ɛ̈ sɛ̀nʼɛ nynɛ̌, “Ně Nyesoa, Ně Nyesoa, mɛ kɔɔ̌n tè sɛ̀ɛ̌ kɛ Mǒ jleě mɔ̀?!” (Ps 22.1)

³⁵ È nyopòo tìeǒ nynanaǒo tàǒ bo tà u wɔ̌naa winʼǒ, kě u dɛ̌a u je, “A tanʼǒ le, Nyesoaa wnɔsàɔ Ilaejɔ̀ǒ Ɔ dɛ!”

³⁶ È uu nyuu do kpala plùplɛ ɔ̌ jalaě dlǒ pìnpni nì ɔ tùa tu jleě ɔ̌ nynǎnaě i weě ně mɔ̀ nɛ̀ ɔ tùaǒ Jùsu wien, è kě ɔ dɛ̌a ɔ je, “A nɛ bä tanʼǒ le ä mǐ ɛ jě bo Ilaejɔ̀ bɔ̌ diě diba ɔ miě Ɔ tuǒ jleě sà.”

³⁷ È Jùsu pnaěaě jɔ mǒ de, è Nɔ̀ǒ ngmnana fònfno.

³⁸ Klě tǐi doǒ wlòmo da kpoklǒ fòɛǒ nea lěe Nyesoaa kǎ fòɛ bo è nɛ̀ǒ klǎla wan sɔɔnʼě ɛɛ dlǒ mǒ bò diɔ ɛ bobo, ɛ nua peěnʼe sɔ̌n ɛ mǐ ɛ tee le ɛ̈ moo nyu wùɛɛ fɔ̌ kna je keǒ bɔ nyniǒ Nyesoa jemǒ ɛ̈ see Nyesoaa bodiɔpòo do.

³⁹ Tà tabɔ̀ɔ jǐgbàdiɔǒ nynanaǒo Jùsu nya bo ɔ jěaa ke Jùsu nuaa kokoɛ̌, è kě ɔ dɛ̌a ɔ je, “I moo kàan tè Jbɛjuà Ɔ moo Nyesoaa Jǔ!”

⁴⁰ È ɛ kɔna nynoo tìe ü nynanaǒo nya bo ü jěaa dɛǒ kpɛaa tùɔn ɛɛ tà, jà Mɛwlě Mɛkɛniì klee Salomì klee Mɛwlě ɔ̈ mooa Jìmǐse chěnchaě klee Josìi naǎ.

⁴¹ Tà Jùsu nea lěe Jàlalǐi wakǎ kɛn nynoǒ nù nɛa pnɔ Ɔ de plě ü kɔnaě Ɔɔ tè mɔ̀. Nyno fòfoa tùu ü diaě Ɔɔ mɔ̀le klě Jlǔsnɛ nù neaǒ ke.

Jùsuu Bo Tùtuɛ

⁴² Ɛ mooa Flǎàde ɛ̈ moo chnɛ̀ jlǒ waěǒ u wɛ̀ lee mɔ̀le keǒ Nyesoaa defɛ chnɛ̀ jlǒ waě mɔ̀. Ii tè tà ɛ keaa wìtika ni,

⁴³ è Jòsɛ̌fo ɔ̈ mooa Jùwɛ nyoo tè tù nyoo nyuu do u jěaa nyu mǒ ɔ̈ sɔnaěe diěǒ moo Alamatià kɛn mǒ nɔ̀ diaě Jlǔsnɛ. Ɔ mooa nyuu do ke ɔ̈ dǔaa Nyesoaa win kwa konkɔn snǔ mɔ̀le pònpɔn mǒ seela. Nɔ̀ tùaě je le kunkuɛn ɔ̈ muaě Pàlɛ̌te mɔ̀ ɔ̈ sòala Jùsuu kokǒ fǒ.

⁴⁴ I kaenʼa Pàlɛ̌te le wlò bɔ dia i wɔ̌n ɛ̈ moo Jùsuu kokoɛ̌ seaǒ wlɛ̀, ii tè ɔ dala ɔɔ tabɔ̀ǒ uu jǐgbàdiɔ ɔ̌ gbàla ɔ wan bɛ̌ nu bo Jùsu Bɔ̌ kǒa kàan tè.

⁴⁵ Tà ɔ wɔ̌naa winʼǒ jǐgbàdiɔ sèsaea ɔɔ wlòmo, è Jùsuu kokǒ fǒ nɛ̀ǒ ɔ nyea Jòsɛ̌fo.

⁴⁶ È Jòsɛ̌fo tɔ̀na jǐlenmɔ dalo u sɛ̀ɛǒo kǔ ɔ̌ dǔa kokǒ fǒǒ mǒ ɔ̌ sàlaǒ ɛ pète bɛ̌ tu jleě ɔ̌ finfiɛ̌ɛa ɛ daloǒ ɔ̌ kpala ɛ klě sɛklɛ bǐtìe wan ɛ̈ ɔ blǔaa klě seɔ̌ wlòmo, klě ɔ tùaě Ɔ bo. U gblìseea seɔ̌ fòɛ měne ǔ kana bǐtìeǒ je.

⁴⁷ Mɛwlě Mɛkɛniì klee Mɛwlě ɔ̈ mooa Josìi naǎ nù gbɛ̀ɛa tàǒ u tùaǒo Jùsu bo.