Mǎkè 14 - Nyesoaa Kuo Win Jajle

Jùsuu Dbadbǎ Snǎ

¹ Chnɛ̀ jlǒ wěe sɔ̌n nì siaǒ Dlǒ Mǒ Sìin Didi Dɛ klee Ně Jǎ Flɔ̌ɔ Didiɛɛ de ngmně tǐ mǐaǒ nyni, è Nyesoaa kpatòapoo fòe klee teteǎ tee nyo pɛ̀na le fɔ̌ u mǐa Jùsu kme klě je wɛ̌ tǔn wlòmo u mǐa Ɔ dbǎ.

² Kɛɛ kě u dɛ̌a u je, “Äǎ ni ɛ keǒ wlèwle digbaǐi tǐ wlòmo. Bä nu ɛ, tǐ tìi tà jale jejǎea fòɛ kɔn bɛ be blǒ mǒ.”

Nynɔ Tɔ̀ɔ Chniǐaǒ Jùsu Chnɔ̌ Dlǒ

³ Tǐǒ jleě Jùsu neaě diěǒ moo Bɛtnè kɛn klě Saemɔ̌ɔ koǔ bo ɔ̈ bale kwɛ̌ tɛaa bo. È Ɔ kea dɛ di, nynɔ tɔ̀ɔ jalaě seɔ̌ sòtae ɛ̈ jǐaa sonsnǒ chnɔ̌ je ɛ̈ peaa wlě fòfoa. Nɛ̀ ɔ knana je ɔ̈ chniǐaǒ Jùsu dlǒ.

⁴ È nyopòo tìeǒ jěaa dɛǒ ù pea jlo, kě u dɛ̌a klě uu chɛ̀ slè u je, “Mɛ kɔɔ̌n tè ɔ nymii niǐ kɛ chnɔ̌ǒ jǐ le?

⁵ Chnɔ̌ǒ ɛ blɛɛ je nyopò bu plo ɛ bɛ jě jlǒ gblèe snǒ sàe wlě u mǐ ɛ sònwɛ nyo měne sɛ̀ɛ le!” Ii tè ǔ boɛa nynɔǒ win fǒ měne chɔɔ.

⁶ Kɛɛ kě Jùsu dɛ̌a u je Ɔ je, “A sàǒ ɔ wun mɔ̀. Mɛ kɔɔ̌n tè a nii niǐ kɛ nynɔà feanfeǒ? Ɔ nu kàan dɛ keǒǒ mɔ̀.

⁷ Tǐi pɛpɛ mɔ̀ a klee sònwɛ nyo a miɔ kmɔ̌ɔ mɔ̀ nema, è aa nyu bɔ̌ jlɛ̌ uu nyu mǒ sɛ̀ɛa ɔ mi ɔ mǒ sɛ̀ɛba. Kɛɛ Mǒà Ě seɔ a slè nema mu tǐ wùɛ mɔ̀.

⁸ È dɛ ɔ wɔ̀lee nunuɛ nɛ̀ǒ ɔ ni ɔ̌ chniǐǒǒ chnɔ̌ dlǒ. Ně fǒà nɛ̀ ɔ wɛ̀ mɔ̀le keǒ bo tùtuɛ mɔ̀ ɛ̈ neěe nya.

⁹ Tèǒ nì kɔn tè Ě tmɛɛ̌ amo, tà wùɛ u miǒ Nyesoaa kàan tuposàà pooba kělɔ kmɔ̌ɔ mɔ̀, dɛà nynɔà ɔ nuu u mi ɛɛ tè boɔba ke, dɛǒ nɛ̀ moo ɔɔ wlò mɔ̀le popoɛ.”

Jùdǎse Sàlaě Jùsu Bo Demǒ

¹⁰ È Jùdǎse Esekalìa ɔ̈ mooa tàii pù tùo sɔ̌nʼǒ u nyuu do nɔ̀ muaě Nyesoaa kpatòapoo fòe mɔ̀ ɛ̈ di ɛɛ numa ɔ mǐaě Jùsu bo demǒ sà keǒ u jemǒ.

¹¹ Tà u wɔ̌naa dɛ Jùdǎse boɔla uu je, è uu plɔ blooa ɛ kɛn chɔɔ ǔ pooaě ɔ wlě. Ii tè sɔɔnʼa kɛ̀ǒ tǐǒ jleě mǒ Jùdǎse pɛ̀na kàan fɔ̌ le ke ɔ mǐa lěe Jùsu bo demǒ sèsa nu.

Dlǒ Mǒ Sìin Didi Dɛ

¹² È nyane chnɛ̀ jlǒ waěǒ kɔn mǒ u tùi Ně Jǎ Flɔ̌ɔ didiɛ wlò u dbɛ̌ɛ lěe blajlǔ mǒ keǒ Dlǒ Mǒ Sìin Didi Dɛɛ de ngmnengmnɛ̌ mɔ̀, Jùsuu mɔ̀ cheěn nyo gbàla Ɔ wan u je, “È tà jlɛ̀ bä wɔ̀ɔ loǒ kɛ Dlǒ Mǒ Sìin Didi Dɛà mɔ̀le keǒò mɔ̀?”

¹³ È Ɔ dboa Ɔɔ mɔ̀ cheěn nyoo sɔ̌n Ɔ̌ tmɔɔ̌a nu Ɔ je, “A muě Jlǔsnɛ dǐa, jbɛju tɔ̀ɔ mi a kɛn jɛɛba ɔ̈ blěe ně jagbee, a na ɔ de

¹⁴ koǔǒ kɔn bo ɔ miěe paba, a tmɔɔ̌ jbɛjuǒ kɔnʼɔ koǔǒ u je, ‘Äa Tee Nyu je tà nè dakpě blò neě kɛ, tà Ɔ klee Ɔɔ mɔ̀ cheěn nyo miěe Dlǒ Mǒ Sìin Didi Dɛ diiba?’

¹⁵ Ɔ mi a blò fòɛ teeba ɛ̈ neěe koǔ ja ɛ̈ u snǎ lěe bo ble le noǎ wùɛ wɛ̀ɛ mɔ̀le ï neěe. Klě ba wɔ̀ɔě didi dɛǒ mɔ̀le keǒ ä mɔ̀.”

¹⁶ Ii tè Ɔɔ mɔ̀ cheěn nyoo sɔ̌nʼǒ ǔ muaě diěǒ wlòmo, ke Ɔ nua nɛ ùu tmɔɔ̌a teěn kě dɛ wùɛ u jěaa ɛ nua tùɔn kpokpa. È Dlǒ Mǒ Sìin Didi Dɛ nɛ̀ǒ u wɔ̀a mɔ̀le.

¹⁷ È klě wìtika wlòmo Jùsu klee Ɔɔ mɔ̀ cheěn nyoo pù tùo sɔ̌nʼǒ ù pala dǐa.

¹⁸ È tà u keaa dɛ di u tbɛɛaa ngmà fuoǒ dǐ, è kě Jùsu dɛ̌a u je Ɔ je, “Tèe jleě nìà Ě tmɛɛ̌ amo, aa nyuu do ɔ̈ klee Mǒo sɔ̌n diiǒo tàa do dɛ nɔ̀ miěě bo demǒ sàba.”

¹⁹ Ùu wùɛǒ ù bea měne wɔle ǔ pea ɛ do do ǔ gbɛ̀a Ɔ wan le, “Deě mǒà mǒ ɛ tù kɛ le? Mǒà mǒ ɛ tù kɛ le?”

²⁰ Ɔ tùa u kɛ̀ɛn Ɔ je, “Amo tàii pù tùo sɔ̌nʼà amo kɔn nyuu do ɛ tù. Nyuǒ ɔ̈ klee Mǒo sɔ̌n ä pɛɛnʼěe son fuo wan nɔ̀ ɛ tù.

²¹ Jbɛjuu Jǔà Ɔ mi kǒba ke Nyesoaa win dǎa, kɛɛ chlǒ keǒ nyuà mɔ̀ ɔ̈ miě Ɔɔ bo demǒ sàba. Ɛ mii tɛɛ numa ɔmo nyuǒ bɔ̌ seea kɔɔn no kělɔ kmɔ̌ɔ mɔ̀.”

Koɔnʼɔ Wìti Didi Dɛ

²² È tà u keaa dɛ di, Jùsu dǔa flɔ̌ɔ tìe mǒ Ɔ̌ pea Nyesoa tàto Ɔ̌ klǎla ɛ wan le Ɔ̌ nyea nɛ Ɔ̀ɔ mɔ̀ cheěn nyo Ɔ je, “A dǔ ɛ mǒ a di ɛ, dɛà nɛ̀ moo Ně fǒ.”

²³ È Ɔ dǔa mǒ naě kàe mǒ ɛ̈ jǐa lěe Ɔ̌ pea Ɔɔ Gbeǐ tàto keǒ ɛ mɔ̀ Ɔ̌ nyea nɛ uu wùɛ ǔ naěa ɛ mǒ.

²⁴ È kě Ɔ dɛ̌a u je Ɔ je, “Dɛà nɛ̀ moo Ně nymɔ ɛ̈ gblɛ̀ le keǒ nyopò fòfoa mɔ̀ plě nɛ̀ po kuo win jajleǒ neǒo tùonyopo klee Nyesoa pǎnpe kòo kɛn.

²⁵ È kàan tè nìà Ě tmɛɛ̌ amo, Ě seǎa kɛ̀ kwlepò dbǔu buoo nmɔ nǎ de ɛ mǐ ɛ kpa kpa ɛ miǎ chnɛ̀ jlǒ waěǒ Ě miǎ ɛɛ jajlo nǎma kɛn jɛɛ le klě Nyesoaa deplě slè.”

²⁶ È nùǒ blea Nyesoa wlɛ̌ ü pěaǒ plomǒ ü muaě togbeeǒ moo Ɔlè dlǒ.

Jùsu Sàla Pitɛ̌ɛ Chnɛ̀chnɛ Tè Wan

²⁷ È Jùsu tmɔɔ̌a nu Ɔ je, “Aa wùɛà a miǒǒ bo siba. Mɛ̌oǒ joo nɛ̀ moo Nyesoaa win nì boɔ li i je, ‘Ě mi blableǎ Jǐ Mɔ̀ Tù Nyu dbǎba, Ɔɔ blǎgbò mi le gbɛ̀tɛɛ le.’ ” (Zech 13.7)

²⁸ È Jùsu kpɛɛa Ɔɔ win nya Ɔ je, “Kɛɛ bo Nyesoa Bɔ̌ sàlǎ lěě kǒla mǒ, Ě miǎě a nya muma klě Jàlalǐi wakǎ kɛn klě a klee Mǒ ä miaě mɔɔma.”

²⁹ È kě Pitɛ̌ dɛ̌a Ɔ je ɔ je, “Baǎje nyopò wùɛ bǔ siǒò bo, kɛɛ mǒà Ě seǒò bo siba mu!”

³⁰ È kě Jùsu dɛ̌a ɔ je Ɔ je, “Kàan tèà Ě sèsɛ leè wlòmo, klě tǒn jlǒ waěà wlòmo plě seaka kokɔ̌ mǐma slò, mìǐ mɔ̀ chnɛ̀ma ɛ̈ moo sèě ji klě wěe tan wlòmo.”

³¹ Kɛɛ kě Pitɛ̌ dɛ̌a kaǒ ɔ neaǒ ɛ kɛn ɔ je, “Baǎje bǔ momǎe mǒ klee Mòo sɔ̌n kɛn bo bǔ ke ä dbɛ̌ba mii chɛ̀, Ě seǎà mɔ̀ chnɛ̀ kpe ɛ̈ moo Ě seè ji!” È ɔɔ bǐì mɔ̀ cheěn nyo tùuǒ dɛɛ doǒ nɛ̀ u boɔla ke.

Jùsu Bɛ̀tea Ɔɔ Gbeǐ Klě Bòǒ Moo Jɛ̀semne Wlòmo

³² È Jùsu klee Ɔɔ mɔ̀ cheěn nyo nyniaě bòǒ u dɛɛ Jɛ̀semne wlòmo, kě Ɔ dɛ̌a u je Ɔ je, “A neà tàa bo Boǒ kèklaeǒ nya Ě miě Ně Gbeǐ mɔ̀ boɔ.”

³³ È Ɔ dǔa Pitɛ̌ klee Jìmǐse klee Jɔ̀ɔ̌n mǒ nù Ɔ kpala, feanfeǒ klee tǐ jakě fòe nì jǐa Lɔ je.

³⁴ È kě Ɔ dɛ̌a u je Ɔ je, “Ně wlòà ɛ jǐ je le wɔle chɔɔ, ɛ jlɛ̌ bɛ dbǎ Mǒ, nɛ̀ kɔn tè a neàǎ gbàa bo a tù jǐ mɔ̀.”

³⁵ È Nɔ̀ǒ jejǎeaǒ nya bo Ɔ̌ chlìaǒ blǒ mɔ̀ bo Ɔ̌ bɛ̀tea Nyesoa Ɔ je, “Bɛ̌ nu bɛ̌ wɔ̀le ɛ, è Nè sonwɛǒǒ mɔ̀ mǒ Ně beě tǐ jakěà slè.

³⁶ Ně Gbeǐ, noǎ wùɛ wɔ̀le ɛ le keǒò mɔ̀, ii tè sàǒ sònwɛ jejeɛ̌ɛ kàeà kěàǎ jleě mǒ, kɛɛ bɛ̌ nu Bò se ɛ jlǎ, è dɛǒ jlɛ̀ɛ nɛ̀ Bò nu ɛ̈ se Něe chɛ̀ɛ kɛn wɔɔn dɛ.”

³⁷ È tà Ɔ tbaeaa je kělɔ Ɔɔ mɔ̀ cheěn nyoǒ mɔ̀, Ɔ̀ jɛɛa u mǒ momnɔ, è kě Ɔ dɛ̌a Pitɛ̌ je Ɔ je, “Saemɔ̌, mɛ̀ kɛ lee? A slě wɔ̀ ba mǎ kɛɛ̌ le bä tù jǐ mɔ̀ klě àwɔɔ do wlòmo le?

³⁸ A gbɛ̀ɛ le a mǐ Nyesoa bàte aǎ diě měne tèntɛn slè be. Tùonyuu wlò wɔɔn ɛ kɛn keǒ bɛ nu Nyesoaa kɛn wɔɔn dɛ, kɛɛ tùonyugbee kpni kukwǐ kmɔ̌ǒ neě ɔɔ mǒ nɛ̀ ɛɛ̌ wɔɔn ɛ kɛn.”

³⁹ È Nɔ̀ǒ tbaea je de Ɔ̌ mua Ɔ̌ nia winʼi doǒ Ɔ̌ bɛ̀tea Ɔɔ Gbeǐ Nyesoa.

⁴⁰ È tà Ɔ tbaeaa je, Ɔ̀ jɛɛa u mǒ momnɔ de. Mɛ̌oǒ joo nɛ̀ moo uu kbě wɛ̀aě le chɔɔ. È tà Ɔ sàla uu momnɔ mǒ, u sea dɛ ji bu boɔla Ɔɔ je.

⁴¹ È wěe tan nenɛ mɔ̀ tà Ɔ tbaeaa je, è kě Ɔ dɛ̌a u je Ɔ je, “A mɛɛ̌ jè kɛ le kaǒ ǎ sɛ̀ lě kɛn jɔ mǒ le? Momnɔǒ ɛ wɛ̀ mɔ̀ no, tǐ nyniǒ noò. A tanàle, Jbɛjuu Jǔà Ɔ miě bo demǒ sàeba klě kpni kukwǐ nyo kwete mǒ!

⁴² A dǔ jemǒ, a nɛ bä mu! A tanàle, nyuà ɔ̈ sàě Mǒo bo demǒ nɔ̀ǒ diěò!”

U Kmea Jùsu

⁴³ È tà win kɛ̀naě Jùsu wan bo, è Jùdǎse ɔ̈ mooa tàii pù tùo sɔ̌nʼǒ u nyuu do, è nɔ̀ǒ nyniaǒ, ɔ jalaě diblɛ̌ ü sɔna lěe Nyesoaa kpatòapoo fòe klee teteǎ tee nyo klee Jùwɛ nyoo bòlibo mɔ̀ mǒ. U blěa kwa le pen klee kpangbia.

⁴⁴ È Jùdǎse nyea diblɛ̌ǒ jboo dɛ ɔ je, “Bä nyniǒ, Nyuǒ a jlɛ̌ɛ Nɔ̀ kɔn wun Ě mi nyǒma, è ba kme Ɔ. A tbɛɛ Ɔ dǐ, aǎ tɛ Ɔ bo a mǐ Ɔ kpa.”

⁴⁵ Tǐi doo tǐ jleě tà Jùdǎse nyniaǒo, ɔ kèklaeaǒ Jùsu gbàa ɔ je, “Chì Kpa Ämoo,” ɔ̌ nyǒa Jùsuu wun.

⁴⁶ È Nɔ̀ǒ u jǎla mǒ u kmea.

⁴⁷ Kɛɛ nyuu do nynanaǒ tàǒ bo nɔ̀ sloaě ɔɔ pan bɔ mǒ ɔ̈ sàla Nyesoaa bodiɔɔ nyebajloo do nɔkǔ dlǒ.

⁴⁸ È Jùsu gbàla u wan Ɔ je, “Mɛ kɔɔ̌n tè a keě kɛɔ Mǒ mɔ̀ di a jɛ leě pen klee kpangbia wòje keà nyu mii jliɔ̌ le pɔ̀nma?

⁴⁹ Klě Ě ne pnɔě a mɔ̀ Nyesoaa kǎ fòɛ bo tǐ wùɛ mɔ̀ Ě boɛ a Nyesoaa tè je klě a slěě kmee ne. Ɛmo dɛǒ ɛ kpa tùɔn ɛ̈ di ɛɛ numa Nyesoaa winʼà i miǒ jaě le.”

⁵⁰ È Ɔɔ mɔ̀ cheěn nyo wùɛ nùǒ plùa ü siaǒ Ɔ bo.

⁵¹ È nyemò tɔ̀ɔ ɔ̈ nɛaa Jùsu mɔ̀ ɔ̈ pea ɔɔ kɛn po dalo kɛn le, tà u jlɛ̌ bu kmea nɔɔ ke,

⁵² ɔ sia u daloǒ kwete mǒ ɔ̌ poa gblàgblo ɔ̌ plùa.

U Jalaǒ Jùsu Jùwɛ Nyoo Tè Tù Nyo Jemǒ

⁵³ È u dǔa Jùsu mǒ ǔ kpalaě Ɔ klě Nyesoaa bodiɔɔ tà, è Nyesoaa kpatòapoo fòe klee Jùwɛ nyoo bòlibo klee teteǎ tee nyo uu wùɛ nùǒ bòa le klě koǔǒ bo.

⁵⁴ Pitɛ̌ nɛa Jùsu de, kɛɛ ɔ poa Ɔ kpa mɔ̀ bo ɔ̌ muaě klě bodiɔɔ blilǐ tù koǔǒ ɛɛ pànto mǒ ɔ̌ beaě tabɔ̀ǒ tùiaa jǐ mɔ̀ slè ɔ̌ wɛ̌nʼa na.

⁵⁵ È Nyesoaa kpatòapoo fòe klee Jùwɛ nyoo tè tù nyo wùɛ pɛ̀na le sàsepo ü mǐaa Jùsu tè kmee ne u miǎ Ɔɔ dbǎ, kɛɛ uǔ jěa kenkan dɛ u miǎ Ɔɔ kmee ne.

⁵⁶ Nyopò fòfoa pea Ɔ sen kɛne, kɛɛ uu boɔboɔ win ně beaǒ tàa do.

⁵⁷ È klě demǒ bɔɔ̌ tǐ wlòmo sen le tmɔ̌ nyo tùu nùǒ nynana bo u je,

⁵⁸ “Dɛà nɛ̀ Ɔ boɛa le ä wɛ̌nʼa, Nyesoaa kǎ fòɛà äa nyopò poo Ɔ je Ɔ mi ɛ wlǎba plě Ɔ mǐ ɛ bě tɛ̀ɛ po klě chnɛ̀ jlǒ wěe tan wlòmo ɛ̈à tùonyuu son seǒ jleě mǒ mu.”

⁵⁹ Kɛɛ win wùɛ u boɛaa le iǐ beaǒ tàa doo chɛ̀.

⁶⁰ Ii tè Nyesoaa bodiɔ nynana bo keǒ nyopòǒ jemǒ ɔ̌ gbɛ̀a Jùsu wan ɔ je, “Tè wùɛà nyopòà u boɛ kɛɛ keǒò jleě mǒ, kɔ̀n dɛ mìi boɔ keǒ i jleě mǒ le?”

⁶¹ Kɛɛ Ɔ nua kpee Ɔɔ̌ jlǎ Bɔ boɔla wien. È Nyesoaa bodiɔ gbàla Ɔ wan de ɔ je, “Deě Mò moo kɛ Nyesoaa Tentǎn Jǔ Ɔ̈ moo Nyesoaà ä bìsee le Ɔɔ Jǔ?”

⁶² È Jùsu tùa ɔ kɛ̀ɛn Ɔ je, “Mǒà Mǒ ɛ tù. Aa wùɛ a miǎ Jbɛjuu Jǔà jěba Ɔ miǎ lě kpě kɛne Nyesoaa dilǎ son mɔ̀ bo nene, klě Ɔ miǎě mǒ sɔɔnma Ɔ miǎě di klě nukpě kɛn wòje ke Nyesoaa win dɛ̌ɛ.” (Ps 110.1, Dan 7.13)

⁶³ È Nyesoaa bodiɔǒ ɔ keklǎea ɔɔ chɛ̀ɛ wlawlǒ wan le keǒ jlo sosǒ mɔ̀, è kě ɔ dɛ̌a ɔ je, “Ɔ po Nyesoa kɛn pà! Mɛ kɔɔ̌n tè ä pɛ̀ɛ̌n jè kɛ sàsepo tùu le?

⁶⁴ Aa chɛ̀ a po bo nɔkǔ ǎ wɛ̌nʼě Ɔ wan le Ɔ̌ po Nyesoa pà kɛn! Mɛ a jlɛ̌ bä nuǔ kɛ Ɔ mǒ?” Uu wùɛǒ u poaǒ win tàa do u je, “Ɔ blɛɛ je Bɔ kǒ!”

⁶⁵ È uu tìeǒ neaǒo ù tùngmaea Ɔ tontmɔ wnawna. U pìinʼa Ɔ dalo jǐ mǒ, uu nyu bɔ̌ tba Ɔ kpunɔ ɔ̀ gbà Ɔ wan ɔ̀ je, “Sàě nyuǒ tba Mòo dɛ ɔɔ nynɛ̌!” È tabɔ̀ dǔa Ɔ mǒ ǔ kpala Ɔ plě ǔ bea Lɔ.

Pitɛ̌ Chnɛ̀a Jùsu Mɔ̀

⁶⁶ È tǐǒ jleě Pitɛ̌ nea lěe pànto mǒ, Nyesoaa bodiɔɔ na wien po nyneju tɔ̀ɔ nɔ̀ dia lě.

⁶⁷ Tà ɔ jěaa Pitɛ̌ ɔ keaa na wɛ̌n, ɔ tanaǒ ɔ mɔ̀le, kě ɔ dɛ̌a ɔ je ɔ je, “Mòà moo nyopòà u nyuu do üà klee Jùsu Ɔ̈ kɔn lěe Nǎsòwɛ̌ u nɛaa.”

⁶⁸ Kɛɛ Pitɛ̌ chnɛ̀a ne, kě ɔ dɛ̌a ɔ je, “Tèǒ bòɛɛ Ě se i ji plě ně wɔ̌n i měnee chɛ̀!” È nɔ̀ǒ muaě ngmì gbàa.

⁶⁹ Tà na wien po nynejuǒ ɔ jěa lɔɔ de, è kě ɔ dɛ̌a nyopòǒ neaǒo je ɔ je, “Nyuà tàa ɔ moo Jùsuu mɔ̀ na nyuu doò.”

⁷⁰ Kɛɛ Pitɛ̌ chnɛ̀a i mǒno de. Tà tǐ gbei sìnʼaa, è nyopòǒ nynanaǒo tùɔnʼǒ kɛn bo kě u dɛ̌a Pitɛ̌ je u je, “Wò win mǒ Jàlalǐi nyu, ii tè i moo kàan tè mòo nyopòà u nyuu do.”

⁷¹ È nɔ̀ǒ tùngmaea sadoě popoɛ ɔ̌ pea ɔɔ chɛ̀ win kɛn le ɔ je, “Ě se Jbɛjuǒ Ɔ̈ kɔn tè a boɛɛ jii chɛ̀!”

⁷² Tǐi doo tǐ jleě è kokɔ̌ nɔ̀ǒ slòa, è winʼǒ Jùsu tmɔɔ̌a nɔɔ ì beaě ɔ mǒ wlò ɛ̈ moo, “Plě seaka kokɔ̌ mǐma slò, mì Ně tè mǒ chnɛ̀ma wěe tan ɛ̈ moo sèě ji.” È Pitɛ̌ nɔ̀ǒ tùngmaea fìɛn.