Lǔkù 5 - Nyesoaa Kuo Win Jajle

Jùsu Dala Ɔɔ Nyane Mɔ̀ Cheěn Nyo

¹ Chnɛ̀ jlǒ waě tɛ̀ɛ mɔ̀ Jùsu nynanaǒ jbǒǒ u dɛɛ Kɛnislà wien bo, è diblɛ̌ wɛ̀a de ǔ tuntuwǐia u mǐa Nyesoaa win wɔ̌n.

² Ɔ jěa blǎgbèa chěnchaǐi sɔ̌n ï neaǒo jbǒǒ wien, smì pǎ nyoǒ kɔna ii u sɔnaě i wan mǒ ǔ mua uu tata jlaba.

³ Ii tè Ɔ̌ bea lě blǎgbèaǒ ii dɛɛ do wan ɛ̈ mooaa Saemɔ̌ nenɛ Ɔ̌ tmɔɔ̌a Saemɔ̌ bɔ tǔnʼa blǎgbèǒ klě jbǒ kɛn doɛɛ gbe, è Nɔ̀ǒ nea bo klě blǎgbèǒ wlòmo Ɔ teea nyopòǒ.

⁴ Tà Ɔ wɔ̀la uu teea mɔ̀, Ɔ̀ tmɔɔ̌a Pitɛ̌ Ɔ je, “Mò klee bìì smì pǎ nyo a muě něà ɛɛ wulǒ mǒ a mǐ aa tata ně mǒ po keǒ smìi tìe mɔ̀.”

⁵ Saemɔ̌ tùa Lɔ kɛ̀ɛn ɔ je, “Chì Kpa Ämo, tǒn jlǒ waě gblèeà mɔ̀ ä po tata ä se dɛɛ̌dɛ̀ɛ sà, kɛɛ ke ɛ toon jleě mǒ bo È boɔ lii ä mi tataà ně mǒ poba.”

⁶ Tà u nuaa dɛǒ Ɔ boɔla uu je, u sàla smì fòfoa, uu tataa dbǐ tùngmaea bebɛ̌.

⁷ Ii tè u blɛɛa u bǐì tùuǒ nea lěe blǎgbè tɛ̀ɛǒ wlòmo kwete mɔ̀le bu dia lě u mǐa u mǒ sɛ̀. Tà u dia lěe, u jieěaě uu blǎgbèaa sɔ̌n wùɛǒ smì je kpankpa, ii tè i jlɛ̌ bi pala.

⁸ Tà Saemɔ̌ Pitɛ̌ jěaa dɛǒ, è nɔ̀ǒ kɔla kwne bo keǒ Jùsu jemǒ, kě ɔ dɛ̌a ɔ je, “Koɔn, blɛ̀ɛ je Bò poǒ kpa debo. Mɛ̌oǒ joo nɛ̀ moo Ě moo dɛ kukǔ nuɔ.”

⁹ È tè kɔn tè ɔ dɛ̌a bòo nɛ̀ moo nyopò wùɛǒ klee ɔɔ sɔ̌n neaǒo tàǒ i kaenʼa u le wlò keǒ smì fòfoa taeǒ u sàlaa mɔ̀.

¹⁰ Saemɔ̌ɔ bǐì tùuà mǎna ɔɔ debo ü mooaa Sɛbɛ̀dii jlǔ Jìmǐse klee Jɔ̀ɔ̌n i kaenʼa u le wlò ke. È kě Jùsu dɛ̌a ɔ je Ɔ je, “Bɔ̌ fano pepeɛ, sɔɔnʼě kɛ̀à tǐà jleě mǒ mìɔɔ̌ tùonyopo mɔ̀ jaba wòje dɛɛ doǒ nìi è sɛ̀ɛ smì.”

¹¹ Ii tè ǔ jaěa uu blǎgbèaǒ kponkpǒ, è noǎ wùɛ nìǒ u siaǒ bo ǔ nana Ɔ de.

Jùsu Peana Bale Kwɛ̌ Nyu

¹² Chnɛ̀ jlǒ waě tɛ̀ɛ mɔ̀ Jùsu nea lě diěǒ kɔn wlòmo bale kwɛ̌ nyu nea lěe. Tà jbɛjuǒ ɔ jěaa Jùsu, ɔ chlìaǒ Ɔ jemǒ bo ɔ̌ bɛ̀tea Ɔ le ɔ je, “Koɔn, bɛ̌ nu Bò wɔɔn ɛ kɛn, nu mǒ boǒ wɛ̀ sìnɛ.”

¹³ È Jùsu pnɛ̌a Ɔɔ son mǒ Ɔ̌ gbèa jbɛjuǒ mɔ̀ Ɔ je, “Ě wɔɔn ɛ kɛn, wɛ̀ sìnɛ.” Tǐi doo tǐ jleě è bale nìǒ tɛa jbɛjuǒ bo.

¹⁴ È Jùsu tmɔɔ̌a nɔ Ɔ je, “Nè tmɛɛ̌ nyu wùɛ keǒ dɛà kpaa tùɔn keǒò jleě mǒ ɛɛ tè, kɛɛ mu dìe Nyesoaa kpatòapoi je te ɔ mǐì fǒ měne tan, è bò pi chɔ̀no keǒ Nyesoa mɔ̀ wòje keǒ teteǎà Nyesoa nyeaa Mɔ̀sě i dǎa ɛ mǐ ɛ nyopò wùɛ tee le ɛ̈ moo wɛ̀ sìnɛ.”

¹⁵ Ii tè jbɛjuǒ ɔ̌ piea chɔ̀noǒ, kɛɛ ɔ sea kpee po ɔ̌ gbɛ̀tɛɛa Jùsuu nynɛ̌ le. Dɛǒ nɛ̀ nua nɛ nyopò fòfoa dia lě u mǐa Jùsuu Nyesoa win wɔ̌n ï Ɔ boɛaa klee uu kweǎ mǐa dɛ bɔ̌.

¹⁶ Jùsu Bɔ̌ neaǒ bo ne Ɔ̀ muaě tàa dě poěe kpee Ɔ̌ boɛaě Nyesoa mɔ̀.

Jùsu Peana Bo Klɔ̀ɔ Jbɛju Tɔ̀ɔ

¹⁷ Chnɛ̀ jlǒ waě tɛ̀ɛ mɔ̀ Jùsu kea tee le, è Nyesoaa kpě neaě Ɔ ja, ii tè Ɔ̌ peana nyopò ü kweǎ niaa. Fɛlesǐi wǎn klee teteǎ tee nyo ü sɔnaa Jlǔsnɛ mǒ klee deě wùɛǒ nea lěe Jàlalǐi wakǎ klee Jùdǐa wakǎ kɛn u nea kɛn tùɔn.

¹⁸ Jbɛjluu tìe tùu nù jalaě uu bě ɔ̈ bo klɔ̀ɔ kwɛ̌ niaa. U jlɛ̌ bu paea ɔ koǔ bo u mǐaǒ ɔ Jùsu jemǒ bo pean.

¹⁹ Kɛɛ nyopòo fòfo tè uǔ jěa fɔ̌ u mǐa pa, ii tè u jǎlaě koǔ dlǒ ǔ sàlaǒ kǎgbèe wakǎ peǎn ǔ nua dbetětei ǔ tìeeaǒ ɔ keǒ ɔɔ kɛn bo pɛn chèen kɛn keǒ Jùsu jemǒ klě diblɛ̌ǒ slè.

²⁰ Tà Jùsu jěa uu tè wlò popoɛ taeǒ, kě Ɔ dɛ̌a Ɔ je, “Ně nenawai, Ě poo nè kpni kukwǐi tè le wlò.”

²¹ È teteǎ tee nyo klee Fɛlesǐi wǎn nùǒ tùngmaea dlǒ le sìɛnsiɛn u je, “À Nyu taeà kɛ Ɔ̈ peě Nyesoa fla wan? Nyu tae wɔ̀le je bɔ̈ poo loǒ kɛ tùonyuu kpni kukwǐi tè wlò le? Ɛ̀ sìnʼǒ Nyesoaa do!”

²² Jùsu jia dɛ u sìɛnʼaa dlǒ mɔ̀le le, ii tè kě Ɔ dɛ̌a u je Ɔ je, “Mɛ kɔɔ̌n tè a sìɛn neě kɛ dɛ taeǒ dlǒ mɔ̀le?

²³ Ii sɔ̌nʼà Bo jě dɛ tae se kɛ mǒo kma nyu bɔ boɔɔ bɛ̈ kpaa tùɔn? Deě Bo nu kɛ Ě poo nè kpni kukwǐi tè le wlòe? Deě Bo nu sɔn mǒ mi na?

²⁴ Ě jlɛ̌ ba ji ɛ ɛ̈ moo Jbɛjuu Jǔà Ɔ kɔn kpě keǒ Bɔ poo kpni kukwǐi tè wlò le kělɔ kmɔ̌ɔ mɔ̀.” Tèǒ nì kɔn tè kě Ɔ dɛ̌a bo klɔ̀ɔ jbɛjuǒ je Ɔ je, “Ě tmɛ̌ neè ne, sɔn mǒ, dǔ nè chèenʼǒ mǒ, muě koǔ bo!”

²⁵ Tǐi doo tǐ jleě è klùba, è nɔ̀ǒ sɔna mǒ keǒ nyopòǒ jemǒ ɔ̌ dǔa ɔɔ chèen mǒ ɔ̌ mia lě koǔ bo ɔ̌ pea Nyesoaa nynɛ̌ le.

²⁶ I kàea nyopò wùɛ le wan ǔ pea Nyesoaa nynɛ̌ le, fano jǐa u je, kě u dɛ̌a u je, “Ä jě wlòlekaen noǎ fòfoa kekɛɛà!”

Jùsu Dala Lifàe

²⁷ Tà dɛǒ ɛ sìnʼaa, Jùsu kea le nɛ Ɔ̌ jěa dlǒ wlě tɛ̌n nyu ɔ̈ mooaa Lifàe ɔ̌ neaě wlě tɛ̌n koǔ bo, è kě Ɔ dɛ̌a ɔ je Ɔ je, “Naǎ de.”

²⁸ È nɔ̀ǒ sɔna mǒ ɔ̌ siaǒ noǎ wùɛǒ ɔ̌ nana Ɔ de.

²⁹ Tà tǐ gbei sìnʼaa, Lifàe piea Jùsu klě ɔɔ chɛ̀ɛ tà. È dlǒ wlě tɛ̌n nyo fòfoa klee kpni kukwǐ nu nyo fòfoa tùu nù klee uu sɔ̌n diiaǒ dɛ tàa do.

³⁰ Fɛlesǐi wǎnʼa tìe klee teteǎ tee nyoo tìe ü mooaa Fɛlesǐi wǎn ke nù boboɛɛa wan le ü gbɛ̀a Jùsuu mɔ̀ cheěn nyo wan u je, “Mɛ kɔɔ̌n tè a klee dlǒ wlě tɛ̌n nyo klee kpni kukwǐ nyo tùu a dii liǐ kɛǒ dɛ tàa do?”

³¹ È Jùsu tùa u kɛ̀ɛn Ɔ je, “Nyopòà üǔ kmaa u se dɛjǐɔ sòa, kɛɛ nyopòà kmɛɛ nù sòɛ dɛjǐɔ.

³² Ě seɔ kmɔ̌ɔ mɔ̀ di keǒ Bo da jebo siǐn nyo u mǐ uu wlè bo bitǐ, kɛɛ Ě diě keǒ Bo da kpni kukwǐ nyo u mǐ uu wlè bo bitǐ.”

Chìnchiɛnʼɛ Chlachlǎ Bo

³³ È kě Fɛlesǐi wǎnʼǒ u dɛ̌a Jùsu je u je, “Ně Dlǒ Po Jɔ̀ɔ̌nʼɔ mɔ̀ cheěn nyo klee Fɛlesǐi wǎnʼa mɔ̀ cheěn nyo u chìn ni ǔ boɛě Nyesoa mɔ̀, kɛɛ Nè mɔ̀ cheěn nyo di digbaǐ ǔ nɛ̌ nenǎ noǎa tǐ wùɛ mɔ̀.”

³⁴ È Ɔ tùa u kɛ̀ɛn Ɔ je, “A wɔ̀ kɛě je ba nu tǐnma nynɔɔ jbe klee ɔɔ mɔ̀niapo bu chìn ni le, tà u klee ɔɔ sɔ̌n neě jè lě uu de ngmnengmnɛ̌ wlòmo? A ji ɛle ɛ̈ moo ɛ slě ɛ wɔ̀.

³⁵ Kɛɛ ɛ kɔn tǐ miǎ lěe diba tǐnma nynɔɔ jbeǒ ɔ miǎě uu slè sàe le plě u miǎa kɛ wɔle le nu u miǎ chìn.”

³⁶ È Ɔ poa u dǎtèkpa tɛ̀ɛ je ɛ̈ moo, “Ɛ se nyu kɔn ɔ̈ bɛ̌ɛ dalo jajloo peǎn je ɔ̈ pɛɛ̌ ɛɛ dalo dakǎ. Bɔ̌ nu ɛ, ɔ mi dalo jajloǒ jǐ le nymiima, è sɔ̌noka, dalo jajloǒ ɛ klee dalo dakǎǒ i se wòwɔɔba mu.

³⁷ Dɛɛ doǒ nɛ̀ ɛ mono, nyu wùɛ nɔ̀ slě wɔ̀ bɔ̈ dǔ nmɔ jajlo mǒ ɛ̈à plǐi bɔ̈ poě ɛ tapɛ̌ gbà wan. Bɛ̌ nu bɔ̌ nu ɛ bo nmɔǒ bɛ̌ ke plǐ bɛ̌ jaě ɛ blěe funfǔ, ɛ mi tapɛ̌ǒ waba, è nmɔǒ ɛ mi bo wlɛba, è tapɛ̌ǒ ɛ mi ja gbɛ̀ba ke.

³⁸ Ɛ se bò numa mu, nyu slě wɔ̀ bɔ ke blětà noǎ le ni plě bɔ nu Nyesoaa teea jajloà ɛɛ noǎ.

³⁹ È doo de, ɛ kma mǒ no keǒ nyu bɔ tɛ blětà noǎ bo bɔ be Nyesoaa teea jajloà kɛn. Mɛ̌oǒ joo nɛ̀ moo ɔ je blětà noǎǒ nì nu tɛɛ.”