Lǔkù 23 - Nyesoaa Kuo Win Jajle

U Kpalaǒ Jùsu Pàlěte Jemǒ

¹ È uu wùɛ u dǔa jemǒ ǔ kpala Jùsu klě Wlǔmɔ nyoo kòngmna nyefòɛ mɔ̀ u dɛɛa Pàlɛ̌te.

² È u tùngmaea Ɔ tè dlǒ le popoɛ, kě u dɛ̌a u je, “Nyuà Ɔ jlɛ̌ Bɔ sàǒ äa nyopòo dlě snǔ mɔ̀ bu wɔ̀n Wlǔmɔ nyoo kòngmna je, Ɔ tmɛɛ̌ u bu bɔ̌ dlǒ wlě sèsa klě klɔ̀ba mɔ̀, plě Ɔ̌ je Ɔ̌ moo Nyesoaa Tentǎn Jǔ Ɔ̌ moo Klɔ̀ba.”

³ Ii tè Pàlɛ̌te gbàla Jùsu wan ɔ je, “Deě Mò moo kɛ Jùwɛ nyoo Klɔ̀ba?” È Jùsu tùa lɔ kɛ̀ɛn Ɔ je, “Ii teěn nìǒ bòɔ.”

⁴ È kě Pàlɛ̌te dɛ̌a Nyesoaa kpatòapoo fòe klee diblɛ̌ǒ je ɔ je, “Ě se dɛ jě ɛ̈ moo kenkan dɛ Jbɛjuà Ɔ nuu.”

⁵ Kɛɛ u neaǒ ɛ demǒ doo u je, “Ɔɔ teea jɛě jale jejǎea kělɔ äa Jùdǐa wakǎɔ kɛn. Klě Jàlalǐi Ɔ tùaě ɛ wlò, è nɛ̀à Ɔ ja lɔ tàɔ.”

⁶ Tà Pàlɛ̌te wɔ̌naa dɛǒ, ɔ̀ gbàla u wan ɔ je, “Jbɛjuà Ɔ moo kɛ Jàlalǐipoi le?”

⁷ Tà ɔ jboa lɛɛ le ɛ̈ moo Jùsu sɔnaě mǒ wakǎǒ kɛn ɛ̈ kɔn kòngmna nyefòɛ dɛ Hɛwlǒ niaa, ɔ dboa Lɔ klě Hɛwlǒ mɔ̀ ɔ̈ klě tǐǒ wlòmo ɔ muaa dakpǎ mǒ klě Jlǔsnɛ dǐa.

⁸ Tà Hɛwlǒ jěaa Jùsu, ɔɔ plɔ wɔ̌na bloblo tè chɔɔ. Mɛ̌oǒ joo nɛ̀ moo ɔ dǔa Ɔɔ nynɛ̌ wonwɔ̌n mǒ seea, plě ɔ̌ pɛ̀n pnɔ Ɔ jejeɛ̌ le, è ɔ pɛ̀na le Jùsu Bɔ nua wlòlekaen dɛ.

⁹ Tèǒ nì kɔn tè Hɛwlǒ gbàla Ɔ chlachlǎ be fòfoa wan, kɛɛ Ɔɔ̌ boɔla wien.

¹⁰ Keǒ Nyesoaa kpatòapoo fòe klee teteǎ tee nyo nynanaǒ tàǒ bo ǔ pea Jùsu tè jakě dlǒ le.

¹¹ È tà dɛǒ ɛ sìnʼaa, Hɛwlǒ klee ɔɔ tabɔ̀ bɛtɛ̌ɛa Ɔ je ǔ pea Ɔ pà kɛn ǔ poa Ɔ jǐlenmɔ wlawlǒ mǒ wòje klɔ̀ba ǔ dboa Ɔ de klě Pàlɛ̌te mɔ̀.

¹² Plě ɛmo dɛǒ ɛ mǐa tùɔn kpa, Pàlɛ̌te klee Hɛwlǒ mooa jejlae nyo, kɛɛ tà ɛ sìnʼaa ù mooa kɛ̀ nenawa nyo.

U Bɛ̌a Jùsu Kokǒ Wun Kɛn

¹³ È Pàlɛ̌te dala Nyesoaa kpatòapoo fòe klee Jùwɛ nyoo blǒo nae nyo ɔ̌ bòa u le,

¹⁴ è kě ɔ dɛ̌a u je ɔ je, “Amo ja lě Jbɛjuà kělɔɔ̌ mɔ̀, è a je Ɔ nyenynɛ̌ɛ nyopò ɛ̈ di ɛɛ numa u miǒ kòngmnaa win sà, kɛɛ Ě chechlǎ Ɔ kěà aa chɛ̀ jemǒ, ně jě kenkan dɛ Ɔ nuu keǒ noǎ wùɛà a boɛ kɛn.

¹⁵ Hɛwlǒ sea kenkan dɛ jě ke klě Ɔ mǒ. Ii tè ɔ dboa Ɔ de kělɔɔ̌ mɔ̀. È ke aa chɛ̀ a ni ɛɛ jejeɛ̌ Jbɛjuà Ɔ se dɛ nu ɛ̈ kɔn tè Ɔ blɛɛ je Bɔ kǒo.

¹⁶ Tèǒ nì kɔn tè Ě mi Ɔ fǎe kɛn sàba, Ě mi Ɔ bo tɛ Ɔ mǐ mu.”

¹⁷ Dlǒ Mǒ Sìin Didi Dɛɛ tǐ bǐ nyniǒ Pàlɛ̌te kɔn bɔ tɛ nyuu do bo ɔ̈ Jùwɛ nyo jlɛ̌ bɔ sàa wùlo.

¹⁸ È diblɛ̌ǒ u sàla slɛ̀, kě u dɛ̌a u je, “Dbǎ Lɔ! È Balabɔ̀ nɔ̀ bò tɛ bo keǒ ä mɔ̀ bɔ mu!”

¹⁹ Tè poa pnɔɔ Balabɔ̀ wùlo nì moo ɔ bea nyopò tùu slè ǔ jlɛ̌ bu sàlaǒ kòngmna klě Jlǔsnɛ plě ɔ̌ pooa nyopò tùu mnùngma.

²⁰ Pàlɛ̌te jlɛ̌ bɔ tɛa Jùsu bo kaǒ, ii tè ɔ̌ dala nyopòǒ de,

²¹ kɛɛ u pnɛ̌a dɛ jleě le dɛɛ doǒ nɛ̀ u boɛa ɛ̈ moo, “Kɔǒ Ɔ pète bɛ̌ tu jleě! Kɔǒ Ɔ pète bɛ̌ tu jleě!”

²² Klě kpɛɛ tan nenɛ wlòmo Pàlɛ̌te gbàla u wan ɔ je, “Mɛ̌oǒ? Mɛ Ɔ nuǔ kɛ ɛ̈ nymii jǐ le? Mǒà Ě slě Ɔ jǐlenymi dɛ mǒ jě ɛ̈ kɔn tè Ɔ blɛɛ je Bɔ kǒo! Tèǒ nì kɔn tè Ě mi Ɔ fǎe kɛn sàba sosǒ Ě mi Ɔ bo tɛ!”

²³ Kɛɛ u pnɛ̌a dɛ jleě le ǔ jɛɛ̌a lě win u je, “Kɔǒ Ɔ pète bɛ̌ tu jleě! Kɔǒ Ɔ pète bɛ̌ tu jleě!” Tà u peaa slɛ̀ nɛ̀ kɔn tè Pàlɛ̌tee win iǐ beaě u nɔkǔ mǒ.

²⁴ Tà ɛ kpala ɛɛ kpa, è Pàlɛ̌te nua dɛ u jlɛ̌aa.

²⁵ Ɔ̌ tɛa nyuǒ u jlɛ̌aa bo ɔ̈ pooaa wùlo keǒ kòngmnaa sèsa tè mɔ̀ klee mnùngma popoɛ, è ɔ dǔa Jùsu mǒ ɔ̌ poaě Ɔ tabɔ̀ kwete mǒ u mǐa Ɔ dɛ nyopòǒ u jlɛ̌aa mǒ nu.

U Kɔaǒ Jùsu Pète Bɛ̌ Tu Jleě

²⁶ Tà Wlǔmɔ nyoo tabɔ̀ǒ u keaa Jùsu dbǎba kpɛ, u klee jbɛju tɔ̀ɔ ɔ̈ mooa Sawlinì nyu u dɛɛ Saemɔ̌ nù mɔɔa, ɔ sonwɛa mǒ ɔɔ blě ɔ̌ mia Jlǔsnɛ, nɔ̀ u kpaea kbě ɔ̈ blěa Jùsuu pète bɛ̌ tu.

²⁷ Diblɛ̌ fòfoa nù nɛa Jùsu de, è nyno fòfoa nù pea uu chɛ̀ kpě wùlee le ü fìnʼa Ɔɔ tè.

²⁸ È Jùsu bitǐa bo, kě Ɔ dɛ̌a nynoǒ je Ɔ je, “Jlǔsnɛ nyno ane, a bɔ̌ Ně tè fìnfiɛn, bǎ ke fìn è ba fìn aa chɛ̀ klee aa jlǔu tè.

²⁹ Mɛ kɔɔ̌n tèǒ joo nɛ̀ moo chnɛ̀ jlǒ wě miǎě diba nyopò miǎ bo dǎ ɛ̈ moo, ‘Nynoà see kwlě mǒ neneɛ ji klee nynoà see jlǔ blě u kɔn ngmna.’

³⁰ Klě ɛmo tǐǒ wlòmo nyopò miǎ togbei fòe tmɔɔ̌ma keǒ bi wlɛ̀ǎ u kɛn, è u miǎ togbei klɔkwlě tmɔɔ̌ma keǒ bi wɛǎ lu wòje keǒ Nyesoaa win dɛ̌ɛ. (Hos 10.8)

³¹ Tè kɔn tè ba fìn aa chɛ̀ɛ fìɛn nɛ̀ moo Mǒà see tè wlǎ bǔ ke bòǒ ka kukǔà nunuɛ ni, è mɛ a je Nyesoa miǎaǎ kɛ nyopòà moo dɛ kukǔ nu nyo mǒ numa?”

³² È u mǎna Ɔ kpni kukwǐ nyoo sɔ̌n tùu kɛn bo ke ü u miaa dbǎba.

³³ Tà u nyniaǒo tàǒ u dɛɛǒo Dlǒ Kankǒ kɛn, è Nɔ̀ǒ u kɔaǒ pète bɛ̌ tu jleě Ɔ klee kpni kukwǐ nu nyoo sɔ̌nʼǒ, do neea Ɔɔ dilǎ son mɔ̀, è do neea Ɔɔ gbàpe son mɔ̀ ǔ neaǒ uu pète bɛ̌ ti jleě.

³⁴ È kě Jùsu dɛ̌a Ɔ je, “Ně Gbeǐ, dɛǒ nyopòǒ u nii u se ɛ ji, poo uu tè wlò le!” È tabɔ̀ pea nòkpo keǒ Ɔɔ wlawlěe tè mɔ̀.

³⁵ Nyopò nynanaǒ bo ü jěa tà, è Jùwɛ nyoo nyefòapo pea Lɔ pà kɛn, kě u dɛ̌a u je, “Ɔ gblɛ̀ nyopò tùu, bɛ̌ nu sɛje Bɔ̌ moo Nyesoaa Tentǎn Jǔ Ɔ̈ Ɔ sàǒo Ɔ dboo kělɔ ä mɔ̀, nɛ Bɔ gblà Ɔɔ chɛ̀!”

³⁶ È tabɔ̀ɔ chɛ̀ǒ u dia lě ǔ pea Ɔ pà kɛn ǔ nyea Lɔ wan nonǒ noǎa Bɔ nǎna,

³⁷ è kě u dɛ̌a u je, “Bɛ̌ nu Bò moo Jùwɛ nyoo Klɔ̀ba, è Bò gblà dìe!”

³⁸ U chlěa dɛ u bǎlaǒ Ɔɔ dlǒ mǒ bo, è kě è dɛ̌a ɛ je, “NYUÀ NƆ̀ MOO JÙWƐ NYOO KLƆ̀BA.”

³⁹ È kpni kukwǐ nyoǒ ü neaǒo pète bɛ̌ ti jleě ke nù kɔn nyuu do pnǎna ɔ̈ bɛtɛ̌ɛa Jùsu je, kě ɔ dɛ̌a ɔ je, “Dɛ̌ Mò moo kɛ Nyesoaa Tentǎn Jǔò? Gblà dìe Mò ä wa!”

⁴⁰ Kɛɛ kpni kukwǐ nuɔ tɔ̀ɔǒ neaǒo ɔ pnaěa ɔ jǐ mǒ ɔ je, “Nè pe kɛ Nyesoaa fano le, sɛje tà äa wùɛà u bɛ̌ ämoo kokǒ wun kɛn?

⁴¹ Mǒ klee mò kokoɛ̌ blɛɛ ämoo je nɛ̀à ä kwěà. Ä chɛ̀ɛ de nu kmɔ̌ɔ tèǒ, kɛɛ Ɔmoà Ɔ se dɛ kukǔ nu!”

⁴² È kě ɔmoǒ ɔ dɛ̌a Jùsu je ɔ je, “Jùsu, Bò diǎ klɔ̀ba dɛ mɔ̀, ně tè bi beǎ lěè wlò jleě.”

⁴³ È kě Jùsu dɛ̌a ɔ je Ɔ je, “Kàan tèà Ě tmɛɛ̌ mò, kekɛɛà Mǒ klee mò ä miě jɔkɛn nema.”

Jùsuu Kokoɛ̌

⁴⁴ Tà ɛ blɛɛa wɛnʼɛ blǒ mǒ wuleeaa je, è wɛn bɔ̌a fonfɔn no, kmɔ̌ wùɛà ɛ̌ bea kwijlě kɛn, ɛ kpala ɛ kpa ɛ̌ nua àwɛɛ tan nenɛ klě wanpno wlòmo.

⁴⁵ È dalo kpoklǒ fòɛǒ nea lěe Nyesoaa kǎ fòɛ bo nɛ̀ǒ klǎla wan, ɛ nua peěnʼe sɔ̌n ɛ̈ tee ɛɛ ɛ̈ moo nyu wùɛ kɔn fɔ̌ bɔ nyniǒ Nyesoa jemǒ ɛ̈ see Nyesoaa bodiɔpòo do.

⁴⁶ È Jùsu pnaěaě jɔ mǒ wòje ke Nyesoaa win dɛ̌ɛ Ɔ je, “Ně Gbeǐ, klěè kwete mǒ klě Ě poě Ně sùsu!” (Ps 31.5) Tà Ɔ boɔlaa dɛǒ, è Nɔ̀ǒ ngmnana fònfno.

⁴⁷ Tà tabɔ̀ɔ jǐgbàdiɔ jěaa dɛǒ kpalaa tùɔn, ɔ pea Nyesoaa nynɛ̌ le ɔ je, “Kàan tè Nyuà sɛjesɛ Ɔ moo jebo siǐn Nyu!”

⁴⁸ Tà nyopò wùɛǒ neaǒo tùɔnʼǒ kɛn u jěaa noǎ wùɛǒ kpalaa tùɔn, è nùǒ miaě keǐ bo ble le ü pea uu chɛ̀ kpě wùlee le ɛ̈ mǐa ɛ tee le ɛ̈ moo u nia le wɔle.

⁴⁹ Jùsuu nenawa wùɛ, jà nyno ü nana Ɔɔ de ü sɔnaa Jàlalǐi mǒ, u nynanaě nya bo ǔ jěa noǎ wùɛ kpalaa tùɔn.

Jùsuu Bo Tùtuɛ

⁵⁰ Ɛ kɔna jbɛju tɔ̀ɔ ɔ̈ mooa Jòsɛ̌fo ɔ̈ mooa Jùwɛ nyoo tè tù nyoo nyuu do, kɛɛ ɔ mooa kàan plě ɔ̌ mooa jebo siǐn nyu,

⁵¹ nɔ̀ sea uu dɛǒ kòo kɛn po ɛ̈ u nuaa Jùsu mǒ. Ɔ sɔna mǒ Jùwɛ nyoo diěǒ u dɛɛ Alamatià kɛn. Ɔ dǔa Nyesoaa win kwa konkɔn snǔ mɔ̀le pònpɔn mǒ seela.

⁵² Nɔ̀ mua lě Pàlɛ̌te mɔ̀ ɔ̈ sòala Jùsuu blǒ fǒǒ.

⁵³ Nɔ̀ sàlaǒ Ɔɔ kokǒ fǒǒ keǒ pète bɛ̌ tuǒ jleě ɔ̌ finfiɛ̌ɛa ɛ dalo ɔ̌ tùa Lɔ bo klě sɛklɛ bǐtìe wan ɛ̈ ɔ blǔaa klě seɔ̌ wlòmo ɛ̈ ɔ sěɛa lěe nyu wan bo tùi.

⁵⁴ Ɛ mooa Flǎàdee wìtika mɔ̀, è tǐ konwaěa le keǒ bu tùa Sɛ̌ɛ̀de waě wlò ɛ̈ moo Nyesoaa de fɛ waě.

⁵⁵ È nynoǒ nanaa Jùsu de ü sɔna lěe Jàlalǐi wakǎ kɛn mǒ u beaǒ Jòsɛ̌fo demǒ ǔ jěa sɛklɛ bǐtìeǒ plě ǔ jěa ke u nuaa Jùsu bo tùtuɛ.

⁵⁶ È nynoǒ u mua ǔ dbǎla chè klee ǔ wɔ̀a sonsnǒ chnɔ̌ mɔ̀le keǒ Ɔɔ kokǒ fǒ mɔ̀. Sɛ̌ɛ̀de waěǒ mɔ̀ u fɛa le wòje ke Nyesoaa tetě nua nuu tmɔɔ̌a.