Lǔkù 19 - Nyesoaa Kuo Win Jajle

Jùsu Klee Sɛ̀kiǎ

¹ Tà Jùsu pala Jɛ̀lekǒo dǐa, Ɔ bɛɛ̌aě ɛ wlòmo tìe.

² Ɛ kɔna pònpan jbɛju tɔ̀ɔ ɔ̈ nea lěe diěǒ wlòmo u dɛɛa Sɛ̀kiǎ ɔ̈ mooa dlǒ wlě tɛ̌n nyoo nyefòɛ.

³ Tà Jùsu kea lěe diěǒ wlòmo tìe bɛɛ̌ le, ɔ pɛ̀nʼa fɔ̌ le ɔ mǐa Jùsu jě Nyu tae Ɔ mooa, kɛɛ ɔ konwǎna ja, ii tè ɔ slě wɔ̀ bɔ jaea diblɛ̌ǒ jleě dlǒ měne bɔ jěa Lɔ.

⁴ Ii tè ɔ kpala plùplɛ klě diblɛ̌ǒ nya ɔ̌ jǎlaě Sekmɔ̀ tu ja ɛ̈ di ɛɛ numa Jùsu Bɔ̌ keaǒ tàǒ sìin ni ɔ mǐa Ɔ jě.

⁵ È tà Jùsu wǒaǒo tùɔnʼǒ kɛn, Ɔ tanaě jɔ měne, è kě Ɔ dɛ̌a Sɛ̀kiǎ je Ɔ je, “Sɛ̀kiǎ, nu jǐ měne di tè. Kekɛɛà klě nè tà klě Ě miě paeba.”

⁶ È tǐi doo tǐ jleě è nɔ̀ǒ nua jǐ měne ɔ̈ tèa ɔ̌ kmea Jùsu jebo klě plɔ bloo tǔn mǒ ɔ̌ kpalaě Ɔ koǔ bo.

⁷ Tà nyopò wùɛ u jěaa dɛǒ, è nùǒ boboɛɛa wan le u je, “Kpni kukwǐ nyuà nɔ̀ kɔn tà Ɔ paeě.”

⁸ È Sɛ̀kiǎ nynana bo kě ɔ dɛ̌a Koɔn je ɔ je, “Koɔn, tanàle, Ě mi ně konkɔn noǎ wùɛ ii bɔ̀tie sònwɛ nyo nyema plě bo jlǐaǒ nyu kɛn, Ě mi ɔ noǎa hɛ̀n kplěe sɔ̌n nyema.”

⁹ È kě Jùsu dɛ̌a ɔ je Ɔ je, “Kekɛɛà wowa dɛ pa lɔɔ mɔ̀ koǔ bo. Jbɛjuà tàa ɔ kɔn lě Eblɛ̌hɛ̀moo jlǔu jlǔ slè ke.

¹⁰ Mǒ Jbɛjuu Jǔà Ě diě keǒ Bo mǐ nyopòà kpni kukwǐ kɔnʼɔ win kwa gblà.”

Wlě Blɛ̌ɛ Pùu Dǎtèkpa

¹¹ Tà nyopòǒ u keaa Jùsu nɔkǔ jebo pe, Ɔ̀ poa u dǎtèkpa je. Mɛ kɔɔ̌n tèǒ joo nɛ̀ moo Ɔ konwaěa kɛ̀ Jlǔsnɛ diě le, è nyopò jěa lɛ ɛ̈ moo Bɔ̌ paǎla bò Jlǔsnɛ dǐa, è Nyesoaa win kwa konkɔn nɛ̀ǒ tùa wlò le.

¹² Ii tè kě Ɔ dɛ̌a Ɔ je, “Ɛ kɔna selǐju tɔ̀ɔ ɔ̈ wɛ̀aa mɔ̀ bɔ muaa tmɔtmɔ dakpǎ mǒ u mǐa ɔ klɔ̀ba dɛ mǒ po plě ɔ mǐa de di.

¹³ Plě ɔ mǐa dakpǎǒ mǒ mu, ɔ dala ɔɔ nyebajlee pù ɔ̌ nyea uu wùɛǒ wlě blɛ̌ɛ do do, è kě ɔ dɛ̌a u je ɔ je, ‘A poo wlěà kɔseɛ̌ ɛ mǐ ɛ kpa kpa Ě mǐ de di.’

¹⁴ È nɔ̀ǒ mua. Kɛɛ ɔɔ chɛ̀ɛ blětà nyo faenʼa nɔ ǔ naea ɔ nyopò de, kě u dɛ̌a u je, ‘Ä se jbɛjuà jlǎ keǒ bɔ moo äa klɔ̀ba.’

¹⁵ Kaǒ ɛmo dɛǒ ɛ sea ɛ je kan ǔ nua ɔ klɔ̀ba mǒ. È tà ɔ diaa de, è kě ɔ dɛ̌a ɔ je, ‘A da ně nyebajleà üà Ě nyea něe wlěe tìe. Kɔseɛ̌à u poo dɛ ɛ poě uu bo Ě mǐ ɛ ji.’

¹⁶ È nyane nyebajloǒ ɔ dia lě ɔ je, ‘Chì kpa ämo, nè wlě blɔ̌à nyèa mǒo ɛ poǒ wlě blɛ̌ɛ pù de.’

¹⁷ Ɔɔ chì kpa ämo tùa lɔ kɛ̀ɛn ɔ je, ‘Pòě le kpě chɔɔ, mòo kàan nyebajlo. Ke ɛ toon jleě mǒ bo è mǎ lěe sèn bo keǒ dɛ chěnchaě mɔ̀, Ě miì deěe pù nyema mì i win kwa kɔn.’

¹⁸ È sɔ̌n nonɔ nyebajlo diaě le ɔ je, ‘Chì kpa ämo, nè wlě blɔ̌à nyèa mǒo ɛ poǒ wlě blɛ̌ɛ m̀m de.’

¹⁹ Ɔ tùa lɔ kɛ̀ɛn ɔ je, ‘Ě miì deěe m̀m nyema mì i win kwa kɔn.’

²⁰ È ɔɔ nyebajlo tɔ̀ɔ diaě le, kě ɔ dɛ̌a ɔ je, ‘Kàan selǐju, jè nè wlě blɔ̌ nɛ̀à. Ě dbaěaě ɛ sɛ̌plɛ̀ɛ wlòmo je.

²¹ Ě pea nè fano. Mɛ̌oǒ joo nɛ̀ moo nè dɛ kma wan chɔɔ. Tàà nè poǒ dɛ bo keǒ sɛ̀ǒ ɛ, tàà nè dɔ̌ǒo dɛ keǒ chɛ̌nʼǒ ɛ.’

²² Ɔɔ chì kpa ämo tùa lɔ kɛ̀ɛn ɔ je, ‘Mò kpnii jǐlenymi nyebajloà! Nè chɛ̀ɛ boɔboɔ win nì Ě mi kɛn bo nynama Ě mǐ nè tè tù. Jì ɛle ɛ̈ moo ně dɛ kma wan, tàà ně poǒ dɛ bo keǒ Ě sɛ̀ǒ ɛ, è tàà ně dɔ̌ǒo dɛ keǒ Ě chɛ̌nʼǒ ɛ.

²³ È mɛ kɔɔ̌n tè see kɛɛ ně wlěà klě wlěe bo tùla mǒ kpa see li bo tù? È boǒ dii de, i kɔn bi bee dɛ dlǒ mǒ keǒǒ mɔ̀.’

²⁴ È kě ɔ dɛ̌a nyopòǒ nynanaǒo bo je ɔ je, ‘A sà ɔɔ wlě blɔ̌ǒ kwa, a nye ɛ nyuǒ kɔnʼɔ wlě blɛ̌ɛ pù!’

²⁵ U tùa lɔ kɛ̀ɛn u je, ‘Nyefòɛ, kɛɛ ɔ kɔn wlě blɛ̌ɛ pù ɛ̌ wɛ̀ mɔ̀le.’

²⁶ Ɔ tùa u kɛ̀ɛn ɔ je, ‘Ě tmɛɛ̌ ane, nyuà kɔnʼɔ fòfoa nɔ̀ fòfoa mi nyeema, kɛɛ nyuà see dɛ kɔn, dɛ chěnchaě gbee chɛ̀ǒ ɔ kɔnʼɔ ɛ mi ɔ kwa sàeba.

²⁷ È keǒ nyopòà moo něe jlae nyo mɔ̀ ü see jlǎ boǒ monoo klɔ̀ba, a jaě u kěàǎ jemǒ a mǐ u dbǎ.’ ”

Jùsu Pala Jlǔsnɛ Dǐa

²⁸ Tà Jùsu boɔlaa dɛǒ ɛ sìnʼaa, è nùǒ klee Ɔ mia Jlǔsnɛ.

²⁹ Tà u keaa deěǒ monoo Bɛfèji klee Bɛtnè le konwɛɛ̌ ne keǒ togbeeǒ moo Ɔlè dlǒ, Ɔ̀ dboa Ɔɔ mɔ̀ cheěn nyoo sɔ̌n nya.

³⁰ È winʼà nì Ɔ poa u wan Ɔ je, “A muě klě diěǒ neě amoo nya kɛn, bǎ paǎ bò dǐa, a mi jakǎsè bòto jěba ɔ̈ moaa bo, nyu wùɛ sěɛlǎ ɔ kɛn nɛɛ ne. A jle ɔ bo, a ja ɔ Mǒ.

³¹ Bɛ̌ nu nyu wùɛ bɔ̌ gbà a wan ɛ̈ moo, ‘Mɛ kɔɔ̌n tè a jleě kɛ ɔ bo,’ a tmɔɔ̌ ɔ ɛ̈ moo, ‘Koɔn jlɛ̌ ɔlo.’ ”

³² È nùǒ mua. È ke Ɔ nuaa noǎ wùɛǒ tu měne popoɛ teěn teěn nɛ̀ ɛ mooa.

³³ Tà u keaa jakǎsè bòtoǒ bo jle, è nyopòǒ kɔna nɔɔ ù gbàla u wan u je, “Mɛ kɔɔ̌n tè a jleě kɛ jakǎsè bòtoǒ bo?”

³⁴ U sèsaea u wlòmo u je, “Koɔn sòɛ ɔlo.” È ɔɔ konkɔn nyoǒ ù wɔna ne.

³⁵ Ii tè ǔ jalaě ɔ Jùsu mɔ̀ ǔ jloa uu wlawlě pɛ̀ti keǒ ɔ kɛn ǔ tùaǒ Jùsu bo.

³⁶ È tà Jùsu kea ɔɔ kɛn nɛɛ ne, nyopò fòfoa jlea uu wlawlě snǔ mɔ̀ ble.

³⁷ È tà Jùsu nyniaǒo Ɔlè togbee tàa u bleeǒ ɛɛ, è diblɛ̌ǒ ü nɛa Lɔɔ de uu plɛ bloa chɔɔ ǔ tùngmaea plɔ blo slɛ̀ le popoɛ ǔ pea Nyesoaa nynɛ̌ le keǒ wlòlekaen noǎǒ u jěaa Jùsu nuaa mɔ̀.

³⁸ Kě u dɛ̌a wòje keǒ Nyesoaa win dɛ̌ɛ u je, “Baea keǒ Klɔ̀ba mɔ̀ Ɔ̈ diiěe Koɔnʼɔ nynɛ̌ wlòmo! Nɛ bo ně bo wnawna bɛ neě jɔkɛn, è nyopò bu nye Ja Tmɔ Nyesoa tè jǐ boaboǎ!” (Ps 118.26)

³⁹ Kɛɛ Fɛlesǐi wǎnʼa tìeǒ nea lěe diblɛ̌ǒ slè kě u dɛ̌a Jùsu je u je, “Tee Nyu, tmɔɔ̌ Nè mɔ̀ na nyoǒ bu po kpee!”

⁴⁰ Ɔ̀ tùa u kɛ̀ɛn Ɔ je, “Bo tmɔɔ̌ amo, bɛ̌ nu bǔ po kpee, seɛ̌à i mi plɔ bloo slɛ̀ le popoɛ tùngmaema.”

⁴¹ Tà Jùsu konwaěaa Jlǔsnɛ diě le Ɔ jěa lɛɛ, è Nɔ̀ǒ fìnʼa ɛɛ tè,

⁴² è kě Ɔ dɛ̌a Ɔ je, “Kekɛɛà amo Jlǔsnɛ nyo bɛ̌ nu bǎ jii wakǎ ba bee kɛn a mǐi ně bo wnawna kɔn keǒ a klee Nyesoa slè, ɛ mii tɛɛ numa keǒ a mɔ̀, kɛɛ ɛ wɛɛ̌ lee kɛ̀ a kɛn jǐ.

⁴³ Ɛ kɔn tǐ miǎ lěe diba aa jlae nyo miǎ amoo dǐ tbɛɛ le kpǎkpǎ. U miǎ noǎ wùɛ je le kanma u miǎ a ja jǎ.

⁴⁴ U miǎ a klee aa diě jǐ le nymiima kpǎkpǎ. U miǎ aa seɛ̌ keǐǒ blǒ měne wlǎba, seɔ̌ɔ doo chɛ̀ seǎǒ ɛɛ bě dlǒ siba mu. Mɛ kɔɔ̌n tèǒ joo nɛ̀ moo a se tǐà jbo ï Nyesoa ja lěe Ɔ̌ di amoo waba.”

Jùsu Piěa Lě Nyopò Nyesoaa Kǎ Fòɛ Bo

⁴⁵ È Jùsu muaě Nyesoaa kǎ fòɛ bo Ɔ̌ tùngmaea nyopòǒ nea lěe ü pleaa noǎ ploměne popoɛ.

⁴⁶ È kě Ɔ dɛ̌a u je Ɔ je, “Ɛ chleě le klě Nyesoaa win wlòmo ɛ̈ moo, ‘Ně koǔ ɛ moo koǔà nyopò bu muěe bobo u miě Mǒo mɔ̀ boɔ,’ (Is 56.7) kɛɛ nɛ̀ a ni jlǐ nyoo bobo ne koǔ mǒ!”

⁴⁷ Tà dɛǒ ɛ sìnʼaa, chnɛ̀ jlǒ waě wùɛ mɔ̀ Ɔ teea nyopò klě Nyesoaa kǎ fòɛ bo. Nyesoaa kpatòapoo fòe klee teteǎ tee nyo klee blǒo nae nyo pɛ̀na le wakǎ u mǐa Ɔ dbǎ,

⁴⁸ kɛɛ tà nyopò wùɛ u noɛɛa mǒ bu poa Ɔɔ win nɔkǔ jebo, ii tè uǔ jěa wakǎ.