Jɔ̀ɔ̌n 17 - Nyesoaa Kuo Win Jajle

Jùsu Bɛ̀tea Nyesoa Keǒ Ɔɔ Chɛ̀ Mɔ̀ Klee Ɔɔ Mɔ̀ Cheěn Nyo

¹ Tà Jùsu wɔ̀laa tè wùɛǒ boɔboɔ mɔ̀, Ɔ tanaě jɔkɛn le kě Ɔ dɛ̌a Ɔ je, “Ně Gbeǐ, tǐ nyniǒ no, nye Nè Jǔà tè jǐ boaboǎ ɛ̈ di ɛɛ numa Ɔ mǐì tè jǐ boaboǎ nye.

² Keǒ nùu È nye Ɔ kpě keǒ tùonyopo wùɛ dlǒ mǒ, kě Bɔ nu Bɔ nye nyopò wùɛ kmɔ̌ sie fònfno ü nyè Ɔɔ.

³ Kmɔ̌ sie fònfnoo konkɔn nɛ̀ moo nyu bɔ ji Mò kàan Nyesoa Nè do plě klee Jùsu Tentǎn Jǔà dbòo.

⁴ Ě wɔ̀ konkwaà nyè Mǒo mɔ̀ no, klě ɛɛ nunuɛ mǒ Ě nyeè tè jǐ boaboǎ kělɔ kmɔ̌ mɔ̀.

⁵ Ně Gbeǐ, klě tǐà wlòmo nyeě tè jǐ boaboǎ keǒ Nè chɛ̀ jemǒ, tè jǐ boaboǎà Ě kɔnaa plě kmɔ̌à ɛ mǒaa wlò tùu lu.

⁶ Ě poò mǒ pepě klě nyopòà sà lěe kmɔ̌ wlòmo nyè Mǒo mɔ̀. Mò kɔna nu, È nye u Mǒ, è u tùǒ Nè win bo.

⁷ È klě tǐà wlòmo u ji ɛle ɛ̈ moo noǎ wùɛǒ nyè Mǒo klě i sɔn lěè mɔ̀ mǒ.

⁸ Mɛ̌oǒ joo nɛ̀ moo win pò Mǒo wan nì Ě tee u plě ǔ blě i kwa, tèǒ nì kɔn tè u ji ɛ sɛjesɛ ɛ̈ moo klě Ě sɔn lěè mɔ̀ mǒ plě ǔ po i kàan tè ɛ̈ moo Mò dbo Mǒ.

⁹ Ě bɛ̀tee le keǒ uu tè mɔ̀. Ně bàteǒ kpni kukwǐ nyoo tà, kɛɛ nyopòà nyè Mǒo uu do nù kɔn tè Ě bɛ̀te Mò. Mɛ̌oǒ joo nɛ̀ moo Mò kɔn nu,

¹⁰ è noǎ wùɛ Ě kɔnʼɔ Mò kɔn ni plě noǎ wùɛà kɔ̀nʼɔ Mǒ kɔn ni plě ǔ nyeě tè jǐ boaboǎ.

¹¹ Klě Ě diěè mɔ̀, ii tè Ě see kɛ̀ɔ kmɔ̌ɔ wlòmo nema mu, kɛɛ umoà nù Ě siɔ kmɔ̌ɔ mɔ̀. Tèǒ nì kɔn tè Ngmà Je Ne Gbeǐ, tù nyopòà jǐ mɔ̀ klě Nè nynɛ̌ wlòmo ɛ̈ di ɛɛ numa u mǐ dɛɛ do nu wòje keà Ä nuu Ä nuu dɛɛ do.

¹² Tà u klee Mǒ ä neě jè lɔɔ kmɔ̌ɔ mɔ̀, Ě tùi u mɔ̀ jǐ klě Nè nynɛ̌ wlòmo Ě nɛɛ u, ii tè uu nyuu doo chɛ̀ se mǎ, ɛ̀ sìnʼǒ nyuu doà ɔ̈ poo loo na slè mumuɛ jeja ɔ̈ mǎa ɛ̈ di ɛɛ numa Nè winʼà ï dǎla bòo i miǒ jaě le.

¹³ Klě tǐà wlòmo Ě diě le klěè mɔ̀. Tà Ě neě jèɔ uu mɔ̀ kělɔ kmɔ̌ɔ wlòmo, nɛ̀ kɔn tèà Ě boɛ noǎà ɛ̈ di ɛɛ numa bǔ wɔ̌n ni chǒn mǐ u nu wòje keà Ě nuu.

¹⁴ Ě nye u Nè winʼà ne, è kmɔ̌ faen u nu. Mɛ̌oǒ joo nɛ̀ moo u slě kmɔ̌ɔ noǎ slè kɔn wòje keà Ě nuu Ě slěe kmɔ̌ɔ noǎ slè kɔn.

¹⁵ Ně gbàà wan keǒ Bò sà lɔ u kmɔ̌ɔ mɔ̀, kɛɛ Ě jlɛ̌ Bò nae u mìě u noǎ kukwǐ slè sà.

¹⁶ Mɛ̌oǒ joo nɛ̀ moo u seɔ kmɔ̌ɔ mɔ̀ kɔn wòje keà Ě nuu Ě seɔ kmɔ̌ɔ mɔ̀ kɔn.

¹⁷ Nu Nè winʼà ï monoo kàan tè Mò u ngmà je tù.

¹⁸ Keǒ nùu È dbo Mǒo kělɔ kmɔ̌ɔ mɔ̀, kě Ě nu Ě dbe ulu klě kmɔ̌ wlòmo ke.

¹⁹ Ě tù Ně chɛ̀ je ngmà keǒ u mɔ̀ ɛ̈ di ɛɛ numa Nè kàan win i mǐ u ngmà je tù.

²⁰ Ɛ se Boǒ bàte uu doà uu tè, kɛɛ klee nyopò tùuǒ bü wɔ̌nʼɔ winʼǒ u mii boɔba ü mi Něe tè kàan tè poba.

²¹ Ě bɛ̀tee le ɛ̈ di ɛɛ numa uu wùɛ u mǐ dɛɛ do nu. Ně Gbeǐ, keà nùu È neeě Mǒo mǒ plě Ě neeě Mòo mǒ, kě bu nu bu neeě Ä mǒ.

²² Ě nye u tè jǐ boaboǎa doà nyè Mǒo ɛ̈ di ɛɛ numa keà Ä nuu Ä nuu dɛɛ do u mǐ bò nu ke.

²³ Ě neeǒ u mɔ̀, È neeǒǒ mɔ̀. Nɛ bu nu dɛɛ do klě Ä mǒ kpǎkpǎ ɛ̈ di ɛɛ numa kmɔ̌ɔ nyopò mi ɛ ji ɛ̈ moo Mò dbo Mǒ plě Ě noɛɛ u mǒ keà nù Mǒo mǒ noɛɛa.

²⁴ Ně Gbeǐò, Ě jlɛ̌ nyopòà ü nyè Mǒo bu neǒǒ gbàa tà wùɛ Ě miǒo nema ɛ̈ di ɛɛ numa tè jǐ boaboǎà nyèa Mǒo keǒ tà noɛɛ Mǒo mǒ ɛɛ tè mɔ̀, u mǐ ɛ jě ɛ̈ Ě kɔnaa plě kmɔ̌ɔ chɛ̀à ɛ mǐi nuu nu.

²⁵ Ně Jebo Siǐn Gbeǐ, kmɔ̌ɔ nyopòà u seè ji, kɛɛ Mǒà Ě jiì li plě nyopòà ǔ ji ɛ ɛ̈ moo Mò dbo Mǒ.

²⁶ Ě poò pepě mǒ keǒ u mɔ̀ plě Ě miǐ jè ɛ numa ɛ̈ di ɛɛ numa mǒ noɛnoɛà nyè Mǒo ɛ miě u mǒ be, Ě miě u mǒ ne.”