Jɔ̀ɔ̌n 10 - Nyesoaa Kuo Win Jajle

Kàan Blableǎ Jǐ Mɔ̀ Tùɔ̌ɔ Dǎtèkpa

¹ È kě Jùsu dɛ̌a u je Ɔ je, “Kàan tèà Ě tmɛɛ̌ amo, nyu wùɛ ɔ̈ miɔɔ blableǎa blò wan diba ɔ̈ seǒo wànwu jleě paeba mu, kɛɛ ɔ̈ miǒo wakǎ tɛ̀ɛ jleě jaěba ɔ moo jliɔ̌ klee flǎkpà nyu.

² Nyuǒ pɛɛǒo wànwu jleě nɔ̀ moo blableǎ jǐ mɔ̀ tùɔ̌ keǒ ɔɔ blableǎǒ mɔ̀.

³ Wànwu jǐ mɔ̀ tùɔ̌ sɛ̀ ɔ chnu je, è ɔɔ blableǎ pe ɔɔ win nɔkǔ jebo. Bɔ̌ poě i plomǒ bɔ̌ ke i wan le diba kpɛ, ɔ dɛ ii nyneǎ do do.

⁴ Bɛ̌ nu bɔ̌ ke ɔɔ blableǎǒ kpɛ ɔ kɛnʼě i nya ǐ nɛ ɔ de. Mɛ̌oǒ joo nɛ̀ moo i ji ɔɔ win ni.

⁵ Iǐ na nyu wùɛ i jěe de. Bǐ jě dɔ̌ nyu, i plìi ɔ je. Mɛ̌oǒ joo nɛ̀ moo i se nyu wùɛɛ win ji.”

Jùsu Wǒ Je Kàan Blableǎ Jǐ Mɔ̀ Tùɔ̌

⁶ È dǎtèkpaǒ nɛ̀ Jùsu poa u je, kɛɛ u sea dɛ ɛ sɛ̀nʼaa nynɛ̌ ji.

⁷ Ii tè Ɔ kpɛɛa Ɔɔ win nya Ɔ je, “Kàan tèà Ě boɛ a je, Mǒà Mǒ Wànwuǒ ɛ nynaǒ pènmo bo keǒ blableǎ mɔ̀.

⁸ Nyu wùɛ ɔ̈ miě Mǒo nya le sìnma ɔ moo jliɔ̌ klee flǎkpà nyu, kɛɛ blableǎǒ iǐ po uu win nɔkǔ jebo.

⁹ Mǒà Mǒ moo Wànwu, nyuà ɔ̈ miǒ Mǒo jleě paeba, ɔ mi waba, ɔ mi pě pà numa ɔ mǐ kwlǎ jɔpě le pɔ̀n.

¹⁰ Jliɔ̌ diě le keǒ bɔ jlǐ sosǒ klee bɔ dbǎ lu plě bɔ sùe u gbè. Kɛɛ Mǒà Ě diě le ɛ̈ di ɛɛ numa u mǐ kmɔ̌ sie fònfno kɔn ɛ miǒ le sìn.

¹¹ Mǒà Mǒ moo Kàan Blableǎ Jǐ Mɔ̀ Tùɔ̌ Ɔ̈ wɔɔn ɛɛ kɛn Bɔ̈ kǒo keǒ blableǎa tè mɔ̀.

¹² Konkwa nuɔà ninii nyu konkwa mɔ̀ ɔ se blableǎ jǐ mɔ̀ tùɔ̌, ɔ se blableǎǒ kɔn, tèǒ nì kɔn tè bɔ̌ jě chì bɔ̌ keě di, ɔ plì ɔ̌ si blableǎǒ bo, è chì kèenʼě blableǎǒ slè ɔ̌ gbɛ̀ i ja.

¹³ Tè kɔn tè nyuǒ ɔ plìi nɛ̀ moo ɔ moo konkwa nuɔ sosǒ, ɔ slě blableǎǒ ii tè mɔ̀ kɔn.

¹⁴ Mǒà Mǒ moo Kàan Blableǎ Jǐ Mɔ̀ Tùɔ̌, Ě ji Ně blableǎ le plě ǐ ji Mǒ

¹⁵ wòje keǒ ɛ nuu Ě ji Něe Gbeǐ plě Ně Gbeǐ ji Mǒo. Ě wɔɔn ɛ kɛn keǒ Bo kǒ keǒ blableǎǒ ii tè mɔ̀.

¹⁶ Ě kɔn blableǎ tìi ï seɔɔ blǎgbòɔ slè neě jè, Ě kɔn Bo ja lě i ke i mǐ Ně win wɔ̌n i mǐ blǎgbòo do nu i mǐ Jǐ Mɔ̀ Tùɔ̌ɔ do kɔn.

¹⁷ Ě wɔɔn ɛ kɛn keǒ Bo poǒ Ně fònfno blǒ mɔ̀ bo keǒ blableǎ mɔ̀ plě Bo dǔ ɛ mǒ de. Ii tè Ně Gbeǐ noɛɛ neě mǒ no.

¹⁸ Nyu wùɛ nɔ̀ se Ně fònfnoà Mǒ kwa sà, kɛɛ Mǒà Mǒ chlà lɛ keǒ Bo poǒ ɛ blǒ mɔ̀ bo, Ě kɔn kpě keǒ Boǒ tɛ ɛ bo plě Ě kɔn kpě keǒ Boǒ dǔ ɛ mǒ de. Dɛǒ nɛ̀ Ně Gbeǐ tmɔɔ̌ Mǒ Bo nu.”

¹⁹ Tà Jùwɛ nyo wɔ̌naa tèǒ, ù plooa ɛ wakě klě uu chɛ̀ slè.

²⁰ Kě uu dɛ fòfoa dɛ̌a u je, “Kǔ sùsuǒ neě Ɔ ja nɛ̀ kɔn tèǒ Ɔɔ dlǒ seǒ snǔ mɔ̀ ne. Mɛ kɔɔ̌n tè a peě kɛ Ɔ nɔkǔ jebo?”

²¹ È kě uu tìe tùu dɛ̌a u je, “Nyuà kǔ sùsu neěe ja ɔɔ̌ nu bò boɔboɔ. Sɔ̌noka, nyuà kǔ sùsu neěe ja ɔɔ̌ kna dodɔ nyuu jǐ.”

Jùwɛ Nyo Sàla Jùsu Jleě Mɔ̀

²² Tà tǐ nyniaǒo keǒ bu kɔnaa de ngmnengmnɛ̌ ɛ̈ mooa bu tùaǒ Nyesoaa kǎ fòɛ Nyesoa kwete mǒ klě Jlǔsnɛ, è ɛ nua wìdlii tǐ.

²³ Klě de ngmnengmnɛ̌ǒ wlòmo, è Jùsu neaě klě Nyesoaa kǎ fòɛ bo tà u dɛǒo Sanemɔ̌ɔ wànwie.

²⁴ È Jùwɛ nyoo je si nyo tbɛɛa Ɔ dǐ ǔ gbɛ̀a Ɔ wan u je, “È ke ɛ miǐ kɛ jleě mǒ bo tonma plě Mòo kɛě ä kplɛà wlò jleě sà? Tmɔɔ̌ ämo sɛjesɛ bɛ̌ nu Bò moo Nyesoaa Tentǎn Jǔ.”

²⁵ Ɔ tùa u kɛ̀ɛn Ɔ je, “Ě tmɔɔ̌ noo amo no de ɛ̌ wɛ̀ mɔ̀le, kɛɛ aǎ jlǎ ba po Ně tè kàan tè. Wlòlekaen noǎà Ě nii klě Ně Gbeǐi nynɛ̌ wlòmo nì moo sàse keǒǒ mɔ̀ ke,

²⁶ kɛɛ wlòlekaen noǎǒ aǎ po ii tè kàan tè ke. Mɛ̌oǒ joo nɛ̀ moo a se Ně nyopò.

²⁷ Ně nyopò wɛ̌n Ně win ni, Ě ji lu, plě ǔ nɛɛ̌ de.

²⁸ Ě nye u kmɔ̌ sie fònfno, tèǒ nì kɔn tè u seǎ gbè sùe kpe plě nyu slě uǔ kwete mǒ sàba mu.

²⁹ Ně Gbeǐà nye u Mǒo Ɔ kun nu Ɔ̌ sìnʼǒ nyopò wùɛ mǒ. Nyu wùɛ nɔ̀ slě wɔ̀ bɔ̈ jlǐ dɛ klě Ně Gbeǐ mɔ̀.

³⁰ Ně Gbeǐ klee Mǒ Ä moo dɛɛ do.”

³¹ È Jùwɛ nyo dǔa seɛ̌ mǒ de u mǐa i Ɔ bee le Ɔ mǐa kǒ,

³² kɛɛ kě Ɔ dǎla u je Ɔ je, “Ě te a je wlòlekaen noǎ fòfoa ï sɔnʼě Něe Gbeǐ mɔ̀ mǒ. Ii noǎ tae kɔn tè a miǐ kɛ Mǒ seɛ̌à beeba?”

³³ U tùa Ɔ kɛ̀ɛn u je, “Ä seè seɛ̌ bee le keǒ kàan noǎà nìi ii tè mɔ̀, kɛɛ ä ni ɛ keǒ Bò di Nyesoa fla wan po, Bò di dìe Nyesoa mǒ nu, Mòà moo tùonyu sosǒ!”

³⁴ Jùsu tùa u kɛ̀ɛn Ɔ je, “Ɛ se kɛ chleě le klě Nyesoaa teteǎ wlòmo ɛ̈ moo, ‘Amoà A moo nyesoe le?’ (Ps 82.6)

³⁵ Nyesoa dɛa nyopòǒ Ɔ boɛa lěe mɔ̀ nyesoe. Ä ji ɛle ɛ̈ moo Ɔɔ win se sen,

³⁶ kɛɛ tà Nyesoa sà Mǒo Ɔ̈ dbo Mǒo kělɔ kmɔ̌ɔ mɔ̀ kělɔ a mɔ̀, a tmɛɛ̌ Mǒ ɛ̈ moo tà Ě je Ě moo Ɔɔ Jǔ, Ě pe Ɔ wan fla.

³⁷ Bɛ̌ nu Bolǒ nu wlòlekaen noǎ klě Ně Gbeǐi nynɛ̌ wlòmo, è baǎ pe Ně tè kàan tè,

³⁸ kɛɛ bɛ̌ nu Bo ke i ni plě bǎ se Ně tè kàan tè poo chɛ̀, è a blɛɛ je ba po wlòlekaen noǎà Ě nii ii tè kàan tè ɛ̈ di ɛɛ numa a mǐ ɛ ji kàan tè ɛ̈ moo Ně Gbeǐ Nɔ̀ neěě Mǒ plě Ě neeě Ɔ mǒ.”

³⁹ È u tɛ̀na ɛ mǒ keǒ bu kmea Nɔ de, kɛɛ Ɔ sɔnaě u slè mǒ Ɔ̌ mua.

⁴⁰ È Jùsu bɛ̌a Jɔ̀ɔ̌dɛn ně tìe de Ɔ̌ muaě tàà Ně Dlǒ Po Jɔ̀ɔ̌n peeaěe nyopò ně dlǒ le. Klě Ɔ nea lě

⁴¹ nyopò fòfoa diaě Ɔ mɔ̀, è kě u dedɛ̌ɛa jele u je, “Jɔ̀ɔ̌n sěɛlǎ wlòlekaen dɛ ni, kɛɛ noǎ wùɛà ɔ boɔɔ keǒ Jùsu jleě mǒ i moo kàan tè.”

⁴² Nyopò fòfoa poa Jùsuu tè kàan tè klě tàě.