Jùsuu Tuposà Kpa Nyoo Nunu Noǎa Chněedɛ̌ U Dɛɛ Ǎkè 3 - Nyesoaa Kuo Win Jajle

Pitɛ̌ Peana Bo Klɔ̀ɔ Jbɛju

¹ Chnɛ̀ jlǒ waě tɛ̀ɛ mɔ̀ Pitɛ̌ klee Jɔ̀ɔ̌n miaě Nyesoaa kǎ fòɛ bo u mǐa bàte klě àwɛɛ tan nenɛ wlòmo keǒ wanpno waěǒ mɔ̀.

² Ɛ kɔna bo klɔ̀ɔ jbɛju tɔ̀ɔ nɔ̀ neaǒ keǒ Nyesoaa kǎ fòɛɛ pae wànwu jleě bo ɛ̈ u dɛɛ Jǐlenmɔ Wànwu. Ɔɔ bo klɔ̀ɔaǒ ɔ jala ɛ dǐa. Chnɛ̀ jlǒ waě wùɛ mɔ̀ nyopò duǐ ɔ mǒ ǔ kpɛě ɔ keǒ wànwuǒ jleě ǔ tùi ɔ bo ɛ̈ di ɛɛ numa nyopòǒ miěe Nyesoaa kǎ fòɛǒ bo diba ɔ mǐ u wlě sòa.

³ Tà ɔ jěaa Pitɛ̌ klee Jɔ̀ɔ̌n u kea lěe kǎ fòɛǒ bo pɛ, ɔ̀ sòala u wlejoɛ̌ɛ.

⁴ U tanaǒ ɔ mɔ̀le, è kě Pitɛ̌ dɛ̌a ɔ je ɔ je, “Tan nɔ ä mɔ̀le.”

⁵ Ii tè ɔ̌ wlǎla u jǐ ja, è ɔɔ wlò jěa lɛ ɛ̈ moo u mia ɔ dɛ nyema.

⁶ Kɛɛ kě Pitɛ̌ dɛ̌a ɔ je ɔ je, “Ě se wlejoɛ̌ɛ wùɛ kɔn, kɛɛ dɛà Ě kɔnʼɔ nɛ̀ Ě miì nyema. Klě Jùsu Tentǎn Jǔà kɔn lěe Nǎsòwɛ̌ dǐa Ɔɔ nynɛ̌ wlòmo, sɔn mǒ nà!”

⁷ È Pitɛ̌ kmeea ɔ dilǎ son ɔ̌ mǎnaǒ ɔ mɔ̀ ɔ̌ nynaea ɔ bo, è tǐi doǒ tǐ jleě ɔɔ be klee klòklosobai nìǒ bea kbě ja.

⁸ È nɔ̀ǒ ngmnana ɔ̈ tùngmaea nena ɔ̌ nana Pitɛ̌ klee Jɔ̀ɔ̌n de ǔ palaě Nyesoaa kǎ fòɛǒ bo ɔ̌ nɛa ɔ̌ ngmòngmnɛɛa le ɔ̌ pea Nyesoaa nynɛ̌ le.

⁹ Tà nyopò wùɛǒ u jěa lɔɔ ɔ nɛaa plě ɔ peaa Nyesoaa nynɛ̌ le,

¹⁰ klee tà u jboa lɔɔ ɛ̈ moo jbɛju ne pnɔaa Nyesoaa kǎ fòɛɛ pae wànwuà u dɛɛ Jǐlenmɔ wànwu jleě bo ɔ̈ sòɛ pnɔɔ le nɔ̀àò, ì kàea u bo wan ǐ kɛɛnʼa u wlò le keǒ dɛǒ kpalaa tùɔn mɔ̀ keǒ ɔ jleě mǒ.

¹¹ Ɛ tutuǒa nyopò wùɛǒ bo ǔ kpala plùplɛ klě Pitɛ̌ klee Jɔ̀ɔ̌n mɔ̀ klě tà u dɛɛa lěe Sanemɔ̌ɔ wànwie, tàa doǒ jbɛjuǒ ɔ neaǒo ɔ̌ bleěa jèǒo Pitɛ̌ klee Jɔ̀ɔ̌n mɔ̀ kwa.

¹² Tà Pitɛ̌ jěaa diblɛ̌ǒ, è kě ɔ dɛ̌a u je ɔ je, “Ǐsòwɛ̌ kwɛɛn ane, mɛ kɔɔ̌n tè dɛà ɛ kɛɛn neě kɛ amo wlò le? Mɛ kɔɔ̌n tè a tɛɛ̌n kɛ lɔ ä mɔ̀le keà u nu wiěn äa chɛ̀ɛ kpěà klee äa Nyesoa dɛɛ jebo siǐanʼǒ nu ɛ jbɛjuà ɔ̌ nɛ?

¹³ Nyesoaà moo äa gbeǐpòo Nyesoa ü moo Eblɛ̌hɛ̀mo klee Aesěè plě klee Jèkɔ̌po, Nɔ̀ nye Ɔɔ Na Wien Po Nyebajlo Jùsu tè jǐ boaboǎ. Tà Pàlɛ̌tee chɛ̀ wɛ̀aa mɔ̀ keǒ bɔ tɛaa Jùsu bo, a poaě Ɔ nyopòà kɔnʼɔ kmɔ̌ɔ kpě kwete mǒ ǎ sàla Ɔ jleě mɔ̀ klě Pàlɛ̌te jemǒ.

¹⁴ A sàla Ngmà Je Ne Nyu Ɔ̈ moo Jebo Siǐn Nyu jleě mɔ̀ ǎ tmɔɔ̌a Pàlɛ̌te bɔ tɛa mnùngma poɔ bo keǒ a mɔ̀.

¹⁵ Nyuà Ɔ̈ moo Fònfnoo Wlò Le Tùtuɛ Nɔ̀ a dbǎla, kɛɛ Nyesoa dǔa Ɔ jemǒ Ɔ̌ sàlaě Ɔ kǒla mǒ, äa wùɛà nɛ̀ kɔn sàse dɛ ä ni.

¹⁶ Tà ä poo Jùsuu nynɛ̌ɛ tè kàan tè, dɛǒ nɛ̀ kɔn tè Ɔɔ kpě nu bo klɔ̀ɔ jbɛjuà ɔɔ be kbě ja le ɔ̈ a jěe plě a jii. Tè wlò popoɛǒ ä kɔn lěe Jùsu mɔ̌ nɛ̀ nu jbɛjuà ɔɔ kwɛ̌ bɔ̌ dɛ kpǎkpǎ kělɔ aa wùɛ jemǒ.

¹⁷ È äa bǐì Jùwɛ nyo ane, Ě ji ɛle ɛ̈ moo a sea i ji ɛ̈ moo Jùsu Nɔ̀ moo Nyesoaa Tentǎn Jǔ, tèǒ nì kɔn tè a dbǎla Ɔ wòje keǒ aa nyefòapo nuu ke ǔ sea lii ji.

¹⁸ È ke Nyesoa nuaě ɛɛ le jiěaò ɛ̈ Ɔ poa Ɔɔ wnɔsàɔpo wùɛ wan u sàlaa wan keǒ Ɔ jleě mǒ ɛ̈ moo Ɔɔ Tentǎn Jǔ kɔn Bɔ jěǎ sònwɛ.

¹⁹ Tèǒ nì kɔn tè a bitǐ aa wlè bo ɛ̈ di ɛɛ numa Nyesoa mǐ aa kpni kukwǐi tè wlò le poo lo

²⁰ klee tǐǒ miěe diba Koɔn mǐ a jajlo měne po, Ɔ mǐ Jùsu dbo de kělɔ a mɔ̀ Ɔ̈ Ɔ tbaa Bɔ̈ moo Tentǎn Jǔ.

²¹ Jùsu kɔn Bɔ neě jɔkɛn bo ɛ mǐ ɛ kpa kpa Nyesoa mǐ noǎ wùɛ jajlo měne po klě tǐǒ Ɔ pooa lěe wlòmo ɛ̈ Ɔɔ ngmà je ne wnɔsàɔpo sàlaa wan seela tǐ jleě.

²² Kě Mɔ̀sě dǎla ɔ je, ‘Aa Koɔn Nyesoa miǎ a Nyuu do sàba klě a slè keǒ Bɔ mooǎ aa Wnɔsàɔ wòje keà ně ka nee je kělɔ a slè. Dɛ wùɛ Ɔ mi amoo tmɔɔ̌ma a po ɛ nɔkǔ jebo.

²³ Nyu wùɛ ɔ̈ se Ɔɔ win nɔkǔ jebo poba mu, ɔ miǎě Nyesoaa nyopò slè sàeba plě ɔ miǎ gbè sùe.’ (Deut 18.15-16,19, Lev 23.29)

²⁴ Sɔɔnʼě Samiɔ̌ɔ tǐ jleě mǒ imo chnɛ̀ jlǒ wěe doà nì kɔn tè Nyesoaa wnɔsàɔpo wùɛ sàla wan.

²⁵ Amo moo wnɔsàɔpoo jlǔu jlǔ plě amo Nyesoaa kuo winʼà Ɔ poaa klě äa gbeǐpò mɔ̀ i kɔnʼǒ mɔ̀, kě Ɔ dǎla Eblɛ̌hɛ̀mo je Ɔ je, ‘Klě nè jlǔu Jǔ mǒ klě kmɔ̌ ne tùonyopo wùɛ Ě miě u ngmna mɔ̀ pooba.’ (Gen 22.18, 26.4)

²⁶ Nyesoa sàlaě Ɔɔ Nyebajlo Jùsu kǒla mǒ Ɔ̌ dboa Lɔ klekle kělɔ a mɔ̀, Ɔ mǐ a ngmna mɔ̀ po ɛ̈ Ɔ nii keǒ Bɔ bitǐ aa do doo wlè ble bi tbɛ dɛ kukǔ kɛn.”